¹ Isiku limo ilyi sabato, ahabhala kulya isha kulya kuhaya kwa mlongozi uwa bha Farisayo bhahamtejelaga papipi. ² Pilongolela, alipo umundu umo wali nuwubhinu uwa kwizula. ³ Pe u Yesu ahabhabhuzilizya abhafarisayo, ''Nabhamanyizyi abhi ndajizyo ahati hinza bhulo kuponnwa isiku ilyi sabato, bhaga hala?'' ⁴ Abhene bhahapumamye u Yesu ahamupalamasya, ahamuponia ahamwitishizya kusogola. ⁵ Ahabhabhuzya, ''Wunanu kukwinyu we umwana wakwe awe ing'ombe yakwe yalendela mushindinkwi isiku ilyi sabato atangamwefwa nalubhilo?'' ⁶ Bhatahabha ni lya kwamula kulinilyo. ⁷ U Yesu ahenyaga abhajeni bhebhalanjiliwe bhahasebhaga amatengo aga bhapiti, ahabhabhuzya ishiholanyo ahati, ⁸ ''Inga umuntu akulanjiye ku weji utahatale kwihala apa bhapiti kunongwa ye lumo alanjililwe umupiti uwuji kushila iwe. ⁹ Inga ayinza we abhalanjiye imwe mwenti bhabhili ati kubhuzye iwe atiti musegushile unu pe uyihaye, utulole insoni nhani, ''Wukubhala kulusalo. ¹⁰ Lyoli anga walanjilwa uyihalaje palusalo anga yinza we akulanyiye, akubhuzye kuti, weye manyani wani nzaga pilongolela , ipo pe wutilileshe uwupiti waho. ¹¹ Kwekuti we akuyi zuvwa ahayimwisya, wope wakuyisya ahayimuzuvwa.' ¹² Pe u Yesu ahamubhuzya we amulanjiye wu kufumwa ishakulya isha kulya isha shamusanya au ishalyabhela, utahabhabhili shile abhaholo bhaho awe abhapalamani bhaho bhebhandumbwe kuti bhopo bhatahakulanjile kunongwa iyakutabhulizya. ¹³ Lyoli we kulinganya ishikulukulu, bhalanjile, abhapina, abha shilema, na bhapubhila, ¹⁴ Niwe putibhe nulusayo kunongwa yebhatali nihakukusomba. We ahayikusomba ahabhalilo he ahayibhazuzya abhagolosu.'' ¹⁵ Umulanjilwa umo we ayivwa amazwiga Yesu ahamubhuzya ahati, ''Alikwashi we ahayilya ishikulukulu mumwene wa Mulungu!'' ¹⁶ U Yesu ahamwamula mushiholayo, alipo umuntu umo we alinganyinye ishikulukulu ishipiti, ahabhalanjila abhandu abhinji. ¹⁷ Ahabhalilo ishikulukulu we hafiha, ahamusondeleza umutumwa wakwe kubhabhuzya bhebhalanjiye kuti, ''Nzagaji, ivintuvilinganye.' ¹⁸ Bhonti, bhahati te bhabhale. Uwakwanda ahati ikalile ishizi, inkubhala kwenya untuyile.' ¹⁹ Uwamwabho ahati, 'Inkalile ing'ombe ishumi, inkubhala kuzilinyizya. Untuyile.' ²⁰ Wope uwa watatu ahati, 'Inejile umushi, na ntuyile intakwinza.' ²¹ Umutumwa ahagaluha ahamupanjila zyonti umwene wakwe. Pe umwene ula ahavitwa ahamubhuzya umutumwa wake, 'Bhalaga na lubhilo mumbalambala na mutugala utwa munhaya ini ubhale te abhapina, abhashilema na bhebhatakulola.'' ²² Umutumwa ahati, ''Mwene, zyewandajizizye nabhomba ilelo ipa kwihala pasyalile.' ²³ Umwene ahamubhuzya umutwa ahati, 'Bhalaga kunzi iyi uhaya mumbulambala na mumadala ge gakubhala mutunhaya na muvwizi, ubhambijile abhandu bhinze munyumba yani iyizile. ²⁴ Inkubhabhuzya kuti, bhanabho bhena bhalanjiye kuwandilo atalipo numo we ahayilya ishikulukulu shani. ' ²⁵ Pe impuga impiti yihabhalaga peka inawo, ahagaluhana ahabhabhuzya, ²⁶ ''Umundu wowonti we akwinza kungana ine akumugana uYise wakwe, uyina wakwe, umushi wakwe, abhana bhakwe, abhaholo bhakwe, na bhayilumbu bhakwe habhili akwinza kungana ine kushile she akuyigana wuyo. ²⁷ Umuntu wowonti watakupimba ishihobhe hayo shakwe na kuntandata ine na kuyimba pope yibhe iyakufwa. ²⁸ Wunanu kukwinyu, wa kwanza kuzenga inyumba intali akutala kusibhasuti ivintu vwonti vwe vikwanziwa kusenjela ivwa kumala kuzenjela? ²⁹ Sita kubhomba shinisho, angahola kuzenga ulwaho lwene, angapotwa kumalilizya kuzenga, bhanganda kumuseha, ³⁰ Bhakutinji, umuntu unu ayandile kuzenga ilelo apotwa kumalilizya.' ³¹ Awe abhamwene bhabhili bha kuyilinganya kulwa, uwakwanda ali na bhasikali ielufu ishumi bhulo, uwa wubhili alinabho ielufu amashumi gabhili uwakwanda atakwikala suti kusibha she angahola kulwa na kumutola we alina bhasikali ielufu amashumi gabhili? ³² Angalola kuti atolwa angasontelezya abhavwi bhakwe bhabhale kwa mwene wabho she ali ukutali kulamba kuti bhivwane. ³³ She zili na kukwinyu, atalipo kukwinyu we ahondeye kubha mulandata wani, anga atavileshile vwonti vwe ali na vwo atagabha mulandata wani. ³⁴ Ibheya hantu hinza, ilelo anga lyanajiha, litangabha nuwunonu uwi bheya winza? ³⁵ Litali ni mbombo kulusuto, pope kubhahanti iha kuvunzya. Lyoli kutagwa ukutali ula wa kwivwa asimishizyaje nhani zye akuzyivwa.''