Djawupuku 3

1 Pendje maĩ pyrygamondo, Jaweh go nandje Rekoaty chidjaechegi matãwerã go Judad pua emi go Jerusalen pua, go dja bue rekogi wywy, dja wukytã, bue upyrãngi wywy, emi bue tykupyrãngi wywy. 2 Matãwerã emi go krymbaechegipe, dja tốallãngi wywy, dja djawu bowoatygi wywy, dja Apã Wachudjiwa djawuatygi wywy go kua gatugi, emi go chuepurãngi wywy; 3 emi matãwerã go tõallã ymachidjagipe, go ipotapa tõallãngidjiwa, emi go kiuatygi wywype, emi go bue djapo kua gatugi wywype, emi go krei buchã rupi djapotygi wywype. 4 Gogi wywy llabu djonowerã kbuchuwe dja ymachidjagirã, emi go kbuchuwe djawu wendullãngi ymachidjã rekowerã gogi wywy llabu. 5 Go ekuandy pua wywy edjia chidja buãmbawerã, go picha wywy edji bybechewerã, kbuchuwe wywy byllã rekowerã go chuepurãngi wywydji, emi go bue rekollãngi wywy ka chidja buãwerã. 6 Go duwe etakrãngi pychywerã go dja pawe tywypurãngi ipodji, go dja apã tapy puagi, inawerã idjape, dje tyru gatu wyche, dje ekõ ga mondo ore ymachidjagirã, dje pychy mondo kowe buchãmbawegimi gatuwã. 7 Go rõ inamerã krigipe: Cho ĩllãwerã go pendje kuwẽwãngi, Cho tapype cho rekollã wikytã, emi tyru go cho pypywãngi, go buare chope mĩeme go ekuandy pua ymachidjagi. 8 Jerusalempe ityma go Juda wama, go dja djawu emi go dja bue buchãdjapo rupi, go ka chidja buã buare Jawehdji emi go dja bype gatudji. 9 Gogi wywy ekõ buchã rupi wechãma, go Sodoma pua nonga bue buchã djapo reko, go krymbaechema. Lluu, lluu, gogi wywy djãwã nuã reko bue buchã idjadjiwarã. 10 Pendje ina go djã gatugipe wẽ gatuwerã, go dja bue gatu djapowedjiwa rõ llawerã go djiware dja urekowerã. 11 Lluu, lluu, go djãbuchãngi djueipe endarã, go dja ipo djapo buchãmbawedjiwa idjape pepywerã. 12 Kbuchuwe reko buchã cho ekuandy puagi wywype, kudjã wywy chidjape reko cho ekuandy puagipe. Dje cho ekuandy, go djepe kuwẽngi rõ djepe kabewã reko, gogi wywy tywã roma mondo go dje ape gatu. 13 Jaweh puãma djawu puywã ekuandy wywype puã ĩ mi buchãwã go chupa wywype. 14 Jaweh ekõma djawu puywã go chuegi wywype emi go ymachidjagi wywype, pendje wywy rõ krãpĩmbare gogi wywy chipopurã go pendje embepa romami pendje tapype go pendje matãmbawegi go bue rekollãngi wywy llapo. 15 Buerã pendje pyrõmbacherã go cho ekuandy puagi wywype pendje chĩngadjeky rekollãdji go bue rekollãngi wywype, go kowe djawu rõ Rekoatygi inawe go Jaweh chidjaechegi Jerusalem pua kudjã wywypepachopawerã. 16 Jaweh inama emi: Go Israel tey kudjã wywy ka chidja buã go dja tõ upima maĩ chã premowã go djapoma wechãmbyrã ache kuera ury, emi dja pychã wywy pambu ury. 17 Go buare, rekoatygi go Sion tey kudjã wywype tõ a’a kichipawerã, go Jaweh matãwerã go dja tõ llabuwa pecheatygi dja chã taychewã. 18 Go krey gogipe Jaweh matãmbawerã gogi wywy llapo go bue gatugi wywy pychãdjiwatygi, uwadjiwatygi, emi rupy djiwatygi: 19 Dja nambibeta, emi go bue kbegatu dja djywadjiwatygi, emi matãwerã tyra kryrãllã go dja chã pecheatygi, 20 emi go dja tyru kbegatugi, go dja tõ a’a djiwatygi, emi go dja bue teiwu gatu endatygi emi go dja rupydjiwatygi, 21 Go beta dja pytadjiwatygi, 22 Matãwerã emi go dja tyru biri buchãngi, emi go dja tyru mini rupydjiwatygi, emi go dja tyru chepe wachu kbegatugi. 23 Emi go dja chã maĩndygi, go dja tyru biri buchãngi, emi go tyrurã kryrallã dja tõ djiwatygi kbegatugi. 24 Go teiwugatu endawepe ine buchãmbawerã, go krytadjiwatygi pepy ĩwerã go pachoatygi, achĩpurã piredjiwa djapopyregi, go tõ a’a gatu pepy tõ allã djonowerã; go tyru biri buchangi pypy rawe pypywerã tyru buchãngipe, go kudjã chã gatu pepy ĩwerã pika bowo papyre nonga. 25 Go dje kbe’e wywy manombawerã pẽmbukupe, go dje tõmumbuaty krymbaechegi manombawerã tõmumbupe. 26 Tapy djãwã ikẽ lluãndy wywy rupi, gogi wywynuã reko endawepe, chĩnga ruwypawerã emi go tyru buchã ochowe pypywerã, emi dja etakrãpẽ wapy ĩwerã go krãweginonga go ywy huipe.