1 Ragamondo etakrã Wachupurã tey ymachidjawachupe, Selah, kabychewachu djiwe Sion kuãmbuku pewe. 2 Pua wywy wẽbu Arno ytuwy wachaty rekoaty, kuyra wywy Krymballã nonga oma dja eity puare. 3 Kiuga reko orepe kbeigatu djiwa; Peche gami orepe pendje kreychãpe go kreybu chawã nongabu go kadjawegi wywype djemi mondo, kiveme maty dja djemiwe. 4 Wedja mondo ekõwã pendje ekoãndype emi kadjãmpawegi Moad ekoandy puare kuwẽga reko dja mudjady wywy ipo wydji. Emi krãpĩmbabu go mibuchãndygi, emi manombobu go ape buchambaregi. 5 Ymadjidjawachu wapy wapy endaty chidja gatuwerã djaprowo djiva. Emi David wapy endatype gope wapy werã ymachidja djawambowo atygi dja bue djapo gatugi. 6 Ore wenduma Moad dja kachidjabuõ’ã emi ka krymba ury emi kabewã, emi kaina wywy. 7 Go buare Moabpua chĩnga reko dja ekoãndydji; dja o achyroma kirherepua dja mõkyta ẽngatu chipopurã lla’a djiwa. 8 Hesbon go Sibma chipopurã piãdjapa roma; emi yma chidja biripama dje chipopurã kbeigatu wywy dji; chipopurã wembawe jazer rekoaty emi oma kabyche wachupewe go emi ypurã wachu djawẽ. 9 Go buare cho chingawerã jazer go chinga nonga Sibma chipopurãdji; dje Hesbon emi peche pyregi wendudjiwa tõmumbudjiwa puka. 10 Dje rekollãma ury, chipopurã endapyte ĩllãma pre’ẽ emi uryllãma. Go chipopurã ty’ydjamiwepe go djami bechema; go chipapurã lla’a ty’y djamiondygi pukabechema urywã. 11 Cho djã’ã kryrallã mbucha; mbue parã nonga Moad dji , emi chingadjeky reko kirheredji. 12 Moab pua obu djepe krandobuãwã dja kuamburu wywy rupi, dja krandobuãwe wendubechewerã, membechewerã bue gatu. 13 Kowe djawu Apã Wachu inawe Moad djiwa mawe kreybu. 14 Kowebu Apã Wachu inama: Kowebu brewipychã ruybu, go etakrã koe’e ywytyrõndygi kuaty nonga dja bue bitawegi. Go nonga Moad chidja go wowerã ywype, tãrã buchãbu chupa djepe ichakrã ĩwerã go emi prarupawerã.