Djawupuku 34

1 Ekoãndygi wywy rypyecheme nua'ãwã wendu gatuwã, pendje ekoãndygi wendu gami. Go ywy naina wachupe duwe ekõngi, wendu gami go wẽwerãngi wywy. 2 Jaweh prãndjãma duwe ekõandygi wywyndji emi dja tõ allãngidji: pachopawerã gogi wywype emi mewerã gogi wywype djukapawã. 3 Manombawegi wywy djapipawerã go duwe rekuaty emi teywu buchãwerã, ywy kuambu wywy pirypawerã go pirãndji. 4 Go tata ywadjiwa krapĩwerã, emi go ywadjiwa wywy papypawerã go kuachia nonga, wawerã tata wywy, go chipopurã lla'a o'o kuichowe nonga, emi higo o'o wawegi nonga. 5 Cho prandjã embema go chipopurã lla'a ty'y embe nonga, go ytata wechegipe, go cho pẽ puku wedjywerã ywadji Edom llabu pachopawã. 6 Jaweh pẽ puku embema pirãndji emi kyra wywy wa'ama idjadjiware, wachupurã teype, bechepe pirãwe emi wachupurã chĩ’ĩ kyrawedji; Bosrape ĩwerã we keĩmbyre emi Edompe manomba roma Jaweh buarã. 7 Gogi wywyndji wawerã go achipurã teychegi noga emi achipurã teypegi, go ywy mokõwerã go pirã wywy, emi go kyrawe wechapyrã ywy gartugi nonga. 8 Ekõma go krey'y Jaweh pepywerã go bue buchã djapopawegi Siondji. 9 Go y'y krapĩ wewo ekõwerã ita kui prechãngi nonga, emi go tachĩ ekõwerã adjãwe tata, go Edom ywy ekowerã itakui prechã endy nonga. 10 Uwellãwerã chawãmbu emi kreybu, go rãwẽ endarã puãwerã tachĩ; go rãwẽ ĩmbechewerãma, go rãwẽ wachallãwerãma go rupi. 11 Pra woga rekowerã godji go kuyra rokopurã, emi go guĩ’ĩ wachu, go kra'a emi go teydjã wywy ekõwerã gope emi Jaweh kruru romara bue buchã emi go ywy ĩmbechewerã. 12 Ymachidjagi wywy preawollãwerãma go ymachidjagipe, emi ymachidja wechãllãwerãma. 13 Tapy wachu emi tapy ywa puku chidjagi go embe rupi puãwerã kueity, pyno emi kueity ekõwã eira emi bewyra eity llapo emi gope dja eityrã. 14 Go mymba prãndjã ka wachu puagi, dorowerã begi teychegidji, go andjãwe wywy doroma dja pichape; emi andjãwe wywy gope ingatuwã dja picha wywydji. 15 Gope eity llaporã kra'a pia'a mombowã, gope owowerã dja tey wywy emi rekowerã krey chapillãpe; gope rekowerã emi petã wywy dja brekodji wywy. 16 Kuara ga reko Jaweh djawu gatu, emi pendje wechãwerã gope ĩllãngi dja brekodji ekõllãngi: idja djawuwegi nonga ekõwã, go gua'a gatu djonowerã gogi wywype. 17 Go idja yty roma go bue matãwerãngi, go ipo bowo roma gogi wywype krey krãmpĩ pewe emi ekõwã krãmpĩ kre'y wywype dja ekõandype emi idja llapoeche.