1 Lluaaa Efrain puatygi wywy, tapy tãrã ytata wechegi! Dje chidjaeche roma o ĩ buare kuambukupe emi bue ã pechewã ywy gatu buare! 2 Maipyry mondo! Jaweh puãma etakrã kbe'e chidjagi emi krymba gatuechegi go baky ã wytu chidja nonga, go wytukõ chidjagi nonga, go y pirã wachu nonga ywype. 3 Pychãndji pyrõmbawerã go Efrain pua ytata wechegi wywype; 4 Go tapy tãrã kachidjaeche buã ware go ĩwerã igo lla pywegi nonga, go krey aku buchã kreype, go duwegi wechãmbu, matãwerã emi uwerã. 5 Go kreype Jaweh chidjaechegidji kua gatu rekogi chidja gatuwerã go dja ekuãndy pua manollãwegi wywy puarã; go bue kbeigatuechegi nongawerã! 6 Mewerã ymachidja djawu bowoatygi wywype krei'i djawu bowo gatuwã, emi mewerã chidja gatu tapy tãrã ikẽ lluãndy wãrõandygi wywype. 7 Pa'i wywy emi Apã Wachudjiwa djawuatygi wywy djepe djawu djãpãmbama chã watawedjiwa go ytata sidradji emi ytata chipopurãndji; go wywy kua gatu djuellãeche, emi ikẽ pou nonga wechãwegi; kua gatullãma chã watawedjiwa ytata chipopurãndji emi ytata sidradji. 8 Go wyrachepe wywy rupi buẽ'ẽ embe romami emi adju buchã, ĩmbeche etakrã endaty adjullã gatugi! 9 Awape ko dje kiudjue? Awape ko bue wẽwã wywydjiwa kua gatuwã inawerã? Guei ore ko krumi kã tyku wedja pougi wywy nonga? 10 Go krumipe kiu rekoty nonga: ina ã-pã gobu ina apã, kowebu ina ei-i gobu ina ei'i go djawu pãpĩ ichakrã kowepe, duwe ichakrã amaty. 11 Go ekuãndy pua wywype djawuma duwe ekuãndy pua djawu nonga, go kbe'e djawu gatullãngi nonga! 12 Apã Wachu ina endawe: «Kowe rõ endaty bue djapollãwã; bue djapo tãrãngi guabu wapywã. Go rõ eche tuwagi chidja gatuwã endaty» Gogi wywy rõ wendudjuellã. 13 Go buare Jaweh inawerã emi: ina ã-pã gobu ina apã, kowebu ina ei-i gobu ina ei'i go djawu pãpĩ ichakrã kowepe, duwe ichakrã amaty, gogi wywy o emi wa pewe dja tãpĩ rekuaty, go dja ikã upẽ pewe, emi kãwãmba emi ra'apa pewe buepytygi reko buchãwãpe. 14 Pendje wendu gatu gami Jaweh djawudji pedje ymachidja wywy pendje rõ djudja reko Jerusalem pua wywype chã teychellãwã. 15 Pendje ina endawe: ore djõ etakiãechema go manowegidji, go manowe llambatygidji ore mema djawu djapoechewãngi mawebu wembu go pachowã, go wytu chidjaeche nonga orepe ruwybechewerã ore rõ prawoma kaina orepe peche rekowã go kabewã rupi djemi ekuawãpe. 16 Go buare Jaweh pendje Rekoatygi kowe nonga inama: Kua gatu gami cho djonoma Siompe ita tapy wachu apo nongawã, ita wachu prawopyregi biri buchãdjiware go tapy wachu kamby wallãwãdjiwagi go kua gatugi rō idjadji gope idjadji chã teychellãwerã. 17 Bue djapo gatu rōiwerã tapy djapoaty ichã buwy gatugi nonga go mi gatuwangi rō ichãndjiwa puygi nonga; go baky ã'ã rō peipawã kaina llambatygi go y wewo matãmbawerã go kadjã puaregi. 18 Go pendje doroaty rō djawu membyre djapōechewãngi krãpiwerã. Go djawu pendje membyregi go manombyre llãmbatygipe, gope kaiwerã go wēmbu pachowã go wytu chidjaeche nonga pendjepe djapipawã emi pendjepe krãpī mandopapyrã. 19 Go nonga wēmbu go nonga mirōrã pendepe pychywerã, wachawerã koēmbu wywy. Koēmbu emi chawãmbu pendje wendubu go nonga mirōrã pendje krymballãwerãma. 20 Go ike llãmbatygi nainallãdjiwa iñawerã go chepe gatullãwerã idjadji, go tyru pecheatygi rō tyru mini go rō peche gatullãwerã idjape. 21 Jaweh pendjepe kuwēwerã idja djapowe nonga Perasim kuãmbukupe Gibeon kuãmbuku wywy pewo rupi prãndjãwe nonga idja prãndjãwerã emi idja djapowã idja djapotygi nonga, djapopyre ache kuallãngi emi go djawu wendullãwegi. 22 Kowebu ka djudja uryeme go nongallawã go pendjepe muchãndype pendjepe birillãwã; cho wenduma Jaweh chidjaechegi ina edawe: cho pacho wachuwã ēkowerã kowe ywy llabu. 23 Wendu pyry ga mondo, wendu gumi cho djawu. Wendu gami go cho inawerãgi pendjepe. 24 Go ywy bowoatygi bue ã pechewã ywy bowollãwerãma gorawē, emi go mi gatupabu ywy kmambu buchã wywy kmambullãwerãma go rawē. 25 Go nonga go kmambu gatupabu idja ywydji djapipawerã eneldo ã'ã pechema comino, prechãma mondo go trigo mima dja endarãpe go cebada emi avena go idja tyrōandygi embe djawē. 26 Apã Wachu rō kiu rekoty idjape kiu reko idjape tō gatuechepe. 27 Go eneldo ã'ã rō wollãmbyty, go bue ã'ã bowoatygipe, go comino ã'ã llabu rō wachallã wyra wata pychã go eneldo rō pachopyty wyra lly'y wachugipe. Go comino rō wyra lly'y minipe. 28 Go woupyrãgi pechepyregi woullãwerã gorawē kreybu wywy. Kuillãwerã emi bowollãwerãma gorãwe kreybu wywy puarã.