DCS-Mirror-parfait-ayanou_teg_mrk_text

Kassagumu ka Marc 5

¹ Bo awui ngula okeri onini ntsa kagudu ka a Géraseniens. ² Parabu Jésus ka tsugui ma mbugu, balaga le ki ña oduduma wobi leyi mpila ndè mpanaga amuma. ³ Balaga lía ki ka ntsa amuma. Mburu omon obuni kakuara ndè kali, sè bila edi. ⁴ Kigui a makura ndè dja kuna-kuna bila edi n'akoso ma ebono. Ndè tsagui edi é boligui akoso. Mburu ki baga mpari ma ka kuara ndé ni. ⁵ Na mwui na pimbi, ndè ki panaga amuma bila yila ekuru. Ndè nti essarigui é ka dzuali bila akelè makato. ⁶ Ntini ndè ye kamoni Jésus kalala, ndè biri tsini mpila ndè na ovi m'abuo kovusu on ndè. ⁷ Ndè nti gnia kanla-kanla: «Mi ema esa bila wè, Jésus, muana Ndziami okara yulu? Mi e pa wé akolo kolo ma nkumu a Ndziami, biza kagnokolo mi». ⁸ Ma ndè wo ki dunga ndè ndi:«Tsuga ntsa balaga li, oduduma wobi.» ⁹ Jésus pizi ndè:«We nkumu ña?» Ndè kayaligui:«Mi nkumu ekama essiami ma bizi ba leli a kuna kuna.» ¹⁰ Bo asseligui ka piza é avuri pizi ndè ndi biza katsusiga bizi tsa kassi. ¹¹ Ma ntini ma akulu, djimi yia lenini lé eguo ki lé dja ka yila ka kuru. ¹² Bo a pizi Jésus ndi kolokolo. "Tuma bizi tsa éguo, nina bizi legnunuga ntsa djo." ¹³ Jésus tumi djo: eduduma bebi etiegui ma balaga lía na egnunigui ntsa egüo djo eyeni matini ntsa obubula ntsa okerí onini na ekumu ba ekama djielè ba eguo eyini ma andza. ¹⁴ Baki kielé éguo a yeni kaduga ntsa kagudu ña epanigui djâ le leyiri na bari akuna kuna ayi kamono djâ la leyiri. ¹⁵ Bo ayi mpila Jésus, ña ntini a bo yamoni balaga wo ki na eduduma bébi matsie, ma lasa oli yemigui, bô amoni buogo. ¹⁶ Ba amoni djâ la leyiri bila balaga le leki ña eduduma bébi adungui na bayi djâ le leyi ndé bila djâ l'eguo. ¹⁷ Bô ampi Jésus a kolo-kolo lo ma katsiegue kassi ka bô. ¹⁸ Ntini Jésus yega ngnunigui ntsa mbungu, kadjé balaga leki na eduduma bébi lepízi yugu ndè abuna kadjè bila ndè. ¹⁹ Okorogo Jésus ki-gnina ndè ma kassa bua ni. Okorogo na, ndè ndi: «djè tsa ndjô wè mpila bari a wè na dunga bo asso a Ndziami makassa wè bila kerigui é ndè ye kamoni wè.» ²⁰ Lia mbiri le ndè lekayeni maka duga mami ma gnini asso a Jésus makassi ndè ntsa Décapole ña mburu na mburu kigui ntsa akimi. ²¹ Ntini Jésus eh yeka yiri ngula okeri ntsa mbugu, leburu le dji ndè ña ndè ki ma otelè mpana okeri. ²² Omon tu ntsa ba ki kayisiga ntsa okuga ndjô Ndziami, wa ki tsuolo ma Jaïrus, ka ya ña ndè kamonon Jésus, ndè vi kantina nili éh ndè. ²³ Ña ndè kaselegui ka piza ndè ndi: «Muana mi okasi yiga akua! Kolo-kolo wé ya oleguè ndè djiala, na ndé ka-wuma ña kavuga!» ²⁴ Ña Jésus oyeni bila ndè, ña leburu le kuna-kuna lé luoni na ledji ndè. ²⁵ Okorogo, eki na omon eli masa essibi kumu na djuelè bila kavundu. ²⁶ Ndè ki ma monon mpassi nkuna-nkuna mpila angâ baki salaga ndè. Ndè tini beguè l'adoro a ndè asso. Ndè ki wuma ni okorogo ngâ kasselegue ka djè vusu. ²⁷ Ndè wugui ba wobo ma Jesus. Ña, ndè tsini mpana ndè kangulu ntini yega ki yira ntsa leburu, na tsili nfâ ndè. ²⁸ Ndè a wobo ndi:«Yugu mi etsila nfâ ndè tú, mi ewuma.» ²⁹ Ntini na ndè ye ka tsili ndè, kavundu kasugui, moni ngnuru éh ndè ndi mi wuma ma ngâ ndè. ³⁰ Parabu Jesus omoni ndi mpari emi tsuga ntsa ndè̀, ña ndè kaligui mpila leburu ña opizi: «Wo tsila mi nfâ na?» ³¹ Aluoni a ndè na ndè ndi: «Wè amono leburu la le piya wè, ña wè adunga mini wo tsila mi na?» ³² Okorogo Jésus kessi mpana ndè maka monon mburu wossi bua. ³³ Okasi oyayi mami ma yiri ma ndè, oyi mpila, ndè bila maka tereguè. Ndè vi matsié kovusu o Jesus na odungui ndè assissielè asso. ³⁴ Ndè na ndè ndi: «Muana mi odjimi, o wè o missa wè ovè. Ndjè bila kadussu é wuna ma ngâ wè.» ³⁵ Ntini éh ndè yega kiwobo, bari awi ndjô nkumu okuga Ndziami na adungui ndi : Muana wè mi kua. Mema wè a vura wuelè nkumu?» ³⁶ Okorogo ntini éh Jésus yéka yugui a bô ka ki dunga, ndé dungui na nkumu okuga: «Biza kamona buogo yalaga.» ³⁷ Ndé ki yalaga ndi mburu okima kayila ndé ni, ka ngula Pierre, Jacques bila Jean, morigui oh Jacques. ³⁸ Bo ayi ntsa ndjô nkumu okuga. Jésus moni bari ba kissa lesugu le kuna-kuna; bô ki balila ña ba suè. ³⁹ Ntini éh ndè yeka gnunigui ntsa ndjô, ndè na bô ndi: «Me ma bè leka ma etsutsumu éh mema bè lelila? Muana kina ka kua ni okorogo ndè a ntsa tolo.» ⁴⁰ Bô assembi ndè. Okorogo ndè olegui bo asso kadji. Ndé yagui tara bila ngü muana na bari baki bila ndè, na bô agnungui biri leki muana. ⁴¹ Ndè yagui kuogo ka muana na dungui ndi: «Talitha koum,» ma ka dunga ndi, «Okerè okasi, mi edunga wè, saraga.» ⁴² Parabu, muana ka temigui yéni, (na ndè ki na essimbi kumu na djielè). Ña bô a ki ntsa akimi. ⁴³ Ndè dungui bô ndi bè lenini sè mburu omon ka dunga ma djâ li. Ña ndè odugui bô ma kapa ndè kila maka dja.