Maskilan'i Asafa. 1 Ry Andriamanitra, nahoana Ianao no nandà anay mandrakizay? Nahoana ny hatezeranao no mirehitra amin'ny ondrin'ny valanao? 2 Tsarovy ny olonao, izay nenjehinao tamin'ny fotoana lasa, ny foko izay novonjenao mba ho lovanao, ary ny Tendrombohitra Ziona, izay honenanao. 3 Tongava mijery ny faharavana tanteraka, ny faharavana rehetra izay nataon'ny fahavalo tao amin'ny toerana masina. 4 Ireo mpifanandrina aminao dia mierona eo afovoan'ny toeranao voatondro; mametraka ny sainan'ny ady izy ireo. 5 Manapaka amin'ny famaky tahaka ny any amin'ny ala matevina izy ireo. 6 Mamotipotika sy mamaky ireo sokitra rehetra izy ireo; vakian'izy ireo amin'ny famaky sy maritoa ireo. 7 Doran'izy ireo ny fitoeranao masina; manimbazimba izay honenanao, amin'ny fanjerana amin'ny tany izy ireo. 8 Hoy izy ireo any am-pony hoe: "Ho ravantsika izy rehetra." Nodoran'izy ireo avokoa ireo toerana fihaonanao rehetra tao amin'ny tany. 9 Tsy nahita famantarana intsony izahay, tsy nisy mpaminany intsony, ary tsy misy na iza na iza aminay mahafantatra ny faharetan'izany. 10 Mandra-pahoviana, ry Andriamanitra, no haniratsira Anao ireo fahavalo? Hiteny ratsy ny Anaranao mandrakizay ve ireo fahavalo? 11 Nahoana Ianao no mitazona ny tananao, ny tananao ankavanana? Esory ao amin'ny akanjonao ny tananao ankavanana ary ravao izy ireo. 12 Fa mbola mpanjakako tamin'ny fotoana lasa Andriamanitra, nitondra famonjena tamin'ny tany. 13 Nozarainao tamin'ny herinao ny ranomasina; efa namakivaky ny lohan'ny dragon'ny ranomasina tao anaty rano ianao. 14 Namaky ny lohan'ny leviatana Ianao; nofahananao ho an'ireo izay nonina tany amin'ny tany efitra izany. 15 Nampikoriana ireo loharano sy renirano Ianao; nampamaina ireo ony mikoriana Ianao. 16 Anao ny andro, ary Anao ihany koa ny alina; nametraka ny masoandro sy ny volana tamin'ny toerany Ianao. 17 Nanao ny sisin'ny tany rehetra Ianao; nanao ny fahavaratra sy ny ririnina Ianao. 18 Tsarovy ny fomba naniratsiran'ireo fahavalo Anao, ry Yaveh, fa ireo olona adala ireo dia niteny ratsy ny Anaranao. 19 Aza apetraka eo amin'ny bibidia ny fiainan'ny voromailalanao. Aza adinoina mandrakizay ny fiainan'ireo olonao nampahoriana. 20 Tsarovy ny fanekenao, fa feno toeran'ny herisetra ireo faritra maizin'ny tany. 21 Aza avela hiverina amin'ny fahamenarana ireo nampahoriana; aoka ny mahantra sy nampahoriana hidera ny Anaranao. 22 Misandràta, ry Andriamanitra; arovy ny voninahitrao; tsarovy ny fomba naniratsiran'ireo adala Anao tamin'ny andro rehetra. 23 Aza adinoina ny feon'ireo mpifanandrina aminao na ny tabataban'ireo izay mihantsy Anao tsy an-kijanona.