¹ Yaz nyaangh seiv lae, ori zuc kaorv hnjouv boz yaamz Zouv Yesus Giduc aai funz meih naan njorngh daaih. ² Seiv meih hnumc yaz yaamz sorng munh gornv zany-jien munh horngc ga ndaangc nzaor meih wav ndormc wac, meih ori zuc zorz gaorz funz naih slimz-saang wav ndormc munh youc naaih ji-gaor haeif nzaor munh wav ndormc. ³ Meih ori zuc gornv yaz tanyc zouc nanc hnaangv Zouv Yesus Giduc nyaangh ah daauh baengz njorngh. ⁴ Ma naih dori daauh aai baengz nyaangh munh nzac dih tanyc za dinc mbi erng funz ga sin nyaangh nqumh bouz daih nyakv nyauv zuc, weic naanh nyaangh nqumh bouz si kungz ori aai funz baengz bieiv nyaangh munh borngv hnyouc kungh. ⁵ Naz dih douv nyaangh munh lorh dih hnaangc, si goorngv douv wav ndih mbi ma eiz nqeif-saangh douv naz naanh ma haeif duz daengv ndorng. ⁶ Shaetv qaf aai njaang couc nyaangh munh, naanh horpc duz souf naanh nyaangh cunh jaengz. ⁷ Ori zuc nyaeih naanh nqorng yaz goorngv nyaangh waac, weic Zouv ori slif funz meih beiz duz naan ndorc muif hungc. ⁸ Ori zuc saang, Yesus Giduc si Nda-witv Hungh nyaangh slorng zaeiz douh seiv slunz, Naanh daeic ningh Nqungh-Hungh haanc funz saangh fionh ndaangz daaih, neiv si yaz nzonh nyaangh kuc jaen. ⁹ Weic neiv kuc jaen yaz zuc tanyc couc, youh zuc hnjav-hlangv slaei, ga hnaangv hlorngc slhoriv munh lei. Naz Nqungh-Hungh nyaangh kuc jaen si ma naih dori hungc slaei duz. ¹⁰ Hnaangc naz weic wav ndormc munh duz sienv, yaz nyunc zuc tanyc muif hungc couc, weic funz naanh sliz duz slipc slheiv-kquei nyaangh maengc yaamz Zouv Yesus Giduc, nyaangh nquaangz aengv slei ndaaic. ¹¹ Neiv zou waac si saenz nyaangh, si goorngv baanh gornv Naanh sorngc daeic, Baanh youh duz gornv Naanh saangh. ¹² Si goorngv baanh gornv Naanh tanyc duz taauv daauh, Baanh youc duz gornv Naanh gunv. Naz baanh naangc ma nyimc Naanh, Zouv sungc laauf ma nyimc baanh. ¹³ Ma gunv baanh slimz ma saang. Zouv si hnyouc saang, weic Zouv ma gaan haeif kquaengc Naanh duz. ¹⁴ Meih ori zuc mbu sorng munh saang saenv neiv ndormc nqeif, yaamz Nqungh-Hungh ga ndaangc ori zuc jorh njanh naanh sliz, nung kuiv lanh nzaengz lanh, wav ndormc ma saangh nyaangh waac. Weic neiv ndormc lanh aor lanh nyaangh si funz munh dih nzaeng kungv, youh funz hoc hmungv wac nyaangh munh kungv. ¹⁵ Meih ori zuc norngc slimz shaetv qaf, norngc slimz aai naan nqorng Nqungh-Hungh nyaangh hnyouc, hnaangv ah lanh munh aai nqumh bouz ma naih dinc jaamf lei, norngc hnyouc nzonh nzaor zac eiz saenz nqeif. ¹⁶ Ori zuc piaenv hnqorif ma zaenv Nqungh-Hungh nyaangh nqeif wav ndormc munh ma saangh wac, weic neiv ndormc munh nyaangh nqeif si kungv aai funz munh gunv aai gunv funz munh ningh nqeif saenz nqeif goz. ¹⁷ Weic neiv hungc wac ori faanv ningh hnaangv funz munh saangh seih hoc aav ningh lei, nzaor neiv ndormc munh naih i lanh Hi-me-ne-atc, gornv Fi-le-tatv. ¹⁸ Naanh sliz ningh hlorngc saenz nqeif, youh goorngv saangh fionh hndaangz daaih nyaangh jaauv kquaiz nzuf nzoh, neiv si aai funz slimz zaenv nyaangh munh slimz lunc. ¹⁹ Naangc naz, saenz nqeif Nqungh-Hungh njapc daaih si naih goonz daeiv daangc, youc naih yiaen nqapc saenz goorngv," Zouv beiz duc dori daauh aai Naanh nyaangh munh, youh beiz duz dori daauh nyimc Naanh nyaangh mbu, ori zuc kquaengc nzuf yaetv slorngv hoc nyaangh jaauv. ²⁰ Ah sienz biaauv hlo, ma zaeih kungv naih shamz aengz,gornv nyanh aengz, Sungh lorh naih njinc njiaang aengz, gornv hnif aengz, ah baanh norngc sai nzorngc nyaangh aai, naih ah baanh haanc norngc ma naih daeiv slinh nyaangh aai. ²¹ Si goorngv dori daauh slhieuz gaan baanh naan hndaangv zaengh,kquaengc nzuf hoc gornv wei nzorngc nyaangh ndaeic si saangh ah norz aengz sai, youh duz naanh nyaangh Zouv norngc aai muif hungc nqorng nyaangh nqumh bouz. ²² Hnaangv naz, ori zuc piaenv hnqorif munh nqun nyaangh hnyouc nyaeif aai nyaangh ndaeic, Ori zuc norngc slimz zaenv mbi dih slaangz nyangh jaauv, youf horpc hnyouc gornv muif lanh eiz Zouv euv daaih nyaangh munh hndaangh zaengh yaamz. ²³ Ori zuc piaenv dih nzaengz nyaangh ndaeic, gornv orng nzorngc nyaangh jaauv, weic meih beiz duz neiv ndormc munh si kungh aai funz munh dih nzaengz kungh. ²⁴ Zouv nyaangh ndorngh ndaeif ma horpc zuc dih nzaengz, hnaangv naz, ori zuc aai nqorng funz sorng munh, youh nzaor sorng munh, norngc slimz tanyc. ²⁵ Ori zuc norngc hnyouc ndienc jorh nzaor wav ndormc caengv daam meih, weic Nqungh-Hungh nyaangh eiz naih hnorif naanh sliz hnzav haeif goriv hnyouc, beiz duz saenz nqeif. ²⁶ Funz naanh sliz haeif slingv daaih, haanc haeif diuv mblaatc hmanc nyaangh njav-sangz dangv lorpv naanh sliz, si funz naanh sliz eiz sliz nyaangh slimz hnyouc nyaeif aai.