¹ Abhasonshezya nsonho na bhabhomba mbibhi abhanji abhinji bhahabhunganaga kwa Yesu kumutejelezya . ² Pe abhafarisayo na bhamanyizyi abhi ndajizyo bhahayibhunazyaga bhahatinji honi umuntu unu akusangana na bhabhomba mbibhi bhabhili akulya nabho.'' ³ U Yesu ahabhabhuzya ishilolanyo ishi ahati. ⁴ ''Wenu kukwinyu, wali ni ngole imia anga tezya yeka atangazileha izinji zila amashumi tisa ni zyamwabho tisa na kubhela kwanza ye yitejile paka ayaje? ⁵ We ayilola akuyibhegala pa shipungo kuluseshelo. ⁶ Nakugaluha inayo kuhaya pe akubhabhilishili abhamanyani na bhapalamani nakubhabhuzya kuti seshelaji peka nine kunongwa ye ingole yani ye yetejile nayaga.' ⁷ Inkubhabhuzya kuti shinisho she yitibhe luseshelo lupiti kumwanya, we umubhomba mbibhi weka we akulata imbibhi kushila kubhantu amashumi tisa na bhamwabho tisa bhebhatakwanza kuti bhangalata. ⁸ Tuli umwantanda umo ali ni nhela, insabhazya ishumi, inga lelo inhela yeka ya tejile, akuhozya uluhozyo na kwusa inyumba akwanza paka ayaje? ⁹ Weayaya akubhabhilishila abhamanyani na bhapalamani seshelaji peka nine kunongwa ye inhela yani yeyatejile na yaga. ¹⁰ Inkubhabhuzya kuti shinisho she abhahabhizya bha Mulungu bhakuseshela we uwimbibhi weka wa alata imbibhi.'' ¹¹ u Yesu ahabhabhuzya, ''Umuntu umo amamile na bhanabhabhili. ¹² Umwana umunsi ahabhala kwa Yise we tata inkulabha umpe uwugali wani pu yise wakwe ahabhagabhili uwugali wabho. ¹³ We zyashila insiku nyishe umunsi ula ahabhunganya ivintu vwakwe vwonti ahabhala kunsi iya kutali ahanda kubhombela ahabhibhi ishuma shakwe paka ahamala shonti. ¹⁴ We amala shonti inzala yihagwa munsiyila ahanda kwelela. ¹⁵ Pe ahabhala kwa muntu umo uwa munsi yila ahalabha ishibaluwa, ahamtwala kushizi kuzubhila ingulubhe. ¹⁶ Amamile ni nzala ahasuhaga kulya amagola ge zihalyanga ingulubhe ilelo atalipo numo umuntu watamupiye ahakulya. ¹⁷ We itwe lyakwe lyiguha ahati abhabhomba mbombo bhonti abha Yise wani bhakulya vikutola inkufwa ipa ninzala! ¹⁸ Ishi intigalushe kwa, 'Tata na kumubhuzya kuti we tata imuntulije Umulungu inkutuliye na wunewe. ¹⁹ Ishi intahondeye kubha ne mwana waho umbishe imbe weka wa bhabhomba mbombo bhalo.'' ²⁰ Pe ahasogola ahagaluha kwa Yise wakwe. We apalamila kuhaya uyise wakwe ahamu lola ukutali ahamulolela ishisa ahabhala akushimbila ahamu kumbatila na kumutambila. ²¹ Umwana ula ahamubhuzya uyise wakwe ahati, 'Tata imutuliye umulungu niwe ishi intahondeye kubha na mwana waho.' ²² Ilelo Yise wakwe ahabhabhuzya abhatumwa bhakwe, ²³ 'Letena lubhilo amenda aminza mu kwatizye mukwatizye nulusahala muhasamba ni vilyatu muvinama. ²⁴ Mwenye ing'ombe yila iyinza mubhole. Tubhishe ishikulukulu. ²⁵ Abhalilo hamaho . Umwana wakwe umusongo amile kushizi we akugaluha apalamila papipi ni nyumba ahivwa bhakwimba na kushimwa. ²⁶ Ahamubhilishila umubhombi umo ahamu bhuzilizya kuli honi? ²⁷ Ahamubhuzya ahati umunsi waho ayinzile uYise waho amugojeye ing'ombe inyinza kunongwa ye mwumi bhulo.' ²⁸ Umwana umusongo ahavitwa atahanzaga kwinjila munyumba uYise ahafuma panzi kumulambilizya. ²⁹ Ilelo ahamwamula uYise wakwe ahati, 'Yenya ine amaha gonti iga nabhomba imbombo, ipa habhili intalinjile kukusholanya nalumo, ilelo utampiye nalumo pope ahabhuzi kuti inseshele peka nabhamanyani bhani. ³⁰ Lyoli we ayinza umwana waho unu we abhombeye ahabhibhi ishuma shaho peka na bhabhembu umugojeye ing'ombe inyinza. ³¹ UYise wakwe ahamubhuzya ahati, 'Mwana wani, iwe ulunine insiku zyonti vwonti vwe indi navwo vwaho. ³² Ishi tukwanziwa kuseshela na kubhiha ishikulukulu, kunongwa ye umunsi waho atejile ishi alolela.''