Djawupuku 1 Israel wẽma djã achetygídjí

1 Kowe bue Apã Wachu kiuma ike pou nonga rupi Isaias, Amos teype, Juda emi Jerusalendji, go krey ymachidja ĩ buare Uzias, Jotam, Acaz emi Ezequias, Juda pua ymachidja wachugi wywy. 2 Ywadjiwagi wywy wendu gami emi ywy llabuwagi wywy wendu pyry gami Jaweh djawudji: cho ymambama mondo dja tey wywype emi bue gatu tãrã cho djapoma gogi wywype, go nongabu djepe cho djawu wendu djuellã. 3 Go achipurã wyra wata matãndygi kua gatu dja rekoatygipe, go bepurã djacha kua gatu maty rõ dja rekoatygi we wywy llambaty Israel go nongallã idja kwollã dja rekoatygiape, go cho ekuandy pua wywy bue kua djuellãma. 4 Tuu pendje buchã djapoatygi wywy, go ekuandy pya tãrãma ĩ djembi buchãgi, go wywy djembi buchãgi irõndy wywy dja tey wywy bue buchã djapo uchãechegi. Gogi wywy mudjallãma pendje Jawehpe gogi wywy wedjama go Israel rekoatygi praru gatuechegipe djewypama o dja etoawe rekuaty. 5 Buerã pendje eche me'e pacho rekowã wyche, pendje ka chidja buãmbu chodji. Pendje tõ achypama, emi pendje djã achypama. 6 Pendje pychãdjiwe pendje tõ pewe illãeche achyllã, eche purã, emi pachopyre, eche chou'u, illã pendje achy kuwewãgi emi pendje echedji bue djuwãllã emi bue tapiape pendjepe piyllã. 7 Pendje ywype bue illãmbama, pendje chã ruwa pendje tapy tãrã mendypama, go duwe ekuandy pua upama pendje llapo wyra lla'a wywy, emi djueipama mando pendje llapo ywy. 8 Go Sion kbeigatuwegi ima go chipopurã pechepyrape, go tapy mini bue djami endaty nonga, go tapymini djorã o'odji djapopyre nonga, emi tapy tãrã dja byllãndygi mamambyre nonga. 9 Go Jaweh chidja gatuechegi wedjãllã rawebu tãrãllã djepe nandje rõ go Sodoma emi Gomorra puatygi nonga rawe. 10 Ymachidja wachugi tey wywy Sodoma puagi, wendu gami Jaweh djawu; wendu pyry gami pendje Gomorra puatygi ore Apã Wachu, djawu djapopyrãgi. 11 Buerã ko kbegatu werã pendje we keĩmbyre tãrã cho puarã, go nonga inama pendje Jaweh. Go wachupurã chuepurã wywy, pendje mendypawegi we keimbyre nonga, pendje llapo we kyrawedji cho wechã djuellãma cho uryllãma achipurã memby beipurã, wachupurã emi bechepe chuepura pirãwe wywy membu chope 12 Awa rõ go pukaregi pendje djapowã pendje ipo puare emi awa rõ prawo pendje ekốwã cho endape, pendje ka pyrõmbawã go cho tapy wachu toka rupi. 13 Erueme chope pendje llapo we keĩmbyre, pendje ka kbegatu buãndji, pendje llapo bue teiwu gatu wechãmbu cho prandjama, pendje krey emi djachy pou go krey bue djapollãndy, cho wechã djuellã. 14 Pendje djachy pou emi pendje ury wachu endaty krey, cho dja'a ury gatullã, go nonga buechãeche cho puarã cho wechã djuellãma cho chidjawã kowe buedji. 15 Pendje ipo upibu krandobuãwã, cho wendu llãwerã pendje krandobuãmbu, pendje tãrã krandobuãmbu djepe, cho wendubechewerã, pendje ipo pirã wywy picha pirãwedji. 16 Pendje y kuchĩ gami adjullã gaĩ, matã mondo cho chã ruwa pendje djapopawe bue buchã, djapoeme kowebu bue buchã. 17 Bewã kowebu buã gami bue gatu djapowã, Bewã kowebu djawu puy wachu djapo gami, emi kuwe gami go djuei buchã puatygipe, emi kuwe gami krãwegi wywype, emi kuwe gami prowegi wywype. 18 Gobu ekõ gami, inama pendje Jaweh, gope nandje djawu puy wachuwerã emi pendje bua buchã djapobu djepe, go tyru pira nonga, idju mondowerã baky eiwi pya rupi go pirãbu go púrpura nonga (tyru pirãeche), idju gatu mondowerã go wachupurã a'a idju nonga. 19 Djawu wendu djuebu, pendje upawerã wyra lla'a gatu. 20 Pendje djawu wendu djuellãmba emi pendje go rawe pendje chidja buãmba Apã Wachudji, pendje pychopawarã pe buku rupi, pendje Jaweh inama kowe bue'e pendje kuawã kiupyre 21 Mawe nonga rupi dje Jerusalen dje wedjama kua gatu rekoty, dje kowebu ĩma kudja bue buchã djapotygi nonga. Jerusalenpe tãrã ĩ endawe bue gatu djapowã, gope rõ bue gatu djapowã endawe, kowebu gope ima picha broatygi. 22 Dje llapo ita idju biri buchã kbegaitullãma, dje llapo chipopurã ty'y ydji budjapama. 23 Dje ymachidjagi wywy wedjama bue gatu djapowã, narõgi nonga roma djo, duwegi wywy buta matã reko djemipe, emi warõ reko bue membyrãdji, krãwegipe bue kuwellã, emi bue gatu djapollã prowegi wywype. 24 Go buare, inama pendje Jaweh chidja gatuechegi go rekoatygi, go ymachidja gatugi Israel ekuandype: tuu cho ury gatuwerã cho by llãndygidji, cho pepyma mondo go bue buchã djapowedjiwa. 25 Cho ipope cho pachowerã djepe, cho kuchiwerã dje dja'a, dje bue adju buchã rekollãwa, cho matãmbawerã dje djawã pua adju buchã. 26 Go bue bowaty endawegi wywy cho eru werã wycha go djepe bue kiu gatuwã go nondjeware nonga, gobu emi dje bykuawerã wyche: Go tapy tãrã bue gatu djapowã iwerã emi gope bue djapãllãndygi llãmbarã. 27 Go pacho rupi kuchi werã Sion, go kua gatu rekotygi Apã Wachudji kuwembyrã djapo gatu rupi. 28 Go ka chidja buãgi Jawehdji go dja bue buchã rupi, ĩ gatullãwerã go Apã Wachu kuere wedjagi krapipa mondo werã. 29 Pendje chãteychewerã emi mudjã buore go wyra wachu go wyra lla'a pechepyre pendje prawo endawedji. 30 Pendje iwerã go wyra encina o'o piadjawe nonga, emi go wyra wywy y rekollãgi 31 Go ymachidja gatugi rõ go djorã piadjawe nonga, go dja bue djapopawe rõ tata priri nonga, go mirõgi rõ endywerã ĩllãwerã go wywype buwewãgi.