Djawupuku 35

1 Ury gatuwerã go ywy bue îllãgi emi go ywy îllãchegi; emi ury gatuwerã go djo'õ wyra puty wêma go puty wywy nonga. 2 Putypa ury gatu emi prewerã ury gatuechepe; go Libano kbeigatugi nõembawerã idjape. Carmel emi Saron kbeigatugi wechãwerã Apã Wachu chidja gatu emi eche tuwy gatu. 3 Chidja mondo pendje ipo prarugi, emi kype mondo pendje makã prarugi. 4 Ina gami go dja'ã prarugipe: pendje krymba mondo, krymballãeme; pendje Rekuatygi ekõwerã pepywã pendjedji byllãgi buchã djapoty, nandje Rekoatygi rõ ekõwerã, go pendje matãwerã go pendje djueitygidji. 5 Gobu go ywy llabuwa cha'a wechãllãwegi wechãmbawerã, emi gi pycha wêndullãwegi wêndupawerã. 6 Gobu go wata buchãwegi opawerã wachu nonga , emi go djãwã buchãwegi pre'ewerã emi, wewerã y'y ywy bue illãngipe emi wewowerã ywy ekõllangipe. 7 Go ywy piryllãgipe ekõwerã y'y nuã'ã, emi go ywy bue illãngipe ekõwerã y'y wewo gatu, go begi teyche ekõwegipe, wewerã djõra emi krãndo. 8 Gope îwerã etakrã ape, go ape gogi Jaweh matãma go rupi bue buchã djapogi wachallãwerã, go idja apedji dja'ã gatugi watawerã, go ekõngi go ape rupi, chãwãmbudjepe, djãmpallãwerã dja ape. 9 Gope îllãwerã djuku, emi mymba teyche emi prandjãgi wywy ekõllãwerã, Jaweh tey wywy dorowerã go apepe. 10 Go duwe Jaweh kuwê gatupyregi ekõmbawerã emi ury gatupe ekõwã Siompe, emi urygatuechepe wewerã idja dja'ãpe, urygatueche emi urygatupe ekõwã go wywy go uryllã emi tue'ê omatã mbudjakrãpe ĩwerã gogi wywydji.