Nzaauf Zav Nqeif Nyaangh slin Slhaengf Shaeth Daih. ¹ Slinz Hndaangh goorngv manyh taauv gui ndangz slheiv nyaangh ah ndormc munh sliz kquaeng zaenv slimz nyaangh jaauv, sliz ningh lipc goorngv jaaf wav ndormc munh gornv hmanh nzaauf nyaangh jaauv, ² derngv beih zac hnyouc ngorc nzaauf zav nqeif wav ndormc munh nyaangh slimz hnyouc naamh slaamv ningh hnaangc njaf zuc buv plaz daic lei. ³ Sliz njic ma funz dorngz biaauv, njic ma nyhinc ah ndormc nyaangh dungc njinc daangv Zouv Nqungh Hungh njaapc daih funz zaenv nyaangh munh gornv beiz duz saenz nqeif nyaangh munh souh glorv nzuf, nyhinc duz nqoh. ⁴ Muif hungc Zouv Nqungh Hungh zei daih nyaangh si nqorng nzuf, ma naih dori hungc zuc njim, daan faanv baanh souv Zouv Nqungh Hungh nzuf nyhinc duz laec. ⁵ Sungc weic kaorv Zouv Nqungh Hungh nyaangh wac gornv souh glorv si funz wav hungc saangh ndaangc slhaeuv. ⁶ Hnaangc goorngv meih zorz neiv ndormc nqeif mbu youf baez di, meih si saenz saangh Giduc Jesus nyaangh ndongh ndaeic nqorng. Duz yungh yaamz zaenv slimz nyaangh wac gornv saenz nqeif nqorng daangv meih zaenv kaorv nyaangh. ⁷ zuc paenv nqeih wav ndormc, goorngv gouv, huc nyaangh nqeif ma saenz nyaangh wac, youc gaan ori zuc horc linc lipc Zouv naanh nqorng. ⁸ Weic horc linc slin slhaeic nyaangh jaauv si kungh duz nqorng ah ndanyh kungh, si hnaangc orng huc Zouv si duz nqorng nzuf, weic naaih wac nyunc funz neiv slheiv gornv ndangz slheiv timh. ⁹ Neiv zou wac si saenz nyaangh baeih duz slipc zaenv. ¹⁰ Baanh zuc tanyh couc gornv tih tanyh nyaangh wav ndormc ndaeic, si funz baanh dapc njic hmungc yaamz slheiv kquei yaamz nyaangh wav dauh Zouv Nqungh Hungh, si muif laanh nyaangh hnjouv Zouv, si lanyh waih saangh zaenv nyaangh munh nyaangh. ¹¹ Neiv ndormc ndaeic si meih ori zuc kuinh mbu youc nzaauf munh. ¹² Nung kuiv funz munh mangc slaamv meih erng nqun nyaangh saang huc, si ori zuc norngc meih goorngv nyaangh wac, gornv ndaeic, naih hnyouc slaangz, norngc zaenv slimz gornv aai ndangc slhaeuv aai nqaorv funz zaenv nyaangh munh. ¹³ Meih ori zuc naih hnyouc mangc taauv ndormz hmunv doc gany slhouh nyaangh jaauv, nzaauf munh, kuinh munh zuv taauv Yaz erng daih wav ndih. ¹⁴ Nung kuiv mangc slaamv meih nyaangh zuc nyeic, si daangv Ziouv Nqungh Hungh shac funz meih gui douc wac munh daih. Derngv sorng munh gu dapc buf funz meih. ¹⁵ Ori zuc norngc hnyouc aai neiv ndormc nqumh bouz, funz muif daauh munh faatc meih saenz biac hnyouc. ¹⁶ Ori zuc gan slhaeu slimv taauv baanh gornv baanh nzaauf nyaangh nqeif, zuc norngc hnyouc taauv lei ndormc nqumh bouz, weic hnaangc lei aai, si meih gornv hmungv meih nyaangh wac wav ndormc dih ndoih duz hnjouv.