¹ Кэ Ио́на сыс лав Я́хвэ ави́р мо́ло, соб тэ пхэнэ́: ² «Вшты и джя дэ Нине́вия баро́ фо́ро и роспхэ́н лэ́нгэ лав, саво́ Мэ пхэндё́м ту́кэ». ³ И вштыя́ Ио́на и гия́ дэ Нине́вия, сыр пхэндя́ лэ́скэ Я́хвэ. А Нине́вия сыс барэ́ форо́са кэ Дэвэ́л, трин дэвэ́с тэ джя́. ⁴ И пхирэ́лас Ио́на пир фо́ро саро́ дэвэ́с, и роспхэнэ́лас манушэ́нгэ: «Проджя́ла сара́нда дэвэ́с и Нине́вия авэ́ла розмарды́!» ⁵ И патя́ндынэ мануша́ савэ́ дживэ́нас дэ Нине́вия дэ Дэвлэ́стэ, и пхэндэ́, соб сарэ́ тэ лэн по́сто, и уридэ́пэ барэ́ндыр кэ тыкнэ дэ и́дя гонэ́стыр. ⁶ И догия́ дава́ лав кэ хула́й (царё) ^# Нине́вии. И вштыя́ пэ́скирэ штэто́стыр, слыя́ хулаи́тко ^# и́дя пэ́скири и уридя́пэ дэ и́дя гонэ́стыр и бэстя́ дэ пра́хо. ⁷ Ёв пхэндя́ пир сари́ Нине́вия лав царё́ско и лэ́скирэ манушэ́нго: «Мэк ни мануша́, ни скоти́на, ни гурува́, ни бакрэ́ нисо́ тэ на хан и паны́ тэ на пьен, ⁸ и мэк авэ́на учакирдэ́ дэ и́дя гонэ́стыр мануша́ и скоти́на, и мэк мангэ́нпэ дрыва́н ко Дэвэ́л, и мэк сарэ́ отрисё́на пэскирэ́ндыр на́ лаче делэ́ндыр и тэ на тасавэ́н манушэ́н. ⁹ Нико́н на джинэ́л, Дэвэ́л залэ́ла Пэ́скири хо́лы палэ́ и заракхэ́ла амэ́н, отлыджя́ла амэ́ндыр Пэ́скири хачкирды́ хо́лы, и амэ́ на хасёва́са, чи на». ¹⁰ Дэвэ́л удыкхья́ лэ́нгиро джюипэ́н, со ёнэ́ ачадэ́ пэ́скирэ на́ лаче де́лы, и сыкадя́ лэ́нгэ Пэ́скиро ковло́ ило́, и на хаскирдя́ адалэ́н манушэ́н сыр ракирэ́лас.