Djawupuku 42

1 Maî ga reko cho buetygidji. Cho kãwãma idjape. Cho buetygi Prawopyregi; Cho djã´ã ury gatu idjadji. Cho Krei gatu mima idja llabu, go eruwerã bue djapo gatuwã ekuandy wywy puarã. 2 Puka chidjallãwerãma djawu chidjallãma emi wendullãwerama dja djawu go ekõandy pua ape wywy rupi. 3 Bowollãwerã go takua chapadji, go endyatygi buwellãwerã, djãmpallãpe kiu gatuwerã. 4 Prarullãwerã emi manollãwerã puãmbyrã go bue djapo gatu ywy llabu. Go emi ekuandy ywachu embedjiwa warõ reko idjape kiu gatuwã. 5 Go nonga ina Apã Wachu, Cho Apãechegi. Idjarõ ywa djapoare emi idja djapowe wywy idja mima emi djapoma we´ẽgi wywy gope, emi gua´agi go ekuãndy îngi gope. Go mema krei gatugi emi watagi ywy puagipe. 6 Cho, dje Apãeche dje pukawedji bue djapo gatu rupi, go dje ipodji rawerã, kuwê rekowerã djedji, cho miwerã ekuandy pua djawu membyregidjiwa go ekuandy wywy chapiatygi emi. 7 Kuwêwã emi go chãllãngipe. matãwã emi tapy djawãllã pua ingi wywype. go emi tapy muchãmbyre nonga ekõngi emi chawã nongape. 8 Cho rõ Jaweh, go nonga cho bykuapyre, gogi wywype cho mellãwerã cho ekõ gatueche. Cho rõ kbeigatueche cho wedjallãwerã duwe chã´ã nonga djapopyrepe pre rekowã. 9 Wechã gatuiko go emi nondjeware ekõmbawegi wywy emi go nonga ekõwerã wyche kowebu. Cho kiuma pendjepe ekowã pendje kua gatuwã cho kua gatupama bue wywy. 11 Pre mondo Apã Wachupe etakra Pre Pou. Duwe rekuatywa ywy krãmpĩpewe: Pendje ogi y wachupe, go wywy pendje llaporã wywy îngi gope, pendje y wachu ruwawagi ekõngi wywy kua gatu ga reko idjape. 10 Pre chidja mondo pendje ekõngi djõy wachupe go ekuandy wywype emi duwe ekuandy pua ekõngi cedarpe: Pre mondo go Sela puagi. Go ekõngi ywy kuambuku rekuatywagi ury gatupe puka chidja mondo. 12 Kua gatueche ga mondo Jawehpe, ingi y wachu embedjiwa wywy kiu mondo idjape. 13 Apã Wachudji ekõwerã etakrã krymbaechegi, go tõmumbu kua gatugi ekõwerã ury gatupe emi krymba gatupe, tõmumbu kua gatugi ekõwerã ury gatupe emi krymba gatupe, tõ mumbu rekobu pukawã weyma dja byllãndygi wywy llabu. 14 Nondjeche wema djawullãpe endawe. djawullãma kowebu; kãwãmbyredji kowebu emi cho pukawerã etakrã kudjã brawo achywe nonga. dja tue´êpe cho gua´abu emi. 15 Go kuã mini emi ichãkrãngi îmbechewerã piãndjãmbawerã go djõrã ingi go djawê. Go y miningi krãmpîwerã ekõwerã ywy îllãwerama y endawe rõ îwerã. 16 Go kuwêwerã emi chãllãngipe ape kua gatullã rupi. Watawerã idjadji ape kuallãmbyre rupi go chãwã îngi idja chã ruwa kiuwerãma emi matãwerã emi ita îngi apepe watawã ape idju rupi. Kowe nongaechebu djapowera idja wywy puarã cho wedjabechewerã cho djawuwegi wedjabechwerã. 17 Djewywerã tãpî rekuaty dja chãngarapawerã emi mudjãngi chãdjiwa djapopyregidji inagi: ¨dje rõ cho Apã¨. Gogi wywy krymballãwerã emi îmbechewerãma. 18 Pendje wendullãngi, kowebu wendu ga mondo! Go penje chãllãgi wechã, wechã gatu! 19 Awa rõ chãllã, Cho buetygi mirõrã? Awa rõ pychape kiuwã, cho buetygi, illã duwe chãllangi cho buepytygi nonga ĩllãeche ko duwe chãllangi Apã Wachu buetygi nonga? 21 Dje wechãma tãrã bue dje kuwellã idjape, dje wenduma tãrã bue wywy wendu gatullãmbu djepe. 20 Apã Wachu prawo gatueche bue gatuechedji neina wachueche dja bue djapopawedjiwa. 22 Kowe ekuandy puagi narõmbawe emi pyrõmbyre emi kãwãma idjape pypyma ita djãwãpe emi tapy djawãllãpe, narõware mima gope ĩllã duwe idjape kuwewãngi wywy. Narõmbama emi illã duwe kiuwãngi; pendje pepy ga mondo idja wywype. 23 Awa rõ pendje bychepe wenduwerã kowe bue wywydjiwa. Awã rõ wendu gatuwerã go kuadjue go bue ekõwãndjiwa. 24 Awa rõ mewe Jacobpe dja byllãndygipe, go ytyma Israelpe narõngi wywy ipope. Apã Wachu mirõrã Israel pua wywy buebuchã djapo idja chã ruwa, ekõdjuellã dja kuerepe emi djapollã/buare dja inambawegi wywy, 25 Go buare idja kawoma idja llabu dja prãndjã emi tõmumbu djuei wachu: mendyma idja ruwa, gogi wywy kuallãẽche, gobu kawãmbama idja wywype, gogi wywy kuadjuellã emi djapollã.