1 Egipto puagi ywy llabuwaty wywy go kuwêllâwerã Apã Wachu nonga llu go kuaragi kuwêwadjiwa go Egiptope. Go kuareko bepurãndji emi bepurã llabu watygi emi wyrawata tãrãdji; go kua gatullã Israel rekuatygidji chidja gatugidji emi kuarallã idjape. 2 Idja rõ tõ gatu eruwã bue buchã, idja rõ djapowerã wyche dja inambawe. Idja rõ pachopawerã go djêmbigi dja kuwêandygidji go bue bucha djopotygipe. 3 Go Egipto pua rõ ywy llabuwaty go rõ Apã Wachullã, dja bepurã wywy rõ o'odjiwa, go rõ krei'illã Jahweh dja ipo upibu, wawerã go djembi buchãgi emi dja kuweãndygidji go mirõgi manomba owerã. 4 Jaweh inama chope kowe nonga: Go djuku teype krorõndy nonga, go dja rembia llabu, go wachupurã warõandy wywy noãmbabudjepe paro rekowã puka rekobu, myrõbechewerã, emi krymballã rekollãwerã bue pambu wachu rekobu, go nongawerã emi Jaweh chidjaechegi edjywerã go Sion pua kuã bukupe kuwêmbawã dja ekuandy puagi wywype. 5 Go kuyra wywy wewety nonga dja aity llabu kuwê rekowã dja memby wywype, go nonga emi Jaweh chidjaechegi peche rekowerã Jerusalempe kuwêwã emi dja ekuandy puagi wywype. 6 Pendje Israel irõndy wywy ka chidja buãwegi Apã Wachudji djewy ga bu emi dja endape. 7 Go kreype go ywy llabuwagi wywy djapîpawerã dja apã chã'ã nonga wywy, go djapopapyregi buta ita emi ita idju biri buchãdji go rõ ywy llabuwatygi ipo rupi djapopawe. 8 Gobu Asiria wawerã, wallãwerã go kbe'e pê akua buku rupi go etakrã manollãndygi pê akua puku rupi go rõ pychowerã idjape, Kãndjabawerã gogi wywy pêmbukupe pychollãwã dja kbuchuwe wywype rekowerã buepytygi wywy. 9 Ekuandy pua ymachidja wachugi krymballã rupi manombawerã emi dja ymachidjagi wywy paropyre wedjapawerã dja llapo tyru chepe mini upipyregi go nonga Jaweh inama, tata îma Siompe emi go tata djãwã krou îma Jerusalempe.