Souh glorv funz muif laanh ¹ Hnangc neiv, da yietc yaz kquinh mbu meih souh glorv Nqungh Hungh weic nyaenh maanh ori zuqc weic naanh sliz souh glorv Nqungh Hungh funz muif laanh. ² Funz sorng hungh fav gornv yietv slorngv kquanz aai hluz gunv baec sling wav ndormc souh glorv funz ma naih ndaeic taaih baengh, baengh ornz nyaangh yaamz youc ornz Nqungh Hungh nqorng, lanh ninh lanh. ³ Neiv si nqorng nzorngf horpc Zouv Tin Hungh nyaangh hnyouc baanh nyaangh Hnjouv Zouv ⁴ Zouv ori norngc muif lanh duz hnjouv youc beiz saenz nqeif. ⁵ Si kungh naih ah dauh Zouv Nqungh Hungh gornv kungh naih ah dauh Zouv Yesu aai mba dorng munh gornv Zouv Nqungh Hungh njinc mbamh munh mba dorng neiv si zouv Yesu Giduc laauf mbamh munh ⁶ Giduc Yesu slitz Naanh nyaangh maengc weic shuc nyaenh maanh hwinz ndangz lauz, neiv zany manyf si duz shac funz hoorpc naanh nyaangh shaang huc. ⁷ Weic neiv ndormc zany manyf duz paic yaz aai nzonh jaen munh gornv aai gorngz slorz aai slin slhaengf nzaauf muif sling ndouf youc nzaor sliz tauv zaenz slimz gornv saenz nqeif neiv yaz goorngv saenz wac ma goorngv jaaf. ⁸ Weic neiv, yaz ori muif norz dinc nyaangh munh doornz slhungf buf ndangc slhaeuv souh glorv ma shiv dortc youc ma di nzaengz. Munh Nzif Yaamz jiu bang Njaah. ⁹ Yaz ori munh nzif zuz zorngz toorngz nquiz kquav. Ma norngv zorngz weic aengv munh youc ma norngv mbinv bieiv ndorngz, si norngc sai nyaangh da hungc samz si nyanh ma si norngv njaorz bieiv sai norngc sai nyaangh nquiz kquav zorngz slin. ¹⁰ Munh nzif ori zuc aai kuc ndaeic zorngz naanh neiv si zaenv nqorng nyaangh munh nzif. Naaih saenz slimz zaenv taangc. ¹¹ Horc di nqeif nyaangh saang huc munh nzif ori zuc slingv njouh youc aai hnyouc ndinc. ¹² Yaz ma funz munh nzif norngc lorkc jang gunv munh doornz munh nzif si ori zuc slingv njouh. ¹³ Weic zuc Nqungh Hungh zaorc Aa-ndaam ndangc gui ndangz haanc zaorc Haa-waa. ¹⁴ Zuc jaah si ma zeic Aa-ndaam zuc jaah si munh nzif zuc jaah hlorngc slhoriv. ¹⁵ Neiv si munh nzif yungh seiv si goorngv naanh muif ndih naih saenz slimz naih hnyouc zaenv slaangz munh aai ndangc slhaeuv youc gunv duz naanh haanc duz hnjouv.