1 Llu Ariel! Llu Ariel! Go duwe chupa david endawe go ruy etakrã budjama ra, go kreype urywãdjiwa. 2 djuei buchãwerã Arielpe, go dja okryrallã buchãwerã emi chînga buchãwerã gobu dje ekõwerã cho puarã Ariel (Rekoatygi djuku nonga). 3 Tykõ pechepyre nonga djere rekowerã, tãrã toallãngi nuãwerã pechewã dje ruwa, emi puã minbyrã dje ekuãdy embe rupi tapy ywa puku tõ mumbudjima duwe ekuãndype tõ allãgi nuãmbyre puarã. 4 Gobu dje chã teychewerã, dje djawuwerã ywy djiwe dje djawu wêwerã ywy tãchî rupi: go dje djawu ywy djiwe wêwegi kreiwe djawu nongawerã, pendje djawu papîwerã ywy tãchî djiwe. 5 Go emi pendje byllãndygi tãrã buchãwerã, go ywy kui tãrã nonga, dja tô mumbuatygi wawerã go ekuandy llabu wyra o piãdjãwe wewewe nonga wytu rupi, gobu Apã Wachu bitallãwerã ekõwã dje kuwewã. 6 Jawehche rô ekõwerã dje endape cho chidja rupi, emi ywy ryry pambu wachu rupi, wytukã wytu chidjarupi,tata endy kumbe pawãgi rupi. 7 Go ekoãndy pua pechepawerã Ariel llabu djueipawã go tõ mumbu pua rekopytygidji go chãwãpe ikê pou nonga. 8 Idja rõ llellã nongawerã dja wechãmbu ikê pou nonga rupi dja bue ubu, gobu dja ikê upabu dja kra'ápe bue ĩllãiche wyche; go nonga y tyku djuegi nonga go wechãmbu dja ikê pou nonga rupi y tykubu, go ikêwe upabu eche praru y djuechedjiwa: gononga wêma go ekuandy wywy to mumubu Jerusalen kuã llabu. Go Israel rõ chãillã ka kbeigatu bua'ã. 9 Pendje meimbu bue wechãllãwerã, pendje ywadji meîmbu chaillãwerã, pendje ytata chã watawe nongawerã, ullãmbu dje chipopurã ty'y emi duwe bue chãwatagi. 10 Jaweh rõ awoma pendja llabu krei ikêpiydjiwa,go rõ pecheare pendje Apã Wachu djawu meãndygi cha'ã, (Profeta) go rõ tõllã nonga roma mondo, go pendjepe kiuatygi tõ'õ. 11 Kowebu wyche pendje ikê pou nonga rupi pendje ku bechewerãma, go rõ ka inawerã pendje puarã djawu parapyre pechepyty nonga. Go pendje membu djepe go parapyre pechepyregi go parapyre kua gatugipe go inawerã pendjepe: cho kuallã pendjepe go parapyre pechepyrerã rõ muchã gatupyre. 12 Go pendje membu go parapyre go etakrã parapyre kuallãngipe, go pendje inãmbu idjape: Djawu mondo Kowe, go inawerã: cho rõ Kiu kuallã. 13 Go buare Rekoatygi ina: go kowe chupa pua rõ wê rõmambu cho endape ka djawu gatu bua'ã dja djurupe, chodji kakuaá dja djurupe, dja dja'ãpe rõ rypr î chodji, go rõ Krymballã chodji go ywy llabuwa djawu mewe rupi. 14 Gobu cho wechã miwerã go kowe êkuandype dja werã bue wechãmbyrã go krymballãwã; go tõ gatugi:tõ gatullãwerã, emi ĩllãwã go tõ gatugi. 15 Llu! llu! go kãdjãgi; Jawehchã ruwa djemi djuegi go bue rekogi dja tõpe, go chãwãpe djapo dja djapoty nonga,gogi wywy ina: awa rõ orepe wechã, awa rõ orepe kua'a? 16 Pendje rõ tõllã, go nonga ku go mokara djapoatygi; go mokara inawerã ko go djapoaregipe: dje rõ chope djapollã. Inawerã ko go dja djapoaregipe: Go rõ bue kuallã. 17 Rypyllãma go Libanodji ekowã etakrã tyrõmbyre go bua lla gatugi, go tyrõmbyrepe rõ lla gatu go rõ ka gatu nonga. 18 Go krey rupi go pychellãngi wendu gatuwerã go djawu parapyredjiwa: go chãllãdji chawã rupi wechã gatuwerã. 19 Gobu praruwegi ury gatuwerã Jawehdji, emi go bue rekollãchegidjepe go ekoãndy bych epua ury gatuwerã edji, go Israel praru gatugidji. 20 Go pichape reko buchãngi krãmpîmbawerã, go ka chidja buãngi djueipawerã, emi pychopapyrã, go bue buchã djapo djuechegi. 21 Emi kabewã kaina urygi go tapy djãwã wachu ike lluãndype, djawu puy endatype, go kabewawã go djawu puyatygipe djawu gatu ga reko praru gatugidji mi buchãwã, gogi wywy emi manombawerã. 22 Go buare Jaweh kuwêwe emi Abrahampe, go nonga idja ina Israel Jacobo wywype: Kowebu Israel chã teychebechewerã, emi chã'ã wychollãwerãma. 23 Go Israel irõndy wywy kuabu cho ipo djapowerã kuarekowerã cho bykuapyredji go nainawerã Jacobo praru gatu, emi krymballãwerã Israel Apã Wachu djã gatugi. 24 Go Kowebu dja djãwãpe djapãngi, tõ gatuwerã emi go djawu buchãndygi kowebu kiu gatupawerã.