Djawupuku 13

1 Djawu pyre Babiloniadji, wechãwe Isaias Amos tey'y: 2 Upi modo ywy kuãmbuku ĩllãmbu tyru wewe, puka modo emi ipo upigami, peka mondo ikẽwã ymachidjagi wywy tapy djãwãpe. 3 Cho noãwerã ekõ gatugi cho prawowe. Chidjagipe cho puka, cho pochowã go wywype puka rekobu ury gatupe ĩmbu. 4 Wendu gami noã wachu pambu, wendu ywy kuãmbukudji to'õ mumbuwaty tãrã nonga. Jaweh mai'i tõ mumbuwatygi tãrãdji ĩma tõ mumbuwã. 5 Ekowerã budjakrã puatygi, duwe rekuatywã ekõma. Jaweh prandjãdji bue eruwerã kiopawã kowe ywy. 6 Chingã reko rypybe che buare Jaweh ekõwagi go rõ Chidjaechegi djueiwã. 7 Go buare kbe'e wywy ipo praru roma djo dja'ã mandroma emi. 8 Djã'ã paro pyre, djawã djawu uryllã buchã eche tuwa rekowerã gorawẽ. Idja kuawerã kudja brawogi achy nonga; dja'ã parowerã maĩmbu picha cha'ãdji; cha'ã wywy tata nonga. 9 Krymba Jaweh ekõwerã krymbagami, oachy buchã, prandja buchã itypapyra kowe ywy wachu pachopapyrã bue bychã djapoatygipe. 10 Go ware tata wywy, tata tãrã chapillãwera emi, go krey wẽmbu chawãwerã, go djachy bypellãwerã (chawãwerã) emi. 11 Cho pacho pawerã ywy wachu cho prandjaware emi cho biri werã ka chidja rekogi bue mbucha djapo waty: cho djapi werã ka chidja bua'ãgi. 12 Cho pakã werã kbe'e wywy, ita kbeigatu nonga pakã werã kowe ywype ekõgipe, ita wera Ofir ekoandy. 13 Cho ryry werã kowe ywy cho kuera emi ruwa werã kowe ywy cho Jaweh llaporõ go wywy cho djawuma kowe djapo werã cho prãndja emi cho prandjãdji. 14 Kowe wachu kudjã nonga go wachupurã no'ã nonga paro romambu nandje erullã werã poropyre mawembu ekowerã kandjawa idja ekoandype. 15 Ache dorogi djukapyrã wyra akuape; go kawãmbyre djuka pyrã pe'ê akuadji. 16 Pendje tey'y wywy djapipyrã itadji pendje chã ruwa; idja tapype îngi narombawerã, eche pokopawerã idja breko wywy. 17 Kua gami, kowe emi parowerã Madian irollãngi, to'õ mumbuwã idjape okryrallãbeche roma djo, Piredji kuambeche emi prowollã ita bire. 18 Rapa itywerã betagi, chinga djeky illãwerã kuallã kudjã brawogi, wedjallãwerã krumi djepe. 19 Go noga Babilonia, ekõ ekoandy kbeigatu, go Kaldea kbeigatu, pytawerã go Sodoma emi Gomorra, Apã Wachu pachapawe. 20 Kowe ywype nandje ekõ mbuku illãwerã tãrã membe: dje Arabia djapo illawerã tapy emi mymba piredji emi wachupurã tãrã. 21 Gope pachawerã mymba prandja djorã puaty go tapy wywy iwerã kra'a wywy; emi ekõwerã ñandu wachu, emi bechepe prandjã djudjãwerã. 22 Idja tapy urygatu endawe puka werã krachowa wywy emi bedjywa; krey'y krãpi ekowerã, îmbechewerã tãrã krey ekõ mbawerã bue'e wywy.