Djawupuku 26

1 Go kreybu prewerã kowe pre'e Juda chupape: Nandje reko chupa chidja gatugi; Apã Wachu orepe kuwewa puawã mirõ tapy djere mamabyre. 2 Peka gami tapy ikē lluandy etrakrã ikewã chupa djã gatugi go kua gatugi. 3 Dje mema okryra gatu gogi wywype okryra gatu rupi kua gatuwã djepe. 4 Pendje mudjã ga mondo Apã Wachupe gorawë, nandje apã che, emi nandje rekuatygi rõ nandje kuwë gatueche 5 Dja rõ djapiare ekongi tapy ywadji, chã teychewerã go chupa Ka chidjagi. Gogipe yty roma ywyechepe. 6 Go uryllãwegi biripawerã gogi wywype. go bue rekollãngi pyrõmbawerã gogi wywype emi 7 Adjullã gatugi ape buwy gatu, Apã Wachu mi gatu ape idyadji kuagi puarã. 8 Ore warõ reko rekuatygi orepe wata gatuwã. ore wataty ape dje bue djapo gatu rupi; ore dja'ã ywe djedji kuawã emi djepe pre rekowã. 9 Cho dja'ãichedji cho kua reko chãwãmbu go krei gatu ekôngi cho dja'ãpe ekô djue djedji, go ware cho puama kuë nondje djedji cho ekõwã. ywy llabuwa wendubu dje djawu membyre kua gatuwe rã ekõ gatuwã edji wywy. 10 Dje chinga djeky djepe go djêmbigipe, idja ekõ djuellã djãmpãllãpe dje ipope; etakrã chupape imbu djepe djampãllãdjiwa gogi wywy prawo bue buchã; go ware gogi wywy wechãllãwerã rekoatygi chdja gatu. 11 Jaweh, dje pou djepe dje ipo gogi wywy kuwewã, gogi wywy kuallâ; go krãmpîpe kuawerã dja chã teychewã. Dje tãreko dje chupadji dje prãndjã kuichopa ga mondo djedji ka chidjagi. 12 Jaweh, dje orepe djã okryra gatuma, dje rupi rõ ore djapopawe wê gatupama. 13 Jaweh, nanje rekoatygi, duwegidji ore mudjawe; kowebu ore kuama djepe. 14 Go ka chidja buare djedji manowerã wêbechewêrã, go buare dje pachoma djueipama gogi wywype, kuabechewerãma gogi wywydyi. 15 Tãrã gami tãrã ga go chupa pua, neina wachu ga mondo krãpî pua wywy go wechãwã dje chidja gatu. 16 Jaweh, djueiperoma ore ekô dje pacho buare, ore kuara djepe emi ore krandobuã reko. 17 Tuê puka etakrã kudjã membywã nongã, go nonga ore ekõ dje chã ruwa, Jaweh. 18 Brawo wachu nonga, ore eiwi ekõ membywã nonga, ore memby rõ wytueche, ore kuwê kuallã kowe chupa ore djapo kuallã embewã kowe chupa emi tãrãwã ywy llabuwa. 19 Go kuagatugi djedji manõmbu djepe wewerã wyche, dja ikãwe wywy puawerã, pua ga mondo prewã, penje ywy llobu êkongi, dje chapywe kuwêma gogi wywype go yvy mewerã manowegipe. 20 O ga mondo, dje djo chupa, ikê kua dje tapy djawãpe pendje ga mondo dje tapity; kanda, kandja bitaeme, wachapa pewe djuei wachu. 21 gatu ga mondo, Jaweh wêwerã dja ekõandype pachopawã ywy llabuwa wywype ka chidja buare idjadji bue buchã djapodjiwa go ywydji wechã pirã kawopyre gogi wywy llabu. Go djemi bechewerã go djukapyrepe.