Djawupuku 23

1 Odjawu memby- Tiro pua pendje Tygrõandygi Tarsis puaty wyra kara wachu chinga gatuikõ pendje chupa dje buchã werã, kowe Apã Wachu djawuwe djewa Wenduma chupa chipredjiwe. 2 djawuillã no nonga pendje ypurã embe rupi bue wywy Sidon pua butadji pepyatygi, pendje buetygi go pendje buepytygi wywype. 3 Iypurã wachu rypy eru bue lla minî Sijor puatygi Nilo pechepyre pendje buta tãrã duwe chupa rupi pepymee. 4 Chã wycho, Sidon ypurã Wachu inama: cho brawollãwerã cho membyllã cho ymaillãwerã kbuchuwe gobu daregi. 5 Egito pua wendubu buerõ ekõwegi Zirodji krymbaillã roma. 6 Amaty kua Tarsis pe pendje chinga ga ekõ pendje ypurã wachu embedjiwa. 7 Kowegi ko chupa urygatuechewe nondje buare myrombama duwe chupa budjakra rupi. 8 Awarõ tondji wê djapowã gononga Tirodji idja rõ mi djuegi ymachidjagi idja pepy meandygi ymachidja neina wywy. 9 Jaweh chidjaechegi inawe gononga ekõwã gobu chã wychowã ymachidja ka chidja buãngipe emi matawerã ymachidja wachupe go ywy llabuwapibu. 10 Peche gami Tarsis pua illãma. Duwe tapy idja nonga neinawachu wyrakara llambaty. 11 Go Rekoatygi idja ipo pou roma ypura wachu llabu, gobu krymbaillã roma go chupa puagi wywy Apã Wachu ina go chupa puagi chupa mamambyre Canan chupa krapîwerã. 12 Idja ina dje uryllãwerã dje Sidon radjy ndaregi dje ĩmbuchãngi puã nua Chiprepe gope ubudjepe dje djubechewerã okryrygra gatuwã. 13 Maĩ'ĩ Caldeo pua chupadji. Go chupa nondje ĩllãwe Asirio illã nonga wedja idja ywy wee wywy cho ĩllãwã Caldeo îllagi djapo tapy ywapuku idja chidjawerã Tirodji idja chupa mamambyre buchawerã. 14 Gorãwê chingawerã kara Wachu Tarsis pua pendje chupa chidjaechegi krãpima. 15 Duwe kreybu Tirodji kuallyambyrã djypetã tapa ruy go ymachidja wacha ekõmbuku nonga. Tirodji prewerã kujã ekombuchãgidji pre'e nonga. 16 Raa dje mbue parã amaty kua kujã ekobuchãgi nonga djedji kuaillãmbyrã: Go buare dje preegatuwerã go pre gatu djedji kuawã 17 Go Rekoatygi kuawerã wyche Tirodji djypetã tapa ruy'y Wachabu. Bue wywy pepywerã wyche buedji, gobu pendje djueiwerã kudjã ekombuchãgi nonga duwe chupa pua wywydjẽ Tyrõandygi llaporã idja kra gatuwã bue gatu pypywã. 18 Bue biribuchãngi go Rekoatygi puarã djonowerã. Duwe bue djonoillãwerã djonowera go Rekoatygi tyroandygi puarã. Godji idja kra gatuwã emi idja rekowã tyru gatu.