¹ De ublaa Pentikossǝz zaa, ipu ar mukǝ ii yas. ² Sei i gee vonsa diga bilǝ paari ni zaka wiitak sǝ yi'is gwaaga i pinnak. ³ Sei me̱'te uri ni ra'ak i gbetǝ sǝ i tii koone̱e̱rǝ paa ya. ⁴ I yi'is naa Rumsa Billǝs yas sǝ i ma' paka naa me̱'te uri ni Rums esni ina pagag. ⁵ Arkirǝ yahudaawai uri i pii i gau urshaliima, mariya i serum Billai, diga dǝrme so̱maso̱. ⁶ De i gee vongsa eki, bansa mariyi i tookǝn ar mukǝ sǝ i sakle wessawe no̱k koone̱e̱ya geei ipu pakrǝ naa mé̱é̱la gwandǝl. ⁷ Mǝssǝm kami wessawe; i doo géé, Zǝmazi, iya ai yas iya i pag naa Galiilimmaiyi pa ya? ⁸ No̱k an sǝ e geei pakrǝ naa mé̱é̱la eerǝ dǝllǝl ya? ⁹ Faristiyaawai, naa Madayaawai naa Elamaawai, naa iya Bagadaazai naa Yahuudiya naa kafaddokiyaa Fantas na Asiyaz, ¹⁰ Firziyaawai naa Bamfiliya, naa Masar naa ata Libiyaa Siiriyaz,naa iya i keetǝ Rommai, ¹¹ Yahudaawai naa iya i tor Yahudaawamrǝi, Karitaawai naa Larabaawai yas, e geei dook pakrǝ endǝ me̱'terǝ tomteya gbi'kiya Billǝirǝ paa." ¹² Mǝsǝm kai i yas sǝ i saklǝ sǝ doo geé, "Anni ri'ariya?" ¹³ Ama uri i bo̱si gadǝmi géé, I puutǝn wakki." ¹⁴ Ama Biiturus naa iya komna naa muzǝz ai i ruu, tǝg gwera sǝ doosi géé, "Mariya Yahuudiyai naa iya i gau Urshaliimai yas, gamn naa me̱e̱ka: ke̱'en to' paka miikrǝ. ¹⁵ No̱k mariya ai wakki bo̱'ri ni i sundunak pa, no̱k rikai we̱e̱s piti muzǝzi kotto. ¹⁶ Ama ina doo zok su' a Joyel Saaza Billǝzzinni: ¹⁷ Bil doo géé ru'a ɓamnarǝirǝ, n kuutuk rumsa miis marirǝ yas, yanga yaramari naa kitaki' a ii í dook ina bo̱'rumka mu'un, gǝ yanga gbami naa yanga nuiya ii í rudǝk rudum. ¹⁸ Gǝ dǝnnirǝ se̱niya miirǝ yariyai naa a ki'kiyairǝ in kuutǝk Rumsa miis sǝ i doo ina bo̱'rǝmka mu'un. ¹⁹ N yiik neta mǝsǝmdǝt billǝ paa naa dǝllǝ te', kwaal, ra', naa rusa ye̱e̱mrǝm. ²⁰ Ubla yerǝk tǝgra sǝ se'raasa yerǝk kwaal, ublaa gbi'ka Bill kaasak nabo zaa. ²¹ Bo̱'rumka kala ura de̱r ri'ra Daa Billǝl sepsǝk. ²² mariya Israilai geen paka ak: Yeeso maza Nazarat, maza Bil essu gbi'kǝm tomteya Bil bo̱'ri naa a ullǝkrǝ indǝ te' ni i me̱e̱nak, ²³ no̱k ina Bil digtǝ ullǝ paan naa me̱e̱ka gwandǝk i esu, ii boo no̱k i mariya i e̱ngnaiyi, i ɓaau sǝ i ipsu; ²⁴ sǝ Bil ruutu, de pe'supu gombaa ullǝ wǝrkrǝk no̱k wǝrk le' sǝ kamu pa. ²⁵ Dauda doo ullǝ paa géé, 'N og Daa miiz koobǝnnaya mindǝ mu', no̱k pu popsa na' go̱'naa miikrǝ no̱k bo̱'ta una lamse. ²⁶ No̱k riik timra miil pu naa yaksa zok gǝ me̱e̱la miil gee tingnum. Gǝbǝn zoka miik gau naa gbam. ²⁷ No̱k a daak zǝngsa miis gagǝllǝ pa, koo a daak ura na oosas sǝ bum pa. ²⁸ A yiisepu bilǝta zǝngsǝk; a yi'iske naa yaksa zok mondǝ mu'.' ²⁹ Ori yangi, n dooskǝn pak domda Daudarǝ paa, wǝr sǝ i ìiu, gagǝra ullǝl pu andǝ te' haa wo̱nka. ³⁰ Ur saaza Billǝzzi, me̱e̱me̱n Bil gba'tǝmsǝpu na gba'tǝmka géé ullǝ seegrǝzi sǝ i keetǝk ura gakp gwantaz. ³¹ Og eni ɓala sǝ doo ruuka robaama Kweebaazǝmdǝ, "I daatu gagǝllǝ koo zoka ullǝk bum pa." ³² Gwan Yeeso zi, Bil ruusu, ee yas sedaakuiyi. ³³ De i tǝgu paari na' go̱'naa Billǝkrǝ de kweetǝ dokaa Rumsa Billǝssǝ diga Daarǝ, kuutǝpu sǝ i og sǝ i gee. ³⁴ Dauda dǝg billǝ paa pa, ama doo géé, " Daa a miiz doosǝ daa, 'Gam na' go̱'naa miikrǝ ³⁵ sei mina yerpu umkeereiya mo̱o̱ in de'esna dǝnta mo̱o̱t.'" ³⁶ No̱k riik israilai yas ina me̱e̱ ge Bil de'supu daa na kweebaaz, gwan Yeeso a i ɓaauwas. ³⁷ De i gee rii, pakki vagi timlǝ sǝ i doosǝ Biiturus naa to̱mbaiya i seetǝi géé "Uri yangi, e bo̱'ōk anya?" ³⁸ Sei Biiturus doosi géé, "Koo ne̱e̱ya na Pu'un na' ina bo̱'sǝn batisma riira Yeeso Kweebaazǝ no̱k ra'sǝskaa hakkeiya iirǝk, sǝ i kin esǝka Rumsa Billǝssǝk. ³⁹ No̱k dokaki iirǝ naa yaqngiya iirǝ, naa uri gǝnnga iya ipu ar ye'nai ni Daa Billa aal de̱tkǝnik. ⁴⁰ Naa panng uma gǝnnga sǝ doosi pak sǝ bagsi gbam, doosi géé, "Kween zuta iit diga e̱nka baasa assǝ." ⁴¹ Sei i kwee paka ullǝk sǝ i bo̱'si batisma, mari mù' taarezi i bag zok ublaa ekirǝ. ⁴² I ree mu' naa naa dakska zur naa geeka kubruskǝnaa to̱mbairǝk, naa wǝ'gǝska buroodi naa we̱e̱rǝka Billǝ. ⁴³ Ser kam koo ne̱e̱ya, na gǝ i bo̱'rǝ neta mǝsǝmdǝt gǝnnga to̱mbairǝ na'rǝ. ⁴⁴ Iya i esǝ timrai i dakǝn ar mukǝ sǝ i mar ina pisin gwanirǝ te'. ⁴⁵ I yingǝ neta iit sǝ i mas yas ni koo ne̱e̱ya íik. ⁴⁶ Koo bǝnnaya i ree mu' naa sundume muyo Gwaaga Billǝkrǝ sǝ i regǝ rek gwaamdǝ, sǝ i mar rek naa yaksa zok naa tiiska zur; ⁴⁷ i noos Bil sǝ i kin go̱'num marirǝ yas. Daa Bil Bagsi dakaa iya i kinsapu keeskairǝ kala ubla.