Djawupuku 24 Apã Wachu pacho pouwrã go ywy wachu nonga

1 Wechã gatu gami Apã Wachu bue buchã djapowerã go ywy llabuwa îngi, gobu djapipama duwe wywy rekuaty gobu emi diapiwera go djawã pua wywype. 2 Ekõwerã buewerã emi go ywy llabuwa îngi, emi djawu kiuatygi, gogi wywy wachawerã o achy gobu emi ymachidjagi, emi duwe djchepe pukabu dje llapo, me ga mondo idja llaporã. Duwe ache pedjepe pukabu me ga mondo idjape idja mewerã wyche emi djepe. 3 Go ywy mawebu wapawerã, goe nonga ekõwerã Apã wachu inawe nonga. 4 Go ywy bedjuma emi buchãmbãma, go rupi wacha o achyetema, go ywy wachu djãpãbãma emi go buare wacha o achyma emi ymachidja wachugi îngi ywy llabu. 5 Djãpãma go ywy wachu llabu, Apã wachu djawu membyre djapoechewagi gobu wata buchãma, krãpîllãngi go djawu membyre djapollãma. 6 Go nonga rupi ekõma buepyre djakabu pepy djapiwerã go ywy emi îngi go djãwãpe buchãwerã; gobu gogi wywy djãpãware, kowe djiwa go ywy llabuwa îngi tãrãllãma ache wywy. 7 Go chipo purã ty'y djapogyregi kadjãma, go chipo purã bedjuma djã'a o achyma go urywegi. 8 Krãmpibama mondo go djaka pãrãtygi gobu emi urygatu we krãpima ipu gatugi krãpĩ emi. 9 Ekõllãma pre'e gatupe go chipopurã, emi iro nonga wyche go uwãngipe puarã. 10 Go chupa djãpãmbama, emi go tapy puagi wywy pechepama, pechema ikellãwã. 11 Ga puka chidjama, îllã ware chipo purã ty'y go chupape, ga urywegi krãpĩma, go ury îllãma go ywy llabu. 12 Go chupa pua buchãbama, go tapywachu wama buchãpa puare. 13 Go chupa puagipe emi ekõwerã go ekowe nonga, olivo akã po'uwe nonga, go nua nonga go chipo purã krãpiwe nonga. 14 Gogi wywy puka chidjawerã go krey wa rekuaty wagi, pre'ewerã urygatupe Apã Wachupe idja rõ chidjaechedjiwa. 15 Go buare urygatu ga mê'ê Apã Wachupe go chupa krey wê rekuaty wagi gobu emi pendje îngi y wachu embepe, Puka gami Apã Wachupe, go Israel Rekoatygi bykuapyrepe. 16 Go ywy krampi pewe ore wenduwerã pre'e ury gatu me'ê Apã Wachupe, idja adjullã gatu ware, gobu cho ina llu: cho manowerã, mano bechewerãma go chope ekowerã, go narõngi bue buchã djapogi djâpã go djã'ã gatu. 17 Go ache wywype puarã î krymbyllã wachu wa'awerã go ywy ikua puku pekapyrepe. 18 Go buewerã kãndjãwegi djawu emi krymballã mewãgi wawerã ywy ikua puku pekapyrepe, go wê djuegi wawerã ikuape: Go ywadjiwa pekawerã gobu ywy ryrywerã. 19 Go ywy ryrywerã emi djekapawerã. 20 Go ywy wawawerã, go ytata wechegi nonga gobu wawerã tapy nonga, go ache wywy djã'ã buchã buare, wawerã ywy ikuape puallãwerã. 21 Ekõwerã go kreybu, Apã Wachu îngi ywadji, krãpĩwerã ywa gobu emi chupa ymachidjagipe, go ache wywy ga chidja buã'ãgi, idjape. 22 Gobu ache wywy tãrãwerã, go îngi nonga tapy djãwãllãpe , gope pechewerã gogi wywype go ywy ikua puku pekatygipe, go krey wachabu gogi wywy îma pachowã bue buchã djapotygipe. 23 Go djachy emi krey krãpiwerã go Jaweh chidjaechegi, idja ekõwerã go ymachidja wachu nonga go Jerusalempe, gobu djamogi wywy urugatuwerã.