1 Djawu membyre: djõ puagi idja ikẽ poupe. Bue rã pendje parowe pendje opo roma tapy llabu. 2 Chupape tãrã ĩ, ka chidjagi djudja urygi chupa uryete, gope manongi rõ manollã rõ kichy pukudji picha pychollã. 3 Ymachidjagi go chupa puagi myrõ, bue rõ idja irõ ka chidjagi myrõdjuebu mudja roma pychollã rapape. 4 Go bue cho ina: wedja chope cho chinga endarãpe cho djã'ã achy pokoeme chope chodji chinga djekyeme cho djã'ã achyeche cho chupa puagi krãmpĩbabu. 5 Ekõma krey nandje ĩwã buchãpe, uryllãpe, Go Jaweh chidjaechegi djawu membyre djõ poupe kiupyre djõ puagi. Tapy ywadjiwa pachopa roma go chupa puagi puka omata wendu kuambukupe ekõwã djepywã idjape idja tapy pecheatygi pachopa roma. 6 Elam pua myrõ roma wacha arandji emi wyrawata idja bepuragi llabuwa wywydji. Kir eruma idja eche pecheatygi. 7 Pendje djo'õ kbeigatugi embewerã wyrakara bepurã matandy emi bepurã wywy embe wachuwerã tapy ikẽandygipe. 8 Wama Juda pecheatygi: Gobu Juda maĩ reko idja kaã rekuaty gope idja djemimbyrã tõ mumbuatygi llapo. 9 Mai ga David tapy pecheatygi mamambyregi tãrã buchã ĩ idja byllãndygi embe gami, y tãrã y'y endaty ywy puagi. 10 Mai ga Jerusalem tapy puagi, ĩllãngi matãmba mondo idja tapy mamambyregi mi gatuwã. 11 Wyro ga mondo ywy wachu mirõ tapy pewope y'y embe wachu rekowã Apã Wachu puarã: pendje ko kuallãeche nandje djapoaregi idja djono emi mingatupama nandje puarã. 12 Go buare Jaweh chidjaechegi pendje pukabu kowebu chinga mondo, o'oachy reko, pendje to'õ a'a kichimba ga mondo tyru buchã ga pypy. 13 Pendje ekõdjue urype, djuka achipurã emi wachupurã pendje urype u o'o emi chipopurã ty'y, gobu pendje ina: ekõ kowe rekuaty, Bakupyre uwã, emi tykuwã nandje manobechemi. 14 Go buare Jaweh chidjaechegi djawu chope cho pychape: Cho Apã wywype idja bue buchã djapowedjiwa go buare manowerã krãmpĩechepe ina Jaweh chidjaechegi. 15 Jaweh chidjaechegi, gononga ina chope: amaty kua Sedna rekuaty, go buta rekotygi, go ymachidja tapy kuwẽndji ina chope: 16 Bue rõ dje ĩ kowepe, awa rõ pendje tyrondy kowepe, dje wykodjue ko dje endarã kowe ita ikuape? 17 Wendu gatu dje rekoatygi idja chidja rupi dje djapipyrã budjakrãpe. 18 Idja dje papywerã ywydji dje djapipyrã duwe tapy budjakrãpe ĩngipe go pendje manowerã gope djapipyrã dje wyrawata bepurã matãndygi dje chidja meãndygi dje rõ kuwẽ buchã dje rekoatygi idja tapy dje ekõwerã chã'ã wychope. 19 Cho matawerã dje bitatygi cho mudjawerã djepe ymachidja tapy puare. 20 Go mawẽmbu krey cho pukawerã cho buepytygi Eliaqui, Hilcia tey'y. 21 Cho pypywerã dje tyruwe miwerã idja kra'ã muchãndygi miwerã ipodji kichi puku dje ymachidja rekotygi idja ekõwerã go puagi wywype idja Apãrã. Jerusalen emi Juda wywype. 22 Cho miwerã idja chy'ỹ David tapy pecheatygi idja Pekawerã tapy pechegi, duwegi rõ pekallãwerã, idja pechegi duwe pekallãwerã. 23 Cho miwerã idjape bueta pachopyrã nonga ĩwerã idja prawoechepyrã idja Apã wapy endawepe idja endarã. 24 Perupawerã idjadji Apã tapy puagi wywy idja tey wywy emi idja kmino wywy, emi idja baydja mini y'y tykutygi krombedjape wywy. 25 Go kreybu inawerã Jaweh chidjaechegi, go weta pachopyrã enda gatupe matambyrã: emi wawerã wapawerã idjadji ĩngi muchãwerã: go nonga ina Jaweh.