¹ Nak amaran, imədrayan-in harwa ɣur-wa əllə, wər dawan-təggaɣ awal wa tagga y aytedan win iha Infas wa zəddigan. kalar əgeɣ-awan awal zun wa itaggu awedan y aytedan win wər nəlkem ar i tara ən man-nasan, zun əššewala y aytedan as səket əlkaman y Ǝlməsix. ² Zun as ax a kawan-əššəšwa, wər kawan0'-əssətša imensewan win əqqurnen, fəlas harwa da wər dasan-təregam. Wala əmərədda da, wər dasan-təfregam, ³ Id harwa da wər t-illa a kawan-izlâyan d aytedan win wər nəlkem ar i tara ən man-nasan Šismiten šin tətaggim fəl midawan-nawan əd təmzaq ta təmmalat gar-ewwan wərgeɣ sitaddanat a harwa da kəl əddənet a təttəlalam, təlkâmam i tarrayt-nasan. ⁴ As inna iyyan daɣ-wan Nak Buləs as əlkam inna iyyan Nak Abbolos as əlkama Wədi wərgeɣ alxal n aytedan n əddənet ta da a təgam. ⁵ Abbolos a da, ənta wala Buləs awak ma əmosan wər nəmos ar imaššaɣalan ən Məššina win sər-wan d-ewaynen əzəgzan sər-əs, nak harkid ənta wər nəga ar əššɣəl wa danaɣ-ikfa Ǝməli. ⁶ Nak awa əmmozala iha šaššelan n amasa as nak a t-inbalan, təzzar iššəšw-ay Abbolos mišan Məššina ənta a t-id-issədwalan. ⁷ Daɣ adi, wərgeɣ awedan wa inbalan amasa wala wa t-iššašwin a imosan arat, kalar Məššina a t-id-issədwalan a t-imosan. ⁸ Awedan wa inbalan amsa əd wa t-ššašwin arat iyyanda a əmosan, akkiyyan daɣ-asn ad t-akfu Məššina alxaq n əššəɣəl-net. ⁹ Nak d Abbolos nədrâw əššəɣəl wadanaɣ-ikfa Məššina, amaran kawanay a mosnen šilat ən tawagost-net təmosam deɣ əkərrus-net. ¹⁰ Nak, əgeɣ s arraxmat ta di-ikfa Məššina əššəɣəl zun wa itaggu əmakras ən nan issânan əššəɣəl-net, əssəɣta təsəkbəlt ta təmosat šiɣurad ən taɣazamt, dəffər adi osa-du awedan iyyan a fall-as ikarras mišan akk awedan inkədet d əmmək was išatu əkərrus ən taɣazamt tədi. ¹¹ Wər t-illa awedan ifrâgan əsəɣti n iyyat təsəkbəlt wər nəmos ta təɣtat kala da, ad tat-imosan ɣaysa Ǝlməsix. ¹² Wiyyad aytedan əkarrasan fəl təsəkbəlt ən ta ɣazamt ta, s urəɣ, wiyyad s azrəf, wiyyad əs təhun əknânen šihussay, wiyyad s eškan, wiyyad s ələmmuz, wiyyad s agabal. ¹³ Akk awedan ilkâm ad itəwənəy, fəlas temsay ta ənta za təsənnəfiləlat əzzənəf n əššəɣəl wa iga akk awedan. ¹⁴ kud təməkrust ta fall-as iga awedan wər tat-tətša təmsay awedan wədi ad igrəw alxaq-net. ¹⁵ Mišan as imos as tətš-et təmsay, awedan wədi ad affatu. Dər iga awen da ya ənta iman-net iɣləs, mišan ad alu əlɣillas-net d in awedan ad d-ittirkaban daɣ təmsay. ¹⁶ Awak masnat a wət təgema as, kawanay iman-nawan a imosan ehan ən Məššina, iha deɣ Infas wa zəddigan iwallan-nawan. ¹⁷ Amaran awedan kul wa ihallakan ehan ən Məššina a t-ihlək Məššina; fəlas ehan ən Məššina i zəddigan, amaran kawanay a t-imosan. ¹⁸ Ad wər issdəf awedan waliyyan iman-net alxata wa daɣ-wan iɣilan ila masnat ta fəl təgla əddənet, wədi aget iman-net əmeskel, ad t-akfu Məššina masnat ta n tidət. ¹⁹ Fəlas masnat ta n əddənet ta əmməskəl a təmos ɣur Məššina id a ənnan Ǝlkəttaban Imusanan n əddənet ta šmərkas šin-nasan as tan-ibaz Məššina. Ǝnnân deɣ Issân Ǝməli âs, imedranan ən musana n əddənet ta, wər əzlayan əd bannan ²¹ Daɣ adi, ad wər tədakkalam iman-nawan fəlas təlkamam y awedan, fəlas arat kul i-nawan, ²² gər za nak Buləs wala Abbolos, wala Butros, wala əddənet, wala təməddurt əd tamattant, gər za aratan win əmərədda wala win əlkamnen, awa ketnet i-nawan. ²³ kawanay iman-nawan, Ǝlməsix a kawan-ilan; Ǝlməsix amaran, Məššina t-ilan.