Toko faha 3

1 "Indro, efa mby handefa ny irako Aho, ary izy dia hanomana ny lalana eo anoloako. Ka dia ho avy tampoka ao amin'ny tempoliny ny Tompo izay tadiavinareo. Ilay iraky ny fanekena izay hankasitrahanareo, indro, ho avy izy," hoy Yaveh Tompon'ny maro. 2 Fa iza moa no hahavita hiaritra ny andro hahatongavany? Iza no hahavita hijoro rehefa hiseho Izy? Fa Izy dia ho tahaka ny afon'ny mpandrendrika sy savony fanasam-damba. 3 Hipetraka toy ny mpandrendrika sy mpanadio volafotsy Izy, ary hanadio ireo zanaka lahin'i Levy. Handrendrika azy ireo toy ny volamena sy volafotsy Izy, ary hitondra fanatitry ny fahamarinana ho an'i Yaveh izy ireo. 4 Ary ny fanatitr'i Joda sy Jerosalema dia ho hankasitrahan'i Yaveh, tahaka ny andro fahiny, sy tahaka ny taona taloha. 5 Dia ho avy Aho hitsara anareo. Vetivety Aho dia ho tonga vavolombelona hanohitra ireo mpisikidy, mpijangajanga, vavolombelona sandoka, ary hanohitra izay mampahory ny mpiasa amin'ny karamany, ireo izay mampijaly ny mpitondratena sy ireo kamboty, hanohitra izay nandà ny vahiny, ary hanohitra ireo izay tsy manome voninahitra Ahy," hoy Yaveh Tompon'ny maro. 6 "Fa Izaho, Yaveh, dia mbola tsy niova; noho izany ianareo, ry zanaka lahin'i Jakoba, dia tsy ho tratra farany. 7 Hatramin'ny andron'ireo razambenareo dia nandà ny didiko ianareo ary tsy nitandrina izany. Miverena amiko, dia hiverina aminareo Aho," hoy Yaveh Tompon'ny maro. "Fa hoy kosa ianareo hoe: 'Amin'ny fomba ahoana no hiverenanay?' 8 Misy olona handroba an'Andriamanitra ve? Saingy mandroba Ahy ianareo. Fa hoy ianareo hoe: 'Tamin'ny fomba ahoana no nandrobanay anao? Tamin'ireo ampahafolon-karena sy ireo fanatitra. 9 Ianareo dia voaozona, satria nandroba Ahy, ry firenena manontolo. 10 Ento ao amin'ny trano fitehirizana ny ampahafolon-karena feno, mba hisy sakafo ao amin'ny tranoko, ary tsapao amin'izao Aho," hoy Yaveh Tompon'ny maro, "raha tsy manokatra ny varavaran'ny lanitra aminareo Aho ary mandraraka fahasoavana eo aminareo, mandra-paha tsy misy efitra ho amin'izany rehetra izany intsony. 11 Hiteny manohitra izay manimba ny masom-bolinareo Aho, mba tsy hanimban'izy ireo ny vokatry ny taninareo. Ireo voalobokareo eny an-tsaha dia ho vanona," hoy Yaveh Tompon'ny maro. 12 "Ny firenena rehetra dia hiantso anareo hoe sambatra, satria ho tany mahafinaritra ianareo," hoy Yaveh Tompon'ny maro. 13 "Nahery tamiko ny teninareo," hoy Yaveh. "Saingy hoy ianareo hoe: 'Inona no nifampilazanay manohitra Anao?' 14 Hoy ianareo hoe: 'Tsy ilaina ny manompo an'Andriamanitra. Inona ny tombontsoantsika raha nitandrina ireo fangatahiny isika na nandeha tam-pisaonana teo anatrehan'i Yaveh Tompon'ny maro? 15 Koa ankehitriny isika miantso ny mpirehareha hoe sambatra. Tsy mahomby fotsiny ireo mpanao ratsy, fa mitsapa an'Andriamanitra ary mitsoaka mihintsy.'" 16 Avy eo dia nifampiresaka ireo izay natahotra an'i Yaveh. Nifantoka tsara Yaveh ary nihaino, ary nosoratana teo anoloany ny boky fahatsiarovana momban'ireo izay natahotra an'i Yaveh sy nanome voninahitra ny anarany. 17 "Ho Ahy izy ireo" hoy Yaveh Tompon'ny maro, "fananako sarobidy, amin'ny andro izay hiasako. Hiantra azy ireo Aho, tahaka ny olona iray miantra ny zanany lahy izay manompo azy. 18 Dia hanavaka ny olo-marina sy ny ratsy fanahy indray ianareo, eo amin'izay manompo an'Andriamanitra sy izay tsy manompo Azy.