1 Djawupyre Damascodjiwa, wendu gatu ga mondo ekuandy etrakrã illawerãma, ĩmbechewerãma gope. 2 Aroer ekuandy wywy imbe chewerãma gope achupurã tãrã endarã, gope ĩmbechewerãma awa rõ parowãgi. 3 Krapĩwerã Efrain emi Damasco ymachidja, Siria endawegi rõ chidjawerã Israel irõndy nonga ina Apã Javeh chidjaechegui. 4 Go kreybu Jakob ymachidja ĩmbechewerãma, uwewerã, go kyra wachu endawe geiparã roma djo. 5 Go bue ã'ã kui'i ã'ã kychipyrã nonga kawãgi kychiwãngi nonga. Go nonga emi Refaim kuãmbuku puagi nuãmbawerã bue ã'ã kui'i go nonga. 6 Etakrã endarã idja lly'ydji, go olivo wyra lla'a tomombyre nonga mirõ brewipychã wyra lla'a ĩwerã idja akãdji emi chengypychã emi ipo tãrã djepe duwegi wyra wywy ina Jaweh, Israel Apã Wachu. 7 Go krey gobu ywy llabu wa meĩwerã idjape djapoaregidji, go meĩwerã Israel ymachidja gatugidji. 8 Gobu meîllãwerãma dja keî'î endaty rekuaty dja ipo djapowegidji, go meĩbechewerãma dja ipo djapowegi, Asera chã'ã nonga djapopyregidji emi krey nonga djapopyregi. 9 Go kreybu wedjapawerã dja ekuãndygi chidjagi, emi Amor go Et pua puiwe nonga dja ekuandy ka bychepe go kuãbukudji, krymballã Israel puagi wywydji. 10 Dje kuallãma Apã Wachupe, djepe matãwe djuei wachu puare, dje kuallãma go ita wachu dje kuwêandygidji go buare dje bue gatu peche djepe, duwegi chipo purã te'y erudjepe duwegi rekuaty puare. 11 Go wyra yma gatudjepe o gatudjepe emi idja lla'a dje noa'ãbechewerã, go djuei buchã kreybu go achy tãrã buchã kreybu. 12 Go nonga, go nonga, tãrã duwe rekuatyware noãmbawerã y wachu prandjãgi nonga, go tãrã duwegi y wachu prandjãgi nonga. 13 Go nonga emi duwe y pambu wachu nonga y duwe rekuaty emi, Apã Wachu djakabu gogipe rypy djiwe kandjãmbawerã, go wytu pedju rapyre nonga wytu wachudji. 14 Chãwã rabu paropyty nonga ĩwe, kuẽmpadjebu ĩmbechewerama, go nonga djue'iwerã nandjedji byllã djuegi.