1 Cho djawu wendu gami, djemimbyre nonga, pendje y wachu puagi chidja ga mondo, edjo gami cho endape nandje djawuwã. Emi djawu pepy gatuwã. 2 Awa rõ puawegi kre'y ekuãndy rekuaty etakrã ekõ prarugi ekõwã idja pychã rekuaty chidjawã duwe ekoãndy wywy go miwerã gogi wywyre ymachidja wachugirã, pē'ē puku rupi djuei buchãwerã go ymachidjawegipe go gi tachī nonga wytu Wachugirã, go rapa mudjãwerã gogi wywype go wyra o' piãndjãwegi nonga owerã wytu wachubu 3 Mudjãma gogi wywype, go urygatupe wachama ape rupi dja pychã watallã nonga ywy rupi. 4 Awa rõ djapowe kowegi, go pukaty nondjechema uwe rekuaty wywygipe, cho, Jaweh cho rõ nondjechewaregi emi ekõwerã wychegi, cho wedjabechewerã. 5 Gogi ekuāndy y wachugirã embedjiwa wechõmbama go krymballãma, go gi ywykrãmpi krampi pushing what krymballãechewerã; noãmbama edji wywy , gobu ekõmbama. 6 Gogi rõ kuwẽ gatuma, inama dja pawe wywype chidja ga mondo. 7 Go chã'ã nonga dja puatygipe chidja mondo emi ita biri buchãngi bakuatygipe, gogi emi chidja mondo go pachoatygipe ita biri buchãngi chope gatuwerã, gogi chidja mondo emi go budjatygi bue djapo gatãnwagi, go krãmpi duwegi mima mondo beta akuape gorãwe endarã, go kuera bechewerãma. 8 Dje rõ Israel, cho buetygi; dje Jacob, cho prawowegi; dje Abraham irõndy, go rõ cho bygatutygi. 9 Cho djepe matãwe ywy krãmpĩ puare, go ekuāndy rypydjiware emi cho djepe wedjallãwerã. 10 Krymballãme, cho ĩwerã dje djãwẽ, djã prarueme cho rõ dje Apãechegi, dje chidjawãngi, gorãwē cho djepywerã, cho kuwēwerã cho chidja rupi. 11 Meī pyry ga mondo, tãrã pendjepe byllãwegi chã'ã wychowerã gope īmbechewerã emi ekõwerã. 12 Dje kuara djepe djedji byllãwegipe dje djubechewerãma gogi wywy bue wywy rekollãwerã pendje byllãngi, go biri djuegi pendjepe, go endarã bue rekollāeche. 13 Cho rõ Jaweh pendje Apã Wachu, cho kawāma dje ipo llu rekuatywagi, cho inama: dje krymballãeme, cho djepe kuwẽ gatuwerã. 14 Krymballãeme, dje Jacob cho prawoechegi. Pendje Israel puagi wywy pendje etakrã djepe, cho pendje kuweãndygi, cho rõ Jaweh, Israel Apãechegi, pendje matãwegi djuei buchãngi puare. 15 Meī pyry ga mondo, cho mima mondo etakrã pougi bue ã'ã djykywãgi go imbi gatuma bue ã'ã kuichowãngi go kuãmbuku ywy kmabu emi kowebu djõrã piandjãwegi nonga. 16 Cho wawawerã wytupe, go wytudji wewepawerã, dje urygatuwerã Jawehdji, go dje urygatuwerã Israel Apãechedji. 17 Gogi okryrallãpe go bue rekollãngi owerã y kuarawã dorobechewerãma, kbere piryllãma y tyku djuedjiwa cho, Jaweh, cho wenduwerã gogi wywy, cho, Israel Apãechegi, cho rõ pendjepe wedjallãwerã krãwegi wywy nonga. 18 Go ywy ka byche rupi cho miwerã, y tuwy gatu go djo rupi y krãmpĩ gatu go ywy kallãpe y ĩwerã, go ywy piryllãngipe īwerã y krãmpĩ gatugi. 19 Ka irõllãpe endarã tãrã wyra, cedro, acacia, arrayan emi olivo; go ywy īmbechegi rupi cho mimbawerã wyra edji wywy: cipres, pino emi bodje (abeto). 20 Gogi wywy wechãwerã go kua gatuwã Jaweh ipo djapopawe bue wywy, go Israel Apãechegi rõ djapopawegi bue wywy. 21 Edjo ga nandje djawu gatutygi endape, ina Jaweh; mi ga mondo pendje bue wywy cho chã ruwa, djawu ga mondo pendjedji, ina Jocobo ymachidja wachugi. 22 Edjo gami go kiuwerãngi go bue ekowerãngi go bue rõ go nondjeche inawegi ekõwerãgi, go kiu’u ga mondo ore wywype bue rõ ekõwerãngi. 23 Kiugamondo go bue ekõwerãngi nandje lluãwa rekuaty, go nongai eche ore kuawã pendje Apã Wachu pendje bue gatu djapo emi bue buchã djapobu djepe go nonga ore wywy wechãwerã emi ore wywy krymballãwerã emi. 24 Pendje rõ, bue gatullãngi, emi bue djapo kuallãngi, gogi wywy pẽndjepe prawowegi, gogi wywy rõ bue chidja djapotygi emi. 25 Kreywa llachu rekuaty pua'ãwerã etakra kbe'e go ekõwerã emi; krey wendy rekuaty gogi wywy mbiriwerã ymachidjagi wywydji, go ywy mo'odji pyrõmbyre nonga, go ywy mo'o djapowatygi nonga. 26 Awa rõ djawuwe Apã Wachu djawu ina gatupyre nondjechema emi, ore wywy kuawã idjape, awa rõ kiuwegi ore wywype djawu kuawã go nonga ĩllãeche djawu kiuatygi, go ĩmbeche emi wenduwãngi pendje djawu. 27 Cho rõ kiuwegi kowegi Siónpe, go Jerusalempe cho inawerã etakrã djawu kiuwatygi go kiuwerã bue pou gatugi go ury gatuwã. 28 Cho meĩ'ĩ gobu; cho kua'a reko awa rõ kiuwatygi: cho prandu reko gogi wywype, go djawubeche emi. 29 Kua gatu ga mondo gogi wywy bue gatullãngi, idja djapowegi bue djapo gatu llãngi emi, bue ĩdja chã'ã nonga djapowegi bue kumbepyregidji bue ĩllã wytu nonga emi.