Wac Mbu Tauv slhitv maeif hnorif ¹ Meih ori zuqc beiz duz slhitv maeif hnorif naaih couc nzorngf nyaangh ndaeic shaetv. ² Mbamh munh slaaiv maorh gan duz nqorng, mauh nyanh, gan tanv naanh, zanyv hluh, qaamz munh, ma hmungv nzif fav, ma naih boz, ma hndaangc slhaeuv ³ ma naih slaangz munh, glaorv yunz, ma naih goornz youc gorngv, ma haeif gunv duv naanh, aai huc, haanc aai nqorng nyaangh ndaeic ⁴ faanz aai huc, maic guokc maic youf baez mauh da hungc ndung ma slaangz Nqungh Hungh . ⁵ Beih shangc hnangc zaenv nqorng leif, si naanh nyaangh hnyouc ma nyhimc naanh sliz zaenv nyaangh jaauv naih qaf. Neiv ndormc munh meih ori zuc piaenv nqeih nyhin guz. ⁶ Yamz naanh sliz gaah njaf naih bing nzac munh nyaangh biaauv gunv oorng nyaangh munh nzif, jaaf yaorc munh nzif eiz hnyouc hanc aai hlorngc muif hungc slhoriv ⁷ Muif ndih horc si sliz youc ma beiz duz saenz nqeif. ⁸ Lu hnorif Yan-netv gornv Yam-mbe nyhaengc Mose aai lai neiv ndih aai huc wav ndaamc munh youc hnangc wav lei nyhaengc saenz nqeif. Naanh sliz nyaangh hnyouc huc nzuf. Naanh sliz zaenv nyaangh jauv ndornh nzuf. ⁹ Naanh sliz hnangc neiv lei aai si aai ma duz laauh mbaac hlaaiv, shungc weic funz sorng munh faatc naanh sliz oorng hnaangc Yan-netv glornv Yam-mbe lei. ¹⁰ Meih beiz duz yaz nzaor nyaangh di nqeif, yaz aai nyaangh ndaeic, yaz nyaangh hnyouc ori, nyouh youc faatc yaz nyaangh zaenv slimz, yaz nyaangh slimz hnyouc, yaz slaangz munh, faatc yaz naih hnyouc tanyc duz; ¹¹ Faatc yaz zuqc munh aai baeuv youc zuc tanyc couc. Yamz An-Ti-Okc slhaengv ndaengh, I-Ko-Ni-yum gornv Li-Saa-Daa. yaz zuc munh aai baeuv, zuc tanyc couc nzorngf, si Zouv hnjouv yaz nqeih ndutv neiv ndormv yietc slorngv ndaeic. ¹² Dori dauh gunv Zouv Yesu Giduc shorngc maengc saangh, zaenv Zouv Nqungh Hungh nqorng, wav dauh si zuc munh aai baeuv.( aai horic) ¹³ Orkv nyaangh munh gunv jaaf munh wav ndormc, ah hnorif shaetc erng huc di ah hnorif, kungf jaaf munh youc zuc munh jaaf naanh sliz. ¹⁴ Si meih gaan horc duv nzuz, zaenv taangc saenz nqeif, ori zuc muif ndih eiz saenz aai, sungc weic meih beiz duz tuc dori dauh horc daih. ¹⁵ Yamz meih aai munh seiv nyaangh saang huc meih duz beiz gany slhouf. Gany slhouf funz meih naih toorngv maengh beiz duz ori zuc norngc zaenz slimz zaenv kaorv Giduc Yesu hanc duv hnjouv. ¹⁶ Muif yiuoh gany slhouf, Zouv Nqungh Hungh yaenz munh jav youc naih saangh norngc weic nzaor munh, weic gorngv hmac munh, weic zaengv munh aai hlorngc nyaangh dinc, weic nzaor munh aai horpc nyaangh jauv. ¹⁷ Hnangc neiv funz Nqungh Hungh nyaangh munh duv nqorng glun weic aai muif hungc kuc ndaeic.