Salamo faha 57

1 Ho an'ny mpiventy hira; natao Al-Tasheth. Salamo nataon'i Davida. Miktama; rehefa nandositra an'i Saoly, tao an-johy izy. Mamindrà fo amiko, ry Andriamanitra, mamindrà fo amiko, fa hialoka aminao aho ambara-pahavita an'izao fahoriana izao. Mitoetra ao ambany elatrao aho mandra-pitsahatr'izao faharavana izao ho fiarovana. 2 Hihiaka mafy an'Andriamanitra Avo Indrindra aho, amin'Andriamanitra, izay manao ny zavatra rehetra ho ahy. 3 Handefa fanampiana avy any an-danitra Izy ary hamonjy ahy, tezitra amin'ireo izay mamely ahy Izy. Sela. Andriamanitra handefa ny hatsaram-panahiny sy ny fahatokisany amiko. 4 Eo amin'ireo liona ny aiko; eo amin'ireo izay vonona handrapaka ahy aho. Eo amin'ireo olona izay manana nify lefona sy tsipìka, ary izay manana lela sabatra maranitra aho. 5 Misandràta, ry Andriamanitra, ambonin'ny lanitra; aoka ho eo ambonin'ny tany rehetra ny voninahitrao. 6 Namelatra arato ho an'ny tongotro izy ireo; ory aho. Nihady lavaka teo anatrehako izy ireo. Ary ny tenan'izy ireo ihany no nianjera tao afovoan'izany! Fiatoana sy fiderana. 7 Tafatoetra ny foko, ry Andriamanitra, tafatoetra ny foko; hihira aho, eny, hihira fiderana aho. 8 Mifohaza, ry foko mendrim-piderana, mifohaza, ry valiha sy lokanga; hofohaziko ny mangiran-dratsy. 9 Hanome fisaorana anao aho, ry Tompo, eo amin'ireo vahoaka; hihira fiderana ho Anao aho eo amin'ireo firenena. 10 Fa lehibe ny fitiavanao tsy mety levona, manakatra ny lanitra; ary ny fahatokianao manakatra ny rahona. 11 Misandràta, ry Andriamanitra, ambon'ny lanitra; ny fahasoavanao anie hisandratra manerana ny tany manontolo.