Umlyango gwa 7

1 Ahalola abhahabhizya bhani bhebhimiliye mkona zini iizyinsi, bhadindile imbepu zini izyinsi kumaha ingekutahabhe nimbepu yeyi kupepenuha mnsi, pamwanya pisumbi ewe pikwi popondi. 2 Ahalola uhabhizya uwamwao akwinza kufuma kuwutukulo, alini amanyisyo ivya Mlungu uwaMpepu. Alila kwizi ipiti kubhahabhizya bhani hebhabhapiye usatushe kunanganya insi ni sumbi: 3 "Mtahananganye insi, isumbi, iwinza amngwipaka pesuti tuhangabishe ivimanyisyo ivyabhaputi ibha Mlungu witu." 4 Ini vyizye uwinji uwabhala bhebhabhishile ivimanyisyo: 144, 000, bhebha bhabhishile ivimanyisyo kufuma kuvihoro ivya bhandu ibha Israeli: 5 12, 000 kufuma kushihoro isha Yuda bhabhahishile ivimanyisyo, 12, 000 kufuma kushihoro isha Rubeni, 12, 000 kufuma kushihoro isha Gadi. 6 12, 000 kufuma kushihoro isha Asheri, 12, 000 kufuma kushihoro isha Manase. 7 12, 000 kufuma kushihoro isha Simoni, 12, 000 kufuma kushihoro isha Lawi, 12, 000 kufuma kushihoro isha Isakari, 8 12, 000 kufuma ku shihoro isha Zeburoni, 12, 000 kufuma kushihoro isha Benyamini bhabhapiye ivimanyiisyo. 9 Winongwa izi zyashila pihenya, na hwali imbuga imbiti pepatali numngu numo watagabhazya kufuma mnsi yondi, ishihoro abhandu, ni ndongobhimiliye pelengolela pitengo ilya wumi na pirongolela pa Mlungu. Bhakwatile igolole izelu na bhali ni mbaswa mitende mnyobhe izyao, 10 na bhahabhizya kwizi ipiti: "Uwupuma kwakwa Mlungu wayihaye ilya upuma, na kwa mwana wa Mlungu!" 11 Abhahabhizya bhondi bhemiliye kuzyungula itengo ilya upuma, nakubhazyungula bhala abhagosi peka nabhala bhebhizya bhulo bhani, bhahasulamila pasi parusuto na bhahenya kumwanya iya pawi pilongolela pitengo ilya wumi na bhahamputa Umlungu, 12 bhahatishi, "Amina! Yilolesye, uwinza, kushindiha, kusarifya, uwila, amaha gabhe kwa Mlungu wila na wila! Amina!" 13 Pe weka iwabhagosi ahambuzilizya, "Ibhabhabhananu bhebhakwatile amagolole amazelu, nabhafumile kwoshi? 14 Ubhabhuzye, "Tata Mwene, umanyile iwe," nahambuzya, "Ibha bhebhabhala bhebhafumile kumayimba amapiti. Bhagezizye amagolole igabho kubha mazelu kumabhanda igamwana wa Mlungu. 15 Kulili, bhalipilongolela pitengo ilya wumi ilya Mlungu, nabhakuputa ibhene shausiku na shamsanya pashibhazya ishakwe iwene wayihaye pitengo ilya wumi atitwale urushindiho pamwanya yao. 16 Tebhalole inzala iwinza, teshumilwa. Izubha telihabhoshe, temafuku iga kubhapemba. 17 Pu Mwana wa Mlungu walipitengo ilya wumi ahayibha mdimi iwao, alibhalongozya mvifumo ivya minzi iga upuma, nu Mlungu ahasumula amansozi mmiso gabho."