Matendo 3

1 Basi u Petulo nu Yohana vavele vibita khunyumba ya Nguluvi saa tisa umuda kwa khusali. 2 Umunu fulani yeavele khiwete ukhuhuma isaliwa, yealimbwaka pa mlyango kwa nyumba ya Nguluvi kwekwikhemelwa mnofu, ili anyilikhake uvusembe khwa vanu yeviyingila munyumba ya Nguluvi. 3 Ali avawene uPetulo nu Yohani viyingila munyumba ya Nguluvi akhanyilikhaka uvusembe. 4 U Petulo nu Yohani vakhamlangake sana, vakhatikila, "Utulangake uwewe." 5 Ukhiwete yula ukhapata khinu ukhuhuma khwa veene. 6 Lakhini u Petulo akhamchovelake, "ihela ni dhahabu unene sindivele nafyo, lakhini yendivele nasho njoshendakhakhupela. Khwa litawa lya Yeesu Kristu, ukendake." 7 Halafu u Petulo akhamkhwekake ni livokho lwa mwene ilya kulia akhamyimyake, muda kukwe amagulu ni fifundo fya macheke fya khiwete yule vikhapatake ingufu. 8 Ukhiwete yula akhavangake ukhuwida nu khukenda, akhayingilake munyumba ya Nguluvi pamwinga nu Petulo nu Yohani mwana iwidawida nu khumlumba Unguluvi. 9 Avanu voha vakhamvonake ikenda nu khumlumba Unguluvi. 10 Vakhamanyake ukhutikila yumwene yeavikhikwe pa mlyango umnofi kwa nyumba ya Nguluvi; nekhe anyilikhake uvusembe; vakhava vishangaa sana ilicho ili lyelihumye khwamwene. 11 Vali vawene sheakamuline nu Petulo nu Yohana, vanu voha khwa pamwinga vakhanyililake mu liyumba lyelikemelwa lya Sulemani, mwana vishanga necho. 12 Ali awene ewe, u Petulo akhatikilake, "Unyenye vanu va Israeli, mbona mwishangaa? Mbona mkhatulanga sana uwewe ngata tumponiche khwa ngufu chetu? 13 Unguluvi va Ibrahimu, nu Isaka, nu Yakobo, Unguluvi va vababa vetu, amyimwele Umtwa va mwene uYeesu. Uyu njo unyenye mwamkhabisiche nu khumbela pamiho ka Pilato, pamwinga umwene sialondaka ukhumhukumu. 14 Mwambelile umunu Umwimikhe yavele ni haki, mukhalondaka vamhumye umunu yeivulaka vanu. 15 Unyenye mwamuvulike Umtwa va vusima wenyo yeafufulilwe nu Nguluvi, nu wewe tuvele vashahidi. 16 Elino khwa litawa lyamwene, umunu uyu yemumumanyile, njo apevilwe ingufu. Iimani yeyilutye mwa Yeesu njo yeyimpelye uvusima pamoho kenyo nyevoha. 17 Elino nyevalongo vangu ndimanyile mwafanyile koha ako pakhuva simwamanyile, ewe njo shevafanyaka avalongochi venyo. 18 Lakhini kala keavachovye Unguluvi khwa milomo ya vavilisi voha ukhutikila u Kristu yaiteswa, elino katimyele.u 19 Elino muhongechake nu khukalavukha ili isambi chenyo chihechwe choha, nekhe wiche uwakati wa khwikhela ukhuhumana nu khuvepo kwa Mtwa; 20 nu khumseng'a u Kristu Yeesu yeachakulilwa khwajili yenyo. 21 Umwene yavele lasima ayanukhilwe khushanya mbakha pewifikha uwakati wa khukomosa vinu fyoha we achoville Unguluvi khwa milomo ya vavilisi avimikhe. 22 Na salwesi u Musa achovile, Umtwa Unguluvi yeakhamleta umvilisi kama unene ukhuma mlukholo lwenyo. yemwakhampulihiche khwa khila khinu sheichova ukhwenyo. 23 Na yula yeyanga akhampulihicha ndali fye ichova, uyo yeihechwa kabisa ukhuma ukhwenyo.' 24 Ewe njo avaviisi voha ukhuvangila u Samweli na vala yevafuatye baadae valongelye ukhuhusu umsikha uku. 25 Unyenye njo vana vavavilisi na mapatano keifanyile u Nguluvi na vababa venyo, ngita sheachovile kwa Iblahimu, "Ukhumana nu lwolokho lwakho idunia yoha yeyibalikhiwa. 26 Unguluvi ali amfufwele umtumwa vamwene amseng'ile ukhwenyo khwanja nekhe avabaliki ukhuhumana, nu khugalavukha khwenyo nu khuchilegha isambi.