Djawupuku 33

1 Llu! Maty dje djvei wachu meandygi dje ekõgatu kura, dje narõdjawe ekõgatu djepe ekõwerã vyche krey djapipapyrangi idjarõ djapi pyrã emi, go narõãregi narõwerã wyche emi 2 Ore chinga djeky gami, ore Jaweh djedji ore kuagatu, djerõ ore djywa chidja meandy kuê upawu gobu ore matãmarã djawa okryra llambu ekõmbu 3 Go ekoãndu ore paroaty kadjãmbawerã dje puãmbu wenduwerã chono pambubu. 4 Gobu pendje noãwerã pendje japorã, beky noã nonga go prawogi idja llapo pendje biri ga mondo llabu go beky opo nonga idja uwãdji 5 Jaweh neina Wachu, go ekuandy ywadji go embewerã Siompe djapowerã emi pepywerã idja bue gatu rupi. 6 Go kreybu îwerã kua'a gatu iwerã okryra gatu, go krymballã rekorekogi Jaweh rõ Sion idja llaporã. 7 Maî gatu ga reko, krymballãechegi gua'a ekuandy rupi go djawu rawerãgi chingawerã puka omatãwerã okryra gatudji. 8 Go ape wata ekõandu rupi djueiwerã, illãma watatygi gope, pyrombama idja djawu mewedji, biri buchã idja ekuandype. 9 Llãmbechema go ywy chinga rywywerã go ekuandy, Libano kagatu chã wychowerã emi piandjawerã, Saron djo’õ gorawê endarã ywy prendy nonga Basan emi Carmélpe kachidjapawarê 10 Kowebu puãwerã, djawu Jaweh kawebu puãwerã. 11 Pendje brawowerã djorã piandja rupiwe, go wyra o'o piandja tãrã nonga pendje membywerã, pendje gua'a tata endy go kowe pendje kumbepawerã. 12 Go ekoãndy ekõwerã bue'e kui'i mendypyre nonga, go djupikã mondopyrẽ mendywã tatape. 13 Wendu, pendje rypy pua cho bita endawe, go pendje rypyllã pua kuã'a ga mondo cho chidjaeche. 14 Go djembigi ryrywerã Siompe, paropyre kuaillãware ka ekõ mudjallãngi endape. Awa rõ nandje irõndy go nonga tata uwellãpe watawerã? Awa rõ nandje irondy go nonga go tata endy uwebechewerã. 15 Go ekõwerã bue djapo gatu djãmpallãngi go djawuwe djãpaillã gatu, go buta kawãillãngi djapo djue bue'e buchã, ka chidja buãngi wywy ipo, pokollãwã buta ka membyregi go pechegi idja pycha wendullãwã broatygi djapo buchã, go cha'ã pechegi wechãillã wawã buẽ buchã. 16 Kowegi ekõwerã ekoãndy gatupe go tapy wywy djapowerã ita wachudji, bakupyre emi y'y kãndjãllãwerã. 17 Dje cha'ã wywy wechãwerã Ymachidjagirã wera gatu emi tapy ekoãndype naina owerã budjakrã. 18 Djawã djawu ga reko paropyre wachu go djawuwerã, Matyrõ go enda pire buãndygi? Maty rõ go Para endatygi puy buandygi? Maty rõ go enda go buãngi go tapy ywadji ĩngi ekoãndy ita prechãmbyre? 19 Wechãllãwerã go ekõandy ka chidja buaregipe dje wendullãwerãma idja djawu djuei buchã kuallãwã. 20 Siondji ga mãĩ, nandje bue'e pokollãndy endaty dje chã'ã wechãwerã Jerusalen ĩngatu endaty kbeigatu djepe emi tapy mymba pirewedjiwa eityllãwerã wyra mini papi akua wywy, mataillawerã emi ichã wywy ochollãwerã. 21 Kainallae gope Jaweh wechãmbyra nandjepe eche tywy nonga, gope y'y krampĩ mini emi neinangi, go rupi watallãwerã wyra kara emi watallãwerã wyra kara emi watallãwerã wyra kara wachu. 22 Jaweh go rõ nandje pepywã, gogi nandje djepyatygi, gogi nandje imachidja, gogi nandje kuwẽandygi. 23 Dje ichã wywy pychywerã wyra okãmbuku wyrakara wachu go pua go muchãngi tyru wewe wi'ima. Gorãwe gope go kreybu wewerã nandje byllandygi matãwerã idja bue'e tandygi, wata buchãngi rawerã emi idja llaporã. 24 Go rupiwa ekõandygi djawullãwerã: cho eche tuwa, go ekoãndy djapo buchãwe kuwẽmbamami.