Djawupuku 25

1 Jaweh, dje rõ ore Apã Wachu: cho prewerã emi cho pre gatuwerã dje bykuapyre; dje djapove kbegatu; nondjewe rõ dje kiupawe roma dje kainallaéche. 2 Go chupadji rõ dje djapowe ita nuãmbyre wachu nonga go tapy īmbeche roma dje ytypa roma chupa duwe rekuatywa tapy wachu, duwe gi wywy puãbechewerã. 3 Go buare etakrã chupa wachu ury gatu djepe mewerã emi chupa wachuechegi krymballãwerã djedji. 4 Dje kuwẽware prarugipe emi dje djepy reko go djã achygipe dje ekõ buare kywẽmbytygi nonga; baky wachu emi krey aku buchãmbu; go prãndjãgi chidja krãmpĩwerã, go baky krapī nonga go djugi ita puambyredji. 5 Go krey aku nonga ywy llabu; dje djapãma djawullã go chupa para urygi, go chidjagi dje chã ruwa, go krey aku praru nonga bakyrei llabu dje prarumiwerã prãndjagi wywype prellambatydjiwa. 6 Kowe ita puambyre llabu Jaweh chidjaecheagi ka'atygi mimbawerã tapy tãrã buchãngi, bakupyre ubu chipopurã ty gatuechegi; we o kyra chipopurã ty prawopyregi emi. 7 Gogi ruwawerã go ita puambyrepe go tyru kryrellã kuwēwã irõndy wywydji, go tyru puku pechewera: go chupa pua wywype. 8 Nandje rekoatygi Jaweh buchãwerã mano krãpiwã, go rãwẽ idja nandje chã ty´y py´ywerã, idja matãwerã Israel chã teyche go ywy naina nonga. Go noga inawe pendje Apã Wachu. 9 Kowe kreybu djawuwerã: mei gatu ga reko, kowegi rõ ore Rekoatygi ore warõ reko orepe matawã ore dja achytygi, ore kua gatu ware; ury gatu ga reko emi pre ga reko go rõ nandje kuwēandygi. 10 Jaweh ipo kuwēwẽrã go kuambukugi llabu. Moabdji rõ pyrõmbawerã; pyrõwe nonga djorãdji emi go kui´i buchã endaty nonga. 11 Go ipo pouwerã go ytagi ype idja ipo pouwē nonga ytãwã. Nandje ãpaiche ytypawerã ywype go chidja buãgipe chã reko pieya emi buambabu djepe. 12 Nanje ãpaeche ytypawerã dje tapy mamambyre ruwa ywaechedjiwa ywy tachĩ nonga ĩwerã.