¹ Biiturus naa Yohana ipu rekrǝ Gwaaga Billǝkrǝ bǝlla we̱e̱rǝka Billǝllǝ. ² Maz uza pii lendǝzǝz diga ullǝ dingtǝ, i kamtu koobǝnnaya sǝ i gbagu sugognaa Gwaaga Billǝ i de̱e Ookapakrǝ sǝna oorǝ oorǝk mariya i tork Gwaaga Billǝkrǝ. ³ De og Biiturus naa Yohana torǝkrǝ Gwaaga Billǝkrǝ, oori una. ⁴ Biiturus naa Yohana i Pa'susu no'rǝ i doo géé, "Gwenmee." ⁵ Lendǝzzi gweni me̱e̱ géé i eskubo una. A ⁶ ma Biiturus doosu géé, "we̱e̱s gǝ pisee pa, ama n eska ina pisen. Ruum paa ri'ra Yeeso Kweebaaza Nazarattazzǝ a ri'gǝ." ⁷ Sei Biiturus kamu na'rǝ go̱'narǝ sǝ ruusu paa: Ni umkpa norak dǝnta ullǝt naa nǝna ullǝ gbullikiirǝi i kin gbam. ⁸ Gir sǝ lees paa sǝ ma' ri'gǝt; tor naa Biiturus naa yohana Gwaaga Billǝkrǝ pu ri'gǝttǝ naa gidǝmka, sǝ noos Bil. ⁹ Mari yas i ogu ri'gǝttǝ noosǝk Billǝ. ¹⁰ I me̱e̱gǝsapu géé maza gau sugognarǝ dii gwaaga Billǝkrǝ sǝ oorǝ oorǝkkazzi; i yi' naa mǝsǝm no̱k ina bo̱'rǝm naa uran. ¹¹ Pii pin kamkp Biiturus na Yohanarǝ, mari yas i nog irrǝ ara i pinnakrǝ naa mǝsǝm. ¹² De Biiturus og rii, doosǝ mariyi géé, "I mariya Israilai,no̱k an sǝ mǝssǝm kamǝn ya? No̱k an sǝ i pa'sǝssee no'rǝ ni eyi e go̱'su naa gbam koo le'kaa eek ya? ¹³ Billa Ibraahim, naa Ishaaku, naa Yaakubu, Billa daiya aairǝi, no̱o̱sapu se̱nza ullǝz Yeeso. Uzi ura i esu sǝ i mu'su Bilaatussǝ mu'uz de i fasskuz. ¹⁴ I mu'us ura Oomi naa gongaakummaz, sǝ i laa ina fassǝn ibba zur sǝ i faasǝnuu. ¹⁵ I iu waa gwanza zǝngsǝz: Bil ruusu diga robaamrǝ; eeyi sedaakuiya rooi. ¹⁶ Ri'ak eska timr ullǝ riillǝ gǝnnaa maza az naa gbam, ura i ogu sǝ i me̱e̱uwaz. Rii, eska timra ullǝ Yeesorǝl essupu zoka ɓaiyak indǝ mu' yas. ¹⁷ Ri'ak oriyangi n me̱e̱ i bo̱'rǝ netti mǝ'ǝmrǝ te' zi ni gǝ do̱o̱niya iiyak. ¹⁸ Ama neta Daa Bill doo ɓala saariya ullǝirǝ at, géé, Kweebaaz ɓǝrk baarat yi'sapu ri'ak. ¹⁹ No̱k riik, pu'un na' sǝ i yetǝ sǝ ina ra'sǝssǝn hakkeiya ii sǝ i kinǝ pǝ'kǝm Billǝ mu', ²⁰ no̱k sǝ tomtǝk Kweebaaz ura i kaau no̱k iiz, Yeeso. ²¹ Uzi ura kwee zok paariz haa sei bǝlla i gǝnkǝn koo anya a Bil doo saariya ullǝ do̱o̱irǝ. ²² Muusa doosapu géé, "Daa Bil ruusǝk saaz uza ni miik indǝ zeeurǝ te'. I ke̱'e̱k to' ina dooskǝnnandǝ yas. ²³ Goog koo ne̱e̱a ke̱' to' saazirǝ paz i wo̱'o̱sku vinnga marirǝ te'. ²⁴ Rii, Saari yas diga Samuilarǝ naa iya i gbo'tǝ ullǝ sa'ii, íi yas i doosapu ru'a airǝ paa. ²⁵ Iiyi yangiya Saari rǝi naa a dokaa Bil bo̱'rǝ naa domdaiya iiyak, ni doosǝn Ibraahim géé 'Mo̱o̱rǝ zeeurǝ zi sǝ mariya dǝllǝi i kink sǝ̀'sǝm. ²⁶ De Bil ruutǝ se̱nza ullǝz, se̱e̱ tomtu irrǝ sǝna sǝ̀'sǝn naa yerka koo ne̱e̱ya iirǝ te' diga e̱nkuwa iiurǝ."