Djawupuku 40

1 Krymba gatu me'ẽ, okryra me'ẽ emi cho chupadji, ĩma Apã Wachu. 2 Djawu mondo djãwaichedji chupa Jerusalendji emi puka mondo ina idjape wẽma go krey'y wachoma o achy krapĩmbama djapo buchãwegi pepyllãwerãma wẽware djuei'i buchã ekõwe Apã Wachu chã ruwa, tãrã bue buchã djapopawedji. 3 Ĩ djawu chidjagi kawachupe go inama pendjepe: djapo gamondo ape gatu Apã Wachu puarã emi mingatu gamondo go ape Apã Wachu puarã go kairollãpe. 4 Go ywy ĩ ywy kuambuku rekuaty puãwerã, emi chepewerã go kuambuku go ywy pua'angi go chapagi chapallã gamondo go ywy ĩngatullãngi mi gatu gamondo. 5 Gobu Apã Wachu eche tuwy gatu wechãmbyrã ĩngi ywy llabu wechãbawerã; Apã Wachu eche inambawegi kowe wywy. 6 Etakrã djawuma chodji: kiu mondo. Go cho inawe: Bue ro cho kiuwerã. Ina: ache wywy ekõ djorã gatu nonga emi djõrã pua puty nonga. 7 Go djorã piadjãwerã, go puty emi wapawerã, Apã Wachu rõ wytu pedjadjiwa idjape: Go nonga ache wywy djorã nonga emi. 8 Go djorã piadjãwerã, go puty wowerã, Apã Wachu djawu rõ krãpĩmbechewerã. 9 Djupi gamondo ywy kuambuku Sion llabu kiu mondo ury wachu djiwa, dje Jerusalen chidjape, kiu mondo ury wachudjiwa. Puka mondo, kryballãeme; ina mondo Juda pua chupa ĩngi wywype: Pendje wechawerã Apã Wachupe. 10 Wechã gatu ga mondo, Apã Wachu, ekõwerã chidja echedji, idja ipo rupi chidja rekowerã, wechã gatu gamondo idjadji eruma bue dja llapo membyrangi pepywerã dja djapopawegi nongaeche. 11 Go Wachupurã warõ'andygi nonga warõ reko idjadji, go rawerã wachupurã memby idja cha'ape wywy, prowo gatuwerã emi kuwẽwerã go wachupurã memby opowegi nonga. 12 Awa rõ djapiwerã go y idja ipope bychechepe go yma ipo naina wachupe awa rõ ywy kui mombowerã go idja puy buãndygipe ywy kuambuku puy wachu. 13 Awa rõ kiu'u Jaweh kre'ipe? Kiuwerã ko tongatuwã idjape? 14 Awa rõ kiu'u tõ gatuwã emi awa rõ kiu reko idjape bue gatu djapowã emi, ore ko kiuwerã idjape bue kua gatuwã ore kiu'uwerã ko idja ĩ ngatuwa? 15 Kua gatu ga mondo, go ekuãndy idja puarã rõ ymini nonga go we'ẽgi kara djawã, go ywy kui ĩgi puy buandygipe: kowegi rõ ywy kytã ĩgi y wachupe go rõ idja puarã etakrã ywy kui nonga. 16 Go Libano ka'ape ĩgi tãrãllãwerã chakã krere puarã, go we wywy tãrãdjepe krapĩmbawerã we kei endatype. 17 Duwe rekuatywa wywy ekoãndygi pendje rõ chidjallã wywy idja puarã; idja wechãma gogipe go rõ chidjallã. 18 Awadji rõ pendje buãwerã Apã Wachudji? Go duwe Apã chã nonga djapopyregidji ko pendje bua'ãwerã idjadji? 19 Kbe'e chidja gatugi djapo kuagi idja djapowerã idja Apã chã nonga go baku kua'agi ita birĩbuchãngi miwã gobu mima idjadji ita biribuchãngi gobu mima etakrã rupydjiwagi ita biribuchãngi idja gatugi. 20 Go bue rekollãngi rõ prawowerã idja Apãrã, etakrã wyra kuillãngipe; gobu kuarawerã etakrã djapo kuagipe idja puarã etakrã chã djapo, kua gatugi wyradjiware kuerallãngipe. 21 Pendje kuallã ko pendje wendullã ko manonga ko ekõwẽ? kiullã ko pendjepe manonga ko djapopyre kowe ywy wywy? 22 Apã Wachu rõ wapy ĩ ywy wachu llabu, idja puarã rõ ache wywy beky ninga, idja pouma emi ywadji tyru pou nonga, idja djapopawe go tapy tyrugidjiwa ekowã djãwãpe. 23 Idja djapoma gobu mellãma chidja gatu ymachidjagipe go chidjallãmã kowe ywy llabu. 24 Go rõ wyra ray nonga peche pouwegi, go mirõrã wyra pougipe idja apo gatullãngipe ywy wydji, go pedjubu idjadji o piandjãwerã go wytu pedju chidjabu rapawerã go wyra o wawegi nonga. 25 Awadji rõ pendje chope buãdjue, cho rõ idjadji buãwerã, inama go adjullã gatuechegi. 26 Maĩ gatu ga mondo go tata wywydji. Awa rõ djapopare idja rõ djapowe watawã, idja pukama idja bykuapyrepe, go ĩllã ekõllãngi etakrã idja pukabu, gononga rõ idja naina wachu. 27 Bue ware rõ dje Jacóbo ina, bue ware rõ dje Israel djawuwe: Cho ape rõ kandjãma Apã Wachu chã ruwa, go cho rekoatygi wechãllã go cho djapopawe kbeigatu wywydji. 28 Kuallã ko emi wendullã ko Apã Wachu, go rõ Rekuatygi krãpĩbechewerã? Idja ekõ, idja djapopawe wywy krãpĩ pewe, djãwã prãrullãwerã, emi guallãwerã ĩllã idja kua gatugi idja nonga. 29 Idja rõ mewerã chidja prarugipe emi mewerã chidjaechewã go praru buchãngipe. 30 Go krumi rõ gua'a, go bkuchuwe rõ praru, gobu wapama. 31 Go kuaagi Apã Wachu rõ chidjawerã, go wewewerã ywadji kuyra nonga, go mỹrõwerã emi guallãwerã, gorawẽ wata rekowerã emi prarubechewerã.