1 Egipto puarã djawu, maĩ gatu ga ekõ, Apã Wachu ekowerã bakyreidji, ikewã Egipto chupape go puagi apã chã nonga rekuaty idja chã ruwa, go Egipto djã'ã manombãwera. 2 Jueiwerã Egipto edji, djukawerã idja pawedji emi duwegi idja tutydji, chupa tõ mumbuwerã duwe chupadji, ekuandy tõ mumbuwerã duwe ekuandydji. 3 Egipto puagi chidjagi prarupama o, emi tongatugi krapîmbama. Kuarawerã idja krando buãwangi emi pukawerã bue buchãdji kuatygi idjadji pukawã. 4 Cho miwerã Egipto duwe Ymachidjigi prandjagi wydji emi duwe Ymachidjigi reko buchã werã, go nonga ina Apã Wachu Chidjaechegi. 5 Go ywachu krampĩwerã emi Nilo ypurã krampĩwerã emi. 6 Go ymatã inembawerã krapĩwerã y ĩngi Egiptope Wycha emi Kichi õ piandjãbawerã 7 Go djõ gatugi y djawe ĩngi, emi bue ã'ã pechepapyregi piandjãbama emi buchãbama. 8 Go pira matandygi rõ o achypa, emi o achy pira matandygi emi o achypa go gay'y momboptygi ywachupe. 9 Go bapugi icha prechã gatugiware ( Lino) begatugidji emi tyru djapogi buchãbawerã. 10 Gobu djueipawerã ymachidjagi wywy emi djueiwerã tyrõandygi wywy. 11 Go noga tõ buchã Soan Ymachidjagi wywy. Go Faraon Kiu'upawegi djapogatullã. Manonga inawerã Faraondji ore rõ tõ gatugi teywe. Go ymachidjagi djypyware irondywe. 12 Maty ĩ ko dje chuepurã tõ gatugi wywy? Kiu mondo Faraompe Apã Wachu inama buerõ djapowerã Egiptodji. 13 Tõ buchã roma Ymachidjagi ĩngi Soan puagi, Kabewã roma Ymachidjagi Menfis puagi; pa'i djawu Kiuatygi ra buchãma Egipto puagi ape buchã rupi. 14 Apã Wachu mema djuei buchã Egipto puagipe djãpãbawerã idja djapowedji go ytata brotygi watatygi nonga roma djo, We'êbu wama idja llabu. 15 Bue gatu wellãwerã Egipto llabu, go nonga tõ emi wa'á, wyra akã emi chipo, ymachidja emi buetygi wywy. 16 Go krey gobu kbe'e Egipto ĩwerã Kudjã nonga; Krymballã buchãwerã emi djã paro buchãwerã. Apã Wachu ipo upibu idja chã ruwa. 17 Go chupa Juda parowerã Egiptope, go Kbe'e wywy Krymballãmbawerã Judadji, Apã Wachu rõ djapowerã Egiptodji. 18 Go kreybu îwerã Egipto chupape ipo chupa djawugi Israel djawupe emi Kua gatugi Apã Wachupe go bykuawerã Ir-Heres (inambty) "krey chupa". 19 Go Krey gobu îwera Egipto bychepe Apã Wachupe pukawã miwerã ita wachu chupa djawê pukawã emi kua rekomã Apã Wachupe. 20 Egipto chupape ĩwerã wechambyrã, pukawerã ache wywy djueipe ekoandygi wywy, Apã Wachu mewerã ache wywype ymachidja djepy gatu rekowã. 21 Apã Wachu mimbyrã wechãmbyrã Egipto chupape gobu go Kreybu Egipto Kuawerã Apã Wachupe mimbyrã we'e kai endatygi idja chupape mewerã pechepyregi emi idja djawu mewerã, Apã Wachu djapowerã idja inambawegi wywy. 22 Apã Wachu pachowerã Egipto puagi wywype, gobu emi Kuwêwerã kuawerã emi Krandobuãma emi mudjãma emi Apã Wachupe. 23 Gobu go kreybu ĩwerã ape neima wachugi Egipto emi Asiria rekuaty. Go Asiria ikêwerã Egipto chupape emi Egipto ikêwerã Asiria chupape, gobu Egipto emi Asiria mudjãwerã Apã Wachupe. 24 Gobu go Kreybu Israel ĩngatuwerã Egipto emi Asiriadji go brewipychã ĩngatuwerã edji gobu ĩngatupawerã ywy krapî pewe. 25 Apã Wachu kuwêma ache wywype, ina, djepywerã Egipto rõ chupa, Asiria cho djapowe go Israel rõ cho llapoechegi.