Djawupuku 2 Apã Wachu ymachidja ĩwerãndjiwa

1 Isaias go Amos teygi ĩkẽ pou nonga wechãwe bue wẽwãndjiwa Judape emi Jerusalepe: 2 Go krey krãpĩbu Jaweh tapy ĩwẽrã kuãmbuku wywy tõ'õrã; go rõ chidja gatu ĩwerã go kuambuku wywydji, go rekuaty ekõmbawerã duwe ekuandy puagi wywy. 3 Tãrã duwe chupa pua wywy ekõwerã emi inawerã: Kuãty ga bu, nandje owerã Jaweh kuãmbukupe, Jakob Apã Wachu tapype! Idja nandjepe kiuwerã nandje watawã dja ape wywy rupi, nandje wata owerã dja ape rupi. Guei go Siompe mewẽrã djawu membyre, go Jerusalepe Jaweh djawu ĩwerã. 4 Idja djawu bowo gatupawerã go duwe ekuandy puagi wywydji, djawu puy mewẽrã go chupa puagi wywype. Gogi wywy djapẽ pukudji djapopawerã ywy tyrõandygi, go djãmpedji djapowerã pẽ puku chapa. Go ekuandy pua wywy pẽ puku upiechewerã duwe ekuandy puagi wywydji, emi buãbechewerã bue bitaty tõmumbuwãngidjiwa.» Apã Wachu mi buchãwãndjiwa djã buchãngi wywype. 5 Kuãty ga bu, Jakob tapy puagi wywy; nandje wata ga mondo Jaweh bype gatu rupi. 6 Cho kainallã inambu dje ytyma go dje ekuandype, go Jakob tapy puagi wywy, pendje djapo uryma reko go krey wẽ llachu rekuatywagi djapo rekoty nonga; go krei buchã rupi kuagi bue wẽwã go Filisteo pua buãndy nonga, emi djawu mema djawu djapoechewãngi duwe ekuandy puagi wywydji. 7 Dja chupape embeche roma mondo ita buta idju emi ita biribuchã, go dja biribuchãngi wywy rõ krãpĩbeche. Dja ekuandype embe roma ĩ bepurã wywy, emi bepurã wyra wata wywy rõ kuabeche mawe nonga ĩ. 8 Dja ekuandype embeche roma ĩ chã nonga djapopapyregi wywy; kmarama reko pendje ipoeche rupi bue djapowegi chã ruwa, go nondje pendje pãkã rupi djapowegidji! 9 Kbe'e wywy chã wychopama; ache wywy chidja rekollãma. Go buare, kuwẽme! 10 Ikẽ kua ita djãwãmpe! Ywy ikuape djẽmĩ kua, go krymballãmbytygi Jaweh go dja ymachidja chidja gatuechegi chã ruwa! 11 Go kreype kachidja buãngi wywy chã wychopawerã, emi djã buchãngi wywy chidja rekollãwerã; Jaweh etakrãechepe rõ go kreype pre reko gatuwerã! 12 Jaweh chidjaechegi ekốwãdjiwa krey ekốwerã go kachidja buãngi emi kua rekogi dja chidja gatu duwegi wywydji, go naina wachu buãngi wywy llabu, gogi wywy chidja rekollãwerã; 13 go Libano pua chingy puku wachu emi ywaeche wywy llabu; emi Basan pua wyra naina wachu llabu; 14 go ita kuãmbuku wywy llabu; go kuãmbuku ywaeche llabu; 15 go tapy ywa ywaeche wywy emi go tykõ mamambyre kryra wachu wywy llabu; 16 go wyra kara naina wachugi Tarsis pua wywy emi go bue wechãmbyrã kbeigatuechegi wywy llabu. 17 Go ache kuagi dja chidja gatu duwegi wywydji chã wychopawerã, go kachidja buãngi wywy chidja rekollãwerã; Jaweh etakrãeche go kreype chidja gatu rekowerã! 18 Go chã nonga djapopapyregi wywy krãmpĩmba mondowerã. 19 Go inambu pachowã ywype, ache wywy ĩkẽmba owerã ita djãwãpe emi ywy ikuape, go djẽmĩ owã krymballãmbytygi Jaweh go ymachidja chidja gatugi chã ruwa. 20 Go kreype ache wywy djapipawerã budja wywy endatype emi bupi wywy endatype dja apã nonga chã djapopyregi wywy ita idju wywydji emi ita biribuchã wywydji, go djapopyregi dja kmarã rekowãngi. 21 Go pachowãmbu ywype ache ikẽ owerã ita pewo rupi emi ita djãwã rupi, go krymballãmbytygi Jaweh go ymachidja chidja gatugi chã ruwa. 22 Kua gatu rekoeme ache wywydji, go pyta rupi wẽ manollãwã. Gogi ko chidja gatu reko?