¹ И росхоля́сыя пал дава́ Ио́на барэ́ холя́са и исы́с дрыва́н холямо́. ² И помангья́пэ ёв Дэвлэ́скэ и пхэндя́:«О Я́хвэ! На пхэндё́м мэ дава́, сыр сыс дэ пэско́ фо́ро? Пал дава́ мэ и праста́ндыём дэ Фарси́со, мэ джиндё́м, со Ту — Дэвэ́л саво́ кэрэ́с лачипэ́н и Ту ковло́ илы́тко и Ту́тэ бари́ зор тэ зрикирэ́ Пэс, барвало́ илэ́са и Ту на камэ́с, соб тэ авэ́л би́да. ³ А кана́, Дэ́вла, залэ́ миро́ джиипэ́н ма́ндыр, пал дава́, со ма́нгэ хвэды́р тэ мэра́в, и тэ на́ дживав. ⁴ И пхэндя́ Я́хвэ: «Со тут дя́кэ холякирдя́ дава́?» ⁵ И выгия́ Ио́на форо́стыр и тэрдыя́ пэ вовсто́чно бо́ко форо́стыр, и кэрдя́ одо́й пэ́скэ ша́тра, и бэстя́ дэ ла́тэ кхамэ́стыр, соб тэ дыкхэ́, со авэ́ла форо́са. ⁶ Выбарьякирдя́ Я́хвэ Дэвэ́л бари́ чар. Ёй гадыя́пэ паш Иона́стэ, соб паш лэ́ско шэ́ро тэ на пэ́кэл кхам, и соб тэ оджя́л лэ́стыр холы́. Ио́на сыс лошало́ адалэ́ чарья́кэ барэ́ лоша́са. ⁷ Пэ ави́р дэвэ́с Дэвэ́л бичядя́ кирмэ́с тэ подха́л дая́ чар, и ёй зашутия́. ⁸ И и́сыс дя́кэ, со сыр кхам выгия́, Дэвэ́л бичадя́ таты́ бава́л. И кхам лыя тэ пэкэ́л шэро́ Иона́скэ дя́кэ, со лэ́стэ на сыс зор и ёв мангья́, соб лэ́скэ тэ мэрэ́, ракирдя́: «Хвэды́р мэ тэ мэра́в, тэ на́ дживав». ⁹ И пхэндя́ Дэвэ́л Иона́скэ: «Со ту дрыва́н холя́сыян пал-дая́ чар?» Ёв пхэндя́: Мэ дрыва́н холя́сыём, со на кама́м тэ джива́в». ¹⁰ И пхэндя́ Я́хвэ: «Ту́кэ дор дая чар, кай ту нисо́ на кэрдя́н и на барьякирьдя́н ла, сави́ пал ек рат явья́ и пал ек рат хасия́. ¹¹ Сыр Мэ тэ на́ зракхав Нине́вия — баро́ фо́ро, дэ саво́ дживэ́н буты́р шэл биш ^# мануша́, савэ́ на джинэ́н кай пра́во васт кай ле́во васт и одо́й бут ско́то?»