¹ BauLo hmungv Zouv Nqungh-Hungh nyaangh lanyz, si aai baanh nyaangh hnjouv Zouv, youc hmungv hnjouv Zouv Yesus Giduc nyaangh lanyz, si banh naih njih baangc wav daauh, yaz youc aai Zouv nyaangh slhaeiv-seiv. ² Bung ningh funz Ti-Mo-Tai, si yaamz slimz zaenv nyaangh saenz seiv, glorv Nqungh-Hungh, si baanh nyaangh Fav gornv hnjouv Zouv Yesus Giduc dangv horh lienh baanh, slif hnjouv boz, baengh orn, orn lorqc funz seiv meih. ³ Yaz lorh ningh Ma-se-ndo-ne wav ndih, yaz jorh seiv meih yaamz E-fe-so slhaengv nzaor njanh dangv ma duz funz wav ndormc munh, daaih nzaor bitc hungc nqeif. ⁴ Youh ma duz hmungv taauv, weic ma haeif slaangc duz baanh nyaangh jaauv, weic neiv ndormc munh kungh nzaor taauv hlu hnori biaauv mbuc nyangh ndaeic, gornv slorng zaeiz douh ma haeif zormc nyangh nqeif, si kungh aai funz dih nzaengz kungv, neiv ndormc ndaeic ma haeif njapc Nqungh-Hungh nyaangh Guokv gornv ma haeif slimz zaenv nyaangh jaauv. ⁵ Yaz hnaangc neiv njanh, si norngc slaangz nyaangh hndaangc waeih slimz hnyouc, youc saenz norngc nqorng nyaangh hnyouc lanh slaangz lanh, funz saenz saenz slimz zaenv. ⁶ Hnaangc naz, naih ah mbanh kquaengc neiv ndormc jaauv, mbi ningh piaenv, kungh funz munh dih nzaengz ma saangh nyaangh ndaeic. ⁷ Naih ah mbanh naanh sliz ori aai slin slhaengf nzaor nqeif, youh gan ma beiz duz naanh sliz nzaor gornv goorngv nyaangh mbi dori hungc ndaeic. ⁸ Naz baanh beiz duz nqeif njanh si saenz saangh norngc, hnaangc haeif norngc duz horv. ⁹ Ori zuc beiz duz ndorc, nqeif njanh njapc daaih si ma zaeif weic funz munh nqorng munh, si weic piaenv Nqungh-Hungh nyaangh munh, gornv mangc slaamv Nqungh-Hungh wav ndormc munh, gornv ma hndaangv zaengh nyaangh munh, youf weic funz munh hoc munh, gornv hlorngc slhoriv nyaangh munh, gornv daei nzif, daei fav, munh nyaangh munh. ¹⁰ Gornv tuc munh saaf, munh dorn slanv munh dorn, hnimc munh maic, gornv goorngv jaah munh, aai zav zaeng-jen, njinh wav ndormc daam zaengv saenz nqeif nyaangh munh. ¹¹ Neiv ndormc saenz nqeif gaor funz yaz nzaor daih, si funz paeih duz tanv Nqungh-Hungh nyaangh nquaangz dorngc boz. ¹² Yaz souv baanh nyaangh hnjouv Zouv Yesu Giduc, dangv Naanh sliz qav funz wav daauh, weic Naanh mangc fhaatc yaz slimz saang, youh norngc yaz orng huc Zouv. Haanc ga ndangh wav ndih, yaz si ah lanh hlorngc. ¹³ Zouv, aai horic, youh goorngv baeuv Naanh, yaz aai ndung hungc ma saangh, weic yaz ma zaeng zaenv Zouv, naz yaz neiv ndih duz Zouv horh lenh. ¹⁴ Weic Zouv Yesu Giduc nyaangh slaangz, shac hnjouv boz horngv horngc funz yaz naih slimz zaenv. Youc horh lienh funz yaz naih slaangz munh nyaangh hnyouc. ¹⁵ Neiv zou waac si saenz nyaangh paeih duz nyanh maanf zaenv, hnjouv Zouv Yesu nzac taauv mbamh ganz daaih hnjouv slhoriv munh funz mblaatc slhoriv, yaetv slorngv si slhoriv munh, naz yaz si slhoriv erng hluh di wav daauh. ¹⁶ Hnangc naz, Zouv Yesu horh lienh yaz, koriv paeih Naanh nyaangh slaangz yaamz yaz, ma gunv yaz si slhoriv munh hlo kquai, Naz Naanh norngc yaz si koriv paeih Naanh nyaangh slimz hnyouc baengh, aai gaor nqaorv funz munh ga hndaangz daaih zaenv Naanh duz slei-kquei nyaangh maengc. ¹⁷ Shouf tanv nquaangz dorngf slei kquei yamz nyaangh Hungh-Fav, ma haeif daeic, dangv baanh mangc ma fhaatc nyaangh ah daauh Nqungh-Hungh, youh ori zuc tanv taauv sleiv slipv ndaaic, Amen. ¹⁸ Yaz nyaangh dornz Ti-mo-taai lae! Yaz gaorz naeiv ndormc lanyz si dangv ndangc ndih douh waac munh, douh daaih nyaangh wac goorngv zuc meih wav, funz meih norngc wav ndormc nqeif aai nqorng nyaangh dungc zaangc tanyc duz njorngh. ¹⁹ Ori zuc slimz zaenv taangc, hlaec slimz hnyouc naan hndaangv zaengh, weic naih munh kquanyh sliz nyaangh slimz hnyouc haanc funz sliz nyaangh slimz zaenv duih nzuf nzoh. ²⁰ Neiv ndormc naih i daauh si Hi-me-ne-atc gornv A-lekv-san-nde, Yaz zorz gaorz funz Sa-tan, funz nzaor naanh sliz horc ma duz hlorngc Nqungh-Hungh.