Djawupuku 30

1 Tuu, cho tay wywy chope wedjagi, ina pendje Jaweh, kuara rawe chi inandy, oma kuarawã duwe rekoatywa wywyjdi; ekõ rawe cho krei gatu ipope, ekõ djue duwe tapytãrã ipope, go nonga buchãwe roma dja bue buchã djapowe. 2 Chope wedja roma owã Egiptope, go prãndullã chope pukawã Faraon chidjadji idjape pechewã, emi kuadjue Faraon chidjadji. 3 Faraon rõ pendjepe kainawerã emi pendje ka kuawerã Egipto chidjadji pendje chã wychopawerã. 4 Pendje ymachidjagi wywy wẽmbudjepe Zoampe, emi pendje djawu ratygi wẽmbu djepe Anespe. 5 Bue djullãwerã, gope chã wychowerã emi kuwellãmbyre ekõwerã, djullãwerã gope kuwẽwã dja warõwe. 6 Pendje buepytygi djuei buchãpe wata ekõ go kuãmbuku Neguew rupi, gope ĩ djuku wywy, membo wywy emi membo wachu wewegi, go djuei buchãpe emi krymballãpe ĩ pendje llapo bepurã djacha emi bepurã wachu, go rama tãrã bue pepywã bue biri buchã, go tapytãrãpe. 7 Cho kainallã Egipto ka kuwẽ go buare cho ina Egiptodji: Go ekuandy gogi tãchĩwe go nonga kuwẽllãwerã go Rahab (Egipto) ka chidja buã'ã. 8 Go buare amaty kua kowebu para go chã ruwa etakrã ita chepegidji, emi etakrã kuachiape, gope ĩwã kuembu emi gorãwẽ. 9 Kowe ekuandy ka chidja chodji, dja tey wywy kaina, emi djawu wẽndudjuellã Jaweh djawu membyredji; 10 Gogi wywy ina dja ikẽ pou wechãndygipe (viviente): Wẽchãeme; ikẽ poudjiwa emi dja Apã Wachudjiwa djawuatygipe: djawu me eme orepe go bue kainallãndy, ina orepe bue ore uryma djiwa, kiu ga mondo kãinadjiwa; 11 rypydji ga ĩ Apã Wachu apedji, kuaeme idjape, matã mondo orepe go Israel Praru gatuechegi chã ruwa puare. 12 Go buare Israel Praru gatuechegi ina: Pendje wedjaware kowe djawu, emi pendje kua chidja reko prãndja djapotydji emi pendje kãwã reko bue wywydji; 13 kowe bue buchã ekõwerã pendje pua go trygõ pechepyre wapuku nonga ĩmbu emi owogi, emi wa bitallã roma nonga. 14 Dja rõ bowopawerã gogi wywype go mõ'õndji djapopyre djapotygi bowo nonga, go mõ'õndji djapopyre buchãmba wegidji ĩmbechema kbegatugi go bychepe djullãwerã etakrã djepe eruwã idja llabu tata wã'ãndy, emi nuẽwã dja djãwape y'y ikua pare. 15 Go nonga ina Jaweh nandje Rekoatygi. Go Israel Praru Gatuechegi pendje bue buchã djapopawe wedjambu emi pendje ekõmbu cho ẽndape, pendjepe kuwẽgatuwã, pendje ka chidja buãllãmbu emi pendje kua gatumbu chodji pendje chĩdjawerã. Go nonga pendje djapodjuellã, 16 pendje rõ ina: Go nongallã, ore kãndjãdjue bepurã tãkuã llabu, go buare bepurã tãkuã llabu ekõwerã go pendje kuere rupi lluãwãgi. 17 Etakrã djepe ekõgi djambu chidjawã, etakrã wachu pendje wywy byche pua kãdjãwerã, go ipo ekõgi djambu chidjawã pendje wywy kãdjãmbawerã, tãrãllã ĩ wyche pewe, go wyra etakrã puãmbyre nonga kuãmbuku llambu, go tyru chepe mini upipyre kuãmbuku ywallã nonga. 18 Go nangabu djepe Jaweh warõwerã pendje wywype chĩngadjeky rekowã, go puãwerã pendje wywype chĩngadjekywã, Jaweh rõ djawu djaka gatu emi go prawo gatu bue gatu djapogi go medjue ury gatu go idjadji kuatygipe. 19 Kainallãpe, pendje Sion tapy tãrã, go Jerusalen puagi, pendje gorãwẽ chĩngallãwerã, go pendjedji chĩngadjeky rekowerã emi go pendje pukabu emi idjape. 20 Go Jaweh membu djepe pendjepe go djueidjiwa wikytã, emi go okryrallãdjiwa y'y, go pendje kiuatygi wywy kãndjã kuallãwerãma, go pendje chãeche rupi pendje wechãwerã go pendje kiuatygi wywype. 21 Gobu pendje pycha wenduwerã, djawu go pendje pyche rekuaty inangi: kowegi rõ ape, go rupi ekõ; pendje upiaeme go pendje llu rekuaty, emi pendje upia oeme go pendje llachu rekuaty. 22 Go nongabu pendje rekowerã bue adju buchãngi nonga go pendje apã chã nonga djapopyregipe go djapopyregi ita idju emi go ita biri buchãngipe, go pendje djapiwerã go bue rekollãmbytygi nonga, pendje inawerã: Amaty kua kowepe ĩeme. 23 Go nongabu Jaweh buewerã baky go pendje bue ã pechewã, go pendje ywy bue lla wẽ gatupawerã pendje kra gatupawã go pendje mymba wywy djorã gatu u gatuwerã go djõ gatupe. 24 Dje achĩpurã chue emi go bepurã djacha wywy go dje tyrõ endapype tyrõandygi go tãrã uwerã bue ã'ã gatugi. 25 Go krey djukapawã wembu wawerã go tapy ywagi y wewopawerã go kuãmbuku llabu go dja apodjiwe dja akã pewe. 26 Go djachy bypewerã krey nonga, go krey chapi chidjaechewerã, djypetã chapi budjapyre nonga, go dja chapiwe nongallãwerãma, Jaweh buewerã dja ekuandy puagi wywype go dja pychopawe endawepe, emi kuwẽwerã gogi wywype go dja keita buchã go dja miwegi gogi wywyndji. 27 Maĩ gatu ga mondo, Jaweh rypyechendji ekõma, go dja chã mimbi gatu tata endy nonga, dja djurupe prandjã embe romami go dja kberepe ĩma tata kumbepawãngidjiwa. 28 Go dja gua'a y matã prandjã nonga go nandjepe ruwyma nandje rupy pewe, go wawawã ekuandy puagi wywype go bue wawapyty nonga go krãpĩmbawãngi; mimbewerã go ekuandy pua wywy djurudji go bepurã djuru djiwatygi, gogi wywype kabewãwã. 29 Pendje rõ pre rekowerã go paskuape chãwãmbu uryty nonga, emi pendje djã ury gatuwerã, go mimby wẽ nonga go Jaweh kuãmbukupe, go Israel Rekoatygi chidjaechegi endape. 30 Gobu Jaweh djapowerã wenduwã dja djawu chidja buchã go chono nonga, go djapowerã wechãmbyrã ywadjiwa chidjaeche rudjybu prandjã buchãndji go tata endy kumbepawãngi go wytukõ rupi, go baky ã'ã rupi. 31 Asiria ryrywerã Jaweh djawu wendubu chono wa nonga go idjape bro rekobu dja wyra minipe. 32 Go Jaweh pacho rekobu go dja pachoatygipe idjadji kuawã go parãma parãndygi emi wyraparã; emi idja tõmumbu rekokurã gogi wywype go chidja gatu ywadjiwatygi wywydji. 33 Nondjewema mĩmbyre go Asiria pua ymachdjagi puarã go dja endatygi djãwã puku mendypapyrãngi, emi chakã nuãmbyre wachu roma ĩ Jaweh mendywã go dja gua'a endygi rupi.