1 Abhapiti bhonti bhahimilila, bhahamutwala u Yesu pilongolela kwa Pilato. 2 Bhahanda kumusitaka bhahatinji, 'Twamulile umuntu unu akumanyizya zye zikubha songanya abhinsi yitu, bhatatinihaje isilikali, kufumwa insobho kwa kaisali, habhili akuti uwene wu kristi, umwene.'' 3 U Pilato ahamubhuzya ahati, ''Bhati iwe we wene wa bhayahudi?'' U Yesu ahamwamula ahati, ''Iwe we walonga linilyo.'' 4 Pe U Pilato ahamubhuzya umupiti wa bhapiti mupuga ahati, ''Intakulola uwubhibhi kwa muntu unu.'' 5 Bhahazemezya bhati, ''Imanyizyo zyakwe zikusongsnys abhantu asasizye imanyizyo insi ini yonti iya Yudeya, Kugalilaya ayinza afika uku.'' 6 U Pilato we ayivwa ganago, ahabhabhuzilizya she umuntu wa ku Galilaya? 7 We amanya kuti akufuma muwumwene uwa Herode, ahamutwala kwa Herode, u Yesu kunongwa ye amile panapo pa Yerusalemu. 8 U Herode we amulole u Yesu, ahaseshela nhani kunongwa ye insiku inyinji ahanzaga kumulola. Ishi ahasubhilaga kuti ayilolele wuyo amayele ge angahola kubhomba. 9 Pe u Herode ahamubhuzya u Yesu amazwi aminji, u Yesu atahamwamula nalimo. 10 Abhapiti abha bhaputi na bhamanyizyi bhanda kumusitaka kuwuhali. 11 U Herode na bhalugu bhakwe bhahanda kumusupizya, na kumwangalizya, bhahamukwatizya amenda agi togo, pe ahamugalusya u Yesu kwa Pilato. 12 U Herode nu Pilato bhahabha bhamanyani kufuma insiku ilyo, she palusalo bhamile muwulugu. 13 U Pilato ahabhabhunganiha, abhaputi nabhasongo peka ni mpuga ya bhantu, 14 Ahabhabhuzya ahati, ''Umuntu unu na mubhuzilizya pilongolela yinyu intalola uwubhibhi ngaweka kukwakwe. 15 Wope, u Helode atalola litalipo nalimo lye abhombile lye linga hondezya kuti bhamugoje. 16 Ishi ahomwe inti musatulile. Yamile mwata isiku ilyi shikulukulu ishi pasaka 17 u Pilato kumwigulila umukungwa weka. 18 Bhonti bhahazingula ishongo peka bhahati, ''Tukwanza atusatulila U|baraba!'' 19 Ubaraba akungilwe mwijela kunongwa ye amabhombile ipiti munhaya na kugoga. 20 Upilato ahanzaga kumusatulila u Yesu. 21 Ilelo abhene bhahonjezya kuzingula, kuti, ''Muhomele, muhomele.'' 22 Ahalonga nabho winza aha wutatu, ''Kuti ahomelwe kulyoni? Umuntu unu abhombile libhibhi lyoni. Ine intalilola nalimo lye lingahondela kumugoga ishiahomwe pe inti musatulile.'' 23 Bhahonjelezya kuzingula nhani, bhahanzanga ahomelwe. Ishongo shabho shihitishilwa. 24 Pe u Pilato ahamula kubhomba anza she bhakwanza. 25 Ahamusantulila we bhahondelilwe nawo, wamakungiwe kungiwe kunongwa yibho na kugoga. Ilelo ahabhapa u Yesu kuti bhabhombe anzashe bhakwanza. 26 Bhahahomana, nu muntu we bhahatinji u Simoni uwa mu Ukilene, afumile kuvwizi, bhaha mupimbizya ishihobhe nhanyo, ahashipimba ahamulantanda u Yesu kulusalo. 27 Nimpuga iya bhantu, mukasi bhalipo abhantanda bhahamulandata, bhaha swimilila. 28 Ahabhagalunhanila, u Yesu ahabhabhuzya, bhantanda abha mu Yerusalemu, muleshe kundilila lyoli, mulilaje kunongwa iyawihalo winyu na bhana bhinyu. 29 Mumanye, ahinza kuti insiku zye zikwinza, ''Bhayiti kwashi bhebhaluji, nabhebhatapapile na kwosya. 30 Pe bhahayibhuzyaga amagamba kuti, ''Mutugwile utugamba utunsi tunsi, 'Tugushile.' 31 Kunongwa ye anga bhakubhomba shinishi, we ikwilibhisi, yitibhe bhulibhuli ikwi lyumu?'' 32 Abhasahala bhabhili, abhabhomba imbibhi, bhahatwalwa peka kubhahomela. 33 Webhafiha pebhahatinji pi Fupa ilyitwe, pebhaha muhomela, peka nabhabhomba mbibhi bhabhili umo kumbali iy kundilo, uwamwabho kumbali iya kumwongo. 34 U Yesu ahati, ''Tata, ubhatuyile, zye bhakubhomba.''Bhata zimanyile, bhahagama amenda gakwe, kwidala ilya kuhoma ikula. 35 Abhantu bhahimilila pala bhahenyaga, abhapiti bhahanda kumwangalizya, ''Bhahati atulaga abhanji, ishi inga wu kristo umusabhulwa wa Mulungu, ayitule wuyo.'' 36 Abhasikali bhope bhahamwangalizya, 37 bhahamu sejelela na kumupa idivai ye nsuye, Bhahatinji, ''Anga we mwene wa bhayahudi yitule wunewe'' 38 Pamwanya yakwe pamile pe pasimbilwe amazwi ge gakuti ''UNU WE MWENE WA BHAYAUDI.'' 39 Weka mubhomba mbibhi bhala ahamuliga ahati, ''Iwete we Kristi? Yiposhe wunewe nitwe'' 40 Ilelo uwa mwabho ula ahamuhajila ahati, ''We utakumwogopa Umulungu, twenti tulongilwe shiholo sheka? 41 Itwe tuhondeye kuposhela ulufundo ulu kunongwa iyimbibhi zye tubhombile, ilelo unu. atabhombile ibhibhi na nalilo.'' 42 Pa hati, ''We Yesu, ukumbushe weukwinjila mu wumwene waho.'' 43 U Yesu ahamwamula, ''Ahati, inkukubhuzya kuti, umusayunu utibhe peka nine kushinamwe.'' 44 Kwandila isala iya mutanda, kufiha mu saa tisa ahisi hagubishiye insi yonti, 45 Izubha litahalama. Igolole lihadebuha pabhili kufuma kumwanya kwiha pasi. 46 Ahalila nhani ati, u Yesu ahati, ''Tata nabhiha uwumi wani mu yobhe zyaho, ''We alonga gangago ahafwa. 47 Umupiti walola zye zyabhombeha ahamupala Umulungu ahati, ''Nalyoli umuntu unu amile mugolosu.'' 48 Abhantu bhonti bhebhabhunganile pala we bhazilola zye zya bhombeha, bhahagalula bhahayihoma ku vifubha vwabho. 49 Habhili bhe bhamanyani bhakwe, peka na bhantanda bhe bhahamulandataga kufuma ku Galilaya, bhimiliye ukutali bhahenyaga zye zikubhombeha. 50 Alipo, we bhahatinji wu Yusufu, amile weka mu bhapiti amile mugolosu nuwayoli, 51 ( Atitinhine na bhamwabho), kufuma Arimathaya, munhaya iya bhayaudi, ahasubhilaga uwumwene wa Mulungu. 52 Umuntu unu ahamu palamila u Pilato, ahamulabha umubhili wa Yesu. 53 Ahabhala kwisya, ahawisyempa nu mwenda ahamubhiha mu mbipa ye yabanilwe mumawe, bhatasyiliye umuntu nalumo. 54 Isiku lyamile lisiku ilya kulinganya , isabato yamile papipi. 55 Abhantanda, bhebhizile kufuma ku Galilaya, bhahamulandata, bhahayilolela imbipa na bhahalola pe bhamulambalishile. 56 Bhahagaluha kuhaya bhahalinganya amafuta nu mulembo. pisiku ilyi sabato bhahatuzya anza shindajizyo zikulajizya.