Djawupuku 32

1 Mai ĩ ga reko, ekõma ymachidjaechegi djapãllã gatudji bue djapo gatu djãpãllã ymachidjagi wywy pepy gatuwerã kainallãpe. 2 Go kbe'e rõ peche nongawerã wytu buchãpe baky pambu wachu romambu; ywy werã noga y matã roma djo, go ita wachu krey bype werã gatupe. 3 Go chã'ã wywy mechãngi chãwãbechewerã pycha rekogi wendu gatuwerã. 4 chã'ã wywy mechãngi chawãbechewerã pycha rekogi wendu gatuwerã. 5 Go kreybu djawubechewerãma go bue buchã djapotygidji bue gatu djapollãwerã emi kainagipe djawullãwerã idjadji. 6 Go prãndjagi djembi reko djãwã kua'a reko djawu buchã Jawehpe go rõ me'ẽ djuellã bakupyre llellãngipe emi y'y me'ẽllã y'y tuku djuegipe. 7 Go ka djawugi idja llapo buchãndji ury; idja bita reko itywã djueipe ekõngipe, kowe bue'e djapo gatu djepe djapopyre. 8 Go djã'ã gatugi djawã djawuwerã bue gatudji, bua'ã reko djapo gatuwã. 9 Kudjã wywy chinga ruwyllñãgi bue'edji, buã'ã wywy wenduwã cho djawu! Pendje dare ymawangi pendjepe. 10 Wachã nondje etakrã membe pendje ryrypawerã ka yma buãdjiwa, chipopurã lla'a pechewe no'ãwa (kuychowegi). 11 Krymba gami, pendje okryrape buedji kuallãngi; chinga ruwy pendje yma bua'ãngi; wi'i pendje tyru wywy, matã mondo pypy tyru buchã wechãwã duwegi pendje uryllãndy. 12 Chinga ruwy gami go pendje (pane) cha'a buchã roma o pendje pechewegi lla'a emi chipopurã lla'a no'ambawã. 13 Kowe cho ekoãndy ywy we'ẽmbawerã kueity go a go ware go ury pendje ekoãndype kãndjawerã. 14 Tapy wachu endawe mondopyrã, go ekoãndy djawu bechema, emi tapy wachu ita pre chãmbyre. Wedja roma djo kuyraeity endarã tãrã ruy'y, emi bepurã dja'cha prandja ingatuwãpe, pendje mymba wywy uwerã go rupi. 15 Kawobechemi gua'a gatu ywadjiwa nandje llabuwa go djo'õ ĩmbechewerã gope mawẽmbu ĩwera ywytyrõ mbyre gatu pechewerã, go ywytyrõmbyre kbeigatudji ekõwerã ka'a gatu. 16 Gobu ĩwerã bue djapo gatu djampãllã, go ekoñdy krãmpĩechepe rõ djawu pepywerã. 17 Bue djapo gatu djampãllã we'ẽwerã emi krãpillãwerã okryra gatu, wapy emi krymballã. 18 Cho ekõandy djãwãpe ĩwerã okryra gatu cho irõndy ekoãndy tapy wywy okryra gatu krymba gatudji. 19 Kowe bue'e nõndje baky ã'ã wawerã kadji. Go Jerusalen ĩmbechewerã. 20 Gobu ury gatu gami peche gami y'y embedji, djura mondo pendje mymba achipurã chue'egi emi bepurã djorã gatupe.