¹ Neiv zou wac si saenz nyaangh dori daauh naih hnyouc ori aai jiu bang nyaangh munh wav dauh si aai nqorng nzorngf nyaangh nqumh bouz. ² Jiu bang nyaangh munh gu ori zuc ma naih dinc nzim nyaangh munh, kungh norngc ah laanh aorv kungh,gaan haeif shaamc duz naanh, gan gunv duz naanh, haeif inz nqeif nyaangh munh, zuc naih hnyouc slipc zaev, youc haeif nzaauf duz munh. ³ Naanh ma yaenh diuv youc ma aai hluc si zuc aai hnyoc ndinc, ma dih nzaengz, youc ma maorh nyanh. ⁴ Ori zuc gunv duz nqorng naanh nyaangh biaauv njaaf, youc gan nzaauf naanh nyaangh seiv nin naanh, hmungv naanh nyaangh wac. ⁵ Hnaangc goorngv munh ma haeif gaan gunv duz naanh nyaangh biaauv njaaf, hnaangc lai gunv duz Zouv Nqungh Hungh nyaangh jiu bang munh. ⁶ Saangc zaenv nyaangh munh ma hoorpc zuc aai jiu bang nyaangh munh gu, gumh hnzav naanh sliz haeif zanyh hluh saangc zuc dingc slhoriv, hnaangc hmanh nyangh hungh zuc dingc slhoriv lei. ⁷ Aai munh gu nyaangh munh si gung nguaic munh slun maengh dauh nqorng nyaangh munh. Naanh youc ma zuc munh qaam youc ma zuc hmaanh nyaangh hungh sliv mborz slaiv naanh. ⁸ Slaangc nqumh bouz munh laauf dih hnaangc. Ori zuc saangh munh nin nyaangh munh, naanh sliz goorngv nyaangh wac haeif baangc duz zuc, ma yaenc diuv, youc ma maorh da hungc. ⁹ Naanh sliz ori zuc norngc hndangh zaeng nyaangh slimz hnyouc zaenv taangc Nqungh Hungh funz shaeth daih nyaangh saenz nqeif. ¹⁰ Sliz laauf zuc slheiv mangc ndaangc hnaangc goorngv ma naih nyaenz touv nzim duz haanc duz aai neiv ndormc nqumh bouz. ¹¹ Munh nzif laauf hnaangc naz zuc naih manyh dauh nqorng, ma goorngv wac slanc, youc gunv duz baanh yaamz muif hungc ndaeic. ¹² Slaangc nqumh bouz munh ori zuc zorz ah lanh aorv ah lanh fav laangh kungh youc haeif nzaauf nqorng naanh nyaangh seiv gunv duz biaauv munh. ¹³ Naanh sliz aai duz nqumh bouz nqorng nyaangh nqumh bouz munh si duz munh nin youc duz bung slimz nzonh zaenv slimz yaamz Giduc Yesu. ¹⁴ Yaz nyeih daih hnjouv tayc seiv meih si yaz erng jav neiv zeiv jaen. ¹⁵ Yaz nungv ningh taauv zaeih dih youc funz meih beiz duz mbinc yaamz Zouv Nqungh Hungh biaauv nyaangh nqumh bouz, si saangh Zouv Nqungh Hungh nyaangh jiu bang slheiv kquei yaamz, hnaangc biaauv njouh nyaangh gornz daeiv. ¹⁶ Baanh ori zuc nyhimc baanh zaenv nyaangh jaauv funz shaeth yangh nyaangh ndaeic saenz hluh nzorngf. Naanh hinc shaeth daih saangh bamh munh, Slinz Hndangh goorngv manyf Naanh horv nzuf, Slinz munh youc duz faatc Naanh, naih munh nzunh Naanh nyaangh jaauv funz muif sling hmungv nqungh ndiv muif norz ndinc naih munh zaenv Naanh Nqungh Hungh youc slipc naanh slaor taauv nquaangz aengv nyaangh ndinc.