1 "Avalongo na vababa vangu, mupulikhichake uvutetesi wangu wehachandifanya uhwenyo lino." 2 Makutano vavevapulikhe Paulo peachovaka navo khwa hi Ebraniya, vachihile. Ahachova, 3 Uneene ndivele muyahudi, ndiholile mukhivuta sha Terso ilihala lya kilikia, ila ndapatile uhwimba muhivuta ihi, mumagulu ka Gemalieli. Ndavulichichwe uhulingana ni njila sahihi cha sheliya cha vababa veetu. Uneene ndina bidihi ya Nguluvi, ngita unyenye nyevondi shemuvele ilelo. 4 Ndavatesiche khwa njila iyi mbaha uhufwa; ndavahungile avakosi na vadala nuhuvataka huligelesa. 5 Hata kuhani muvaha na vasehe vondi viwesa uhuhecha uvushahidi uhutya ndayanushe ihati uhhuhuma uhwavo khwa jili ya valongo vevavele hu Dameski, uhwangu uneene uhusafili uhubita uhwe. Yavele ndivalete avaanu hu Yelusalemu va njila yila ili vahungwe nuhuazibiwa. 6 Yahumye uhutya pala pendavele ndisafili ndikalibila hu Damesiki, majila ka pamunyi gafulu umwanga mukhomi kwa humye hu mbinguni kwa vangile uhundiangasa. 7 Nda dimile panyi nuhupulikha isavuti yihandichovela, 'Sauli, Sauli khwanini uhandiusi?' 8 Ndajibwe, 'uveeve yuve nani, Mutwa?' Andichovye, 'Uneene yune Yeesu mnazaleti, ambaye uveve uhandiusi.' 9 Vala vevavele nu neene vayiwne inulu, ila sivapulikhe isavuti ya yula yeachovile nu neene. 10 Ndachovile, 'ndikhite vuli, mutwa?' Mutwa andichovye, 'Uyime na uyingile Damesiki; uhwe hacha wichovelelwa khila khinu wipaswa uhufanya.' 11 Sindawesiche uhulola khwasabu ya muangasa wa nulu yila, apo ndahele hu Dameski khwa huongoswa na mavoho ka vala vevavele nu neene. 12 Uhwe ndavonine nu muunu yeikhemelwa Aanania, avele muunu yeakhamwe isheliya nu munya huheshimiha mbele ya vayahudi vondi vevaishike uhwe. 13 Ayichile uhwangu, ahayima mbele yangu, nuhuchova, 'Mulongovangu Sauli, upate uhulola. 'Khwa musikha kukwe ukwe ndamuwene. 14 Ahachova, 'Nguluvi va baba veetu ahuchakwe uveeveupate uhumanya uvuhelwa wa mwene, humuvona yula umunya haki, nuhupulikha isavuti yeyihuma mu mulomo kwa mwene. 15 Kwasabu hacha wiva shahidi khwa mwene khwa vaanu vondi ju ya keukawene nuhupulikha. 16 Basi lino khwanini wilinda? Lamukhe uchabihwe, uhakalafye injanangifu chaho, huno wikhemela ilitawa lya mwene.' 17 Bada ya hulejea hu Yelusalemu, na pendavele ndisali mukati mwa nyumba ya Nguluvi, yahumye uhutya ndapevilwe amaono. 18 Ndamuwene ahandichovela, 'Hima na uhweke hu Yelusalemu shang'ani, khwa sabu sihacha viyidihila uvushuda waho uhuhusu uneene.' 19 Ndachovile, 'Mutwa, vavene vielewa ndavahungile huligelesa nuhuvatova vala vevahuaminile mu khila lisinagogi. 20 Ni danda ya Stefano shayidi vaho peadudile, unene hangi ndavele ndiyimile jilani nuhukubali na ndavele ndilinda ifwalo cha vala vevamubudile.' 21 Lakhini andichovye, 'Ubitake, khwa sabu unene ndihahutumila ubite hutali khwa vaanu va matayifa."' 22 Avanu vamupelye uluhusa achove ju ya licho ili. Lakhini badaye vapasiche isavuti nuhuchova, "muheche umuunu uuyu mu inyi; khwasabu siyo sahihi aish." 23 Vavechike vipasa isavuti, nuhutaka ifwalo chavo nuhutaka ulufuna hushanya, 24 jemedali muvaha ahaamulu Paulo aletwe ngomeni. Ahaamulu avuchwe huno itowa ni mijeledi, nekhe umwene amanye khwa nini vavele vahamutovela ikelele namuna yila. 25 Hata pevavele vahungilwe khwa milegesi, Paulo amuchovye uakida yula yeayimile jilani nu mwene, "Je! yevele haki uhwenyo uhumutova umuunu yeavele Murumi na bado sina ahukumiwa?" 26 Uakida yula aveapulikhe amaacho aka ahele hwa jemedali muvaha nuhumuchovela, Achovaka, "wisaha uhukhita khina? khwa mana muunu uyu mulumi." 27 Jemedali muvaha ayichile nuhumuchovela, "Ndichovele, je uveeveuvele layiya va Lumi?" Paulo ahachova, "ena." 28 Jemedali ahamujibu, "Uhulutila khiasi khikomi sha sendi apo nyo ndapatile uvulayiya." Lakhini Paulo amuchovye, "Uneene ndivele mulumi vahuholwa." 29 Basi vala vevavele tayali uhubita humuvucha vahekile nuhumulekha umsikha kukwe ukwe. Nu jemedali nave ayokwipe, aveamanyile uhuva u Paulo avele Mulumi, na khwasabu amuhungile. 30 Isikhu yeyafwatye, jemedali muvaha asahaka uhumanya isalwesi uhuhusu amashitaka ka vayahudi zidi ya Paulo. Ewe amufungwe ififungo ffya mwene ahaamulu avavaha va makuhani ni balasa lyondi vakutane. Amuletile u Paulo panyi, nuhumuvimba katikati yavo.