1 Apã wachu chinga djekywerã Jacobpe emi prawowerã wyche Israelpe idja llaparã gobu rekõ gatowã idja ywy opo endawepe go duwe ekoandy pua wewerã gope, go ekõwerã gogi wywy Jacob irandy wywy bychepe. 2 Go ekoandy pychywerã gogi wywype go eruwerã gogi wywype go eruwerã gogi wywype go yuyidja ekoandype: go israel ekoandypua wywy pychywerã gogi wywype odja bue pyty girã Apã wachu ekoandype. Israel ekoandype, go ekoandy ekõ endawe yma chidja nonga kowebo gobu ekõwerã buetygi nonga go yma chidja nonde waregi rekobuchãwegi Israel pua gipe gobu wenduwerã emi go djapowerã Israel djawuty nonga. 3 Go Apã wachu mewerã o kryra gatu go dje djapoty puygidji dje wacha chue'igi emi dje djawã okryra llãgidji 4 Dje djawuwerã go Babilonia yma chidjugidji: bue buare krãpima o go nondjepe biriatygi krapîma emi go ekoandy biritygi. 5 Apã Wachu pacho pama mondo go djã'ã buchãgi wyra mini, emi matãma yma chidjugi rekogi. 6 Idjarõ pachoma go ekoandy dja prãndja rupidjapima gogi wywype ekowna go duwe ekoandy buetygi nonga. 7 Pua wywygi ekõwa ekõ gatuwãpe emi okryra yatupe go ywy prewã wachupe ury gatupe Apã Wachupe. 8 Go wyra cuapres emi go cedro Libanopua emi inamo ury gatupe: dje wa'a djiwe: illãma ekowã djuawãgi orepe. 9 Go mono endaty ekoandy pua krymba llãma djedji dje ekõ buare, dje puãma mondo idja wapytygi duwe ymachidja endawe emi go ekuandy chidjawepe. 10 Gogi wywy pukapawerã emi inawerã gogi wywype: djeba ekõma praru rekowã ore nonga,go djepe ekõwegi ĩ orepe ekõ endawe emi. 11 Dje ekoandy yma chidja ekõ wama ma no endatype, dje preatygi kãdjapa romadjo. Acho wywy dje ikêdype imbawera emi djepe pechpawerã. 12 Mawe nonga dje wama, go ywadji tata chapi nonga endawe.Dje wama ywychepe dje prarupawegi go duwe ekoandy wywype. 13 Dje djawuwerã dje dja'ãpe ywadji; ywadji cho djupiwerã, tata ywadji llabu cho pua'ãwerã cho Apã wapy endatygi, go rekoatugi wywy nuaãendatygipe go ywy kuambu wapytygi ĩwerã krei llachu rekoaty gope cho wapywerã. 14 Bakyrei ywodji llabu cho djupiwerã, emi cho ekõwerã go ywadjiwatygi nonga. 15 Kowebu dje wawerã go mano endaty rypyechepe. 16 Gobu djepe wechangi, djurupeka reko emi wechã gatubu djedji djawuwerã: go kbe'e gogi kuera rekowegy go ywy emi djawã okryrallã nondje buare dja ekoãndype. 17 Go wedjawe go ywy llabu go kawachu nonga, buchãmba roma djo go ekoandygipe, emi go muchãwegi rõ puibechema emi. 18 Duwe ekoandy ymachidja î roma dja kuare duwegidji dja wapy endatype. 19 Djepe rõ djapi roma rypyechepe dje kuarekuedji go wyra akã buchã nonga go pê pukudji manombawegi emi djapipyre go rypyechepe; go ikãwegi rõ biri rama go itapeche nonga. 20 Djepe pechellãwerã duwe wywydji, ekoandy ymachidja wywy nonga, dje bue buchã djapobuare go dje djukapa buare dje ekoandygiwywype, Go duwe kuallãwerãma go ekõandy ymachidja djembidji emi dja tey wywydji. 21 Maĩ ga reko dja tey wywype go djukawã, dja apã bue buchã llapodji djapoemewã emi pua'ãllãma ka prawo ga reko ywydji emi djapoemewã ape ekoandy wywy ingî ywy llabu. 22 Cho puã'ãwerã duwe wywydji, inama pendje Jaweh chichaechegi cho pachowerã Babilonia bykuapyre emi go wedjapyregi wywy emi dja tey emi idja kminongi wywy. 23 Gobu cho djapowerã idjadji gui'î eity, go ypa wachugi nonga, cho pei'iwerã godji go peitygi nonga, djawuma pendje Jaweh chidjaechegi. 24 Jeweh chidjaechegi memã idja djawu inama: Go nonga ekõwerã go cho djawã djawupawe nonga, go ekõmbawerã cho djawuwe nonga; 25 Cho djapipawerã Asiria pua wywype cho ekuandy wywype, emi cho biriwerã gogi wywydji go cho ywy kuãmbuku wywy ĩngipe; idja wyra rupydjiwatygi ĩllawerãma gogi wywydji, go idjape puy tugi matãwerãma idja idja djatadji. 26 Kowe djawu kowegi ekõmbawerã go ywy wichawedji, go cho ipo pouma ekoandy wywydji. 27 Pendje Apã Wachu, Jaweh chidjaechegi inambawegi wywy ekõmbawerã, awa rõ go pychywerã idjape? Ipo po uma, uwa rõ go djewywerãngi gobu. 28 Go ekoandy ymachidja Acaz manowe djachy manope go djawudjiwa kowegi ekõmbawe. 29 Dje filisteapua ymachidja, ka uryeme upẽ buare dje pachoatygi wyra mini; go membo llapodji wewerã go duwe membo gogidji wewerã chedjupurã wachu. 30 Idja Kuwẽ rekowerã go bue rekollãechegi Israeldji igo duwe wacha djueiwegi ekõwerã Krymba gatupe; llellã rupi cho djukawerã dje llapo, filistea, emi cho djapipawerã dje ekoandy wywy ĩmbawegi. 31 Chinga o matã dje, tapy djawã; puka chidja mondo dje, ekoandy; dje filistea krỹmballã; ywadji pua'ã go ekõma tata tachĩ krapĩma, go illawerã kãndjallãwerãngi nuã Wachuechepe. 32 Go mawe nõnga djawuwerã go ekoandu buetygipe. Inawerã idjape Jaweh puãwerã Wydje Jerusalenpe emi gope nuãmbawerã go wacha djueipawegi emi.