¹ Ntini mon ndè bani maka yisiga tuga ña okeri. Leburu lekugu mpana ndè, amana ndè kumi ntsa mbungu kayila okeri nâ ndè ki ma tsie. Tuga nâ ndè, na bô asso ayiga mpana okeri. ² Ndè yisigui bô mami akukuna ña lempini, nâ ndè dugui bô ntsa eyizigui eh ndè. ³ Leyuga! okuni otsugui mâ kakuna. ⁴ Ntini éh ndè yega kikuna, mbru yemon évi yila ndjila agnoyi ayi nâ tobogo mbru. ⁵ Mbru yémon evi yila tsiè y'akelè, yéli tsiè kuna kali. Yô etsugui assissari kabila kama, mâ tsiè obi. ⁶ Nâ muyi katsuga, yô ébuyi ekayi yo eki ekana kali. ⁷ Mburu yemon évi tsa djiba yantsienè, amana yô ékuï, djiba yia ébumi yô, mbru yia eki makula ni, mâ biri obi. ⁸ Mburu yémon evi yila Tsié yévè, nâ ékuli mubru yénkukuna, nâ yô éyeli, yémon empi ékumu éna yémon èkumu esiami ékumu-kumu. ⁹ Ndè dugui ndi : "Mpini mburu wéli nâ atsu makayuga ndè yugui," ¹⁰ Ntini éh Jésus yega ki ndé otù, baki mpana ndè bila bâ kumu na buelè, a pisi ndè odugu ma lempini. ¹¹ Dugui bô: "Na bé, amampa leya le mami a puga Ndziami. Okorogo nâ bari ba ndji, asso ma lempini, ¹² mabundi ntini yékessè bô, bô akessi okorogo bô kimonon ni, bô ayugui, nâ bô kiyuga dja ni, tsaki bô akaligui mpila Ndziami na ndè boligui bô." ¹³ Nâ ndè dugui bô: "Bè lekayuga lempini li ni? Bè bunu leyuga ampini mamon asso? ¹⁴ Onduga mbari wa mpa mbari. ¹⁵ Bamon bâbava kampana ndjila kabiri yampi mbari. Nâ bô ayuga yô, ofu yi nassissari kayaga mbari yampi bô. ¹⁶ Bamon bâbakuna yila tsié yakélè, babua, ntini yéyuga bô mbari, bô ayaligui yô parabú bila kassuère. ¹⁷ Na bô sè okana omon kali, okorogo bô aki bila yo ntini tséti. Amana, ntini yéya mami mabi, na ampassi, ma mbari bô avi. ¹⁸ Na bamon bakikuna ka tsa antsienè. Bô ayugui mbari, ¹⁹ Ña mami okiri, nkiza ma lé buga, ña ndjala bibi ékima m'égnunuga maka duba mbari, yô ébi. ²⁰ Nâ bamon babakuna yila tsiè yévè. Bô ayugui, mbari ayagui nâ ampi mburu; bamon ékumu étari, bamon ekumu essiami, bamon ekumu kumu." ²¹ Jésus dugui bô: " Bélebira mbunda tsa djô maka légue lô ntina ngala, sikali tsina ntari? Bélébira lô ka tsa djô na bè lessusi lô yila mbissa. ²² Kila kaba lonongo bakabisa monon ni na kali kaba yisiga bakabisa muèse na bari ni. ²³ Aka mburu natsu makayuga, ndè kayuga. ²⁴ Ndè dugui bo: "Lessa oyeri ma mami mayuga bè, ossumbu wéyeseguè bè, ossumbu sè wobayeseguè bè ankulu, nâ balussa ma bè. ²⁵ Makama mpini mburu womi baga, avura baga kuna nâ wèli kila kali, bavuruga tsiézè ndè kakali na ndè. ²⁶ Na ndé ndi: "Kassi ka Ndziami vâ okuni, wakuna mburu éh ndè tsa tsié. ²⁷ Ndè puo tolô kampibi, nâ ndè intsièrè kamuyi le mbru, letsugui léyeli keli ndè kiya ossumbu ni. ²⁸ Tsié yémpa mbru ña ndè ankulu: ntsomi onguigui, amana wula amamana yiga mburu yémiyelè. yila wula. ²⁹ Ntini émiyelè mburu, ndè yagui nguma nassissari makama ntini yekatolò eki émitò." ³⁰ Na ndè ndi: " Bisa bè lebuna yezègue kassi ka Ndziami bila kama?sikali leyaga lini lempini makaga duga ndè? ³¹ Eli mva leburu la létsugu, léli amikuna, lô lé mburu ka vulu abuga asso okieguè. ³² Ntini yamikuna lô, lô leyéli levuli éthi esso bâkabuga ossi antaga malà mabundi agnoyi ayulu atsuyi ah ndjô ah bô tsina kayini ka ndè." ³³ Bila kuna le lémpini mva li, nde dugui bô mbari, yéli bô abuni kayuga, ³⁴ Nâ ndè ki kawobo na bô ndè kibisa ka légue lémpini. Okorogo aka ndè li ndè otu, ndè dugui asso nâ aluoni a ndè. ³⁵ Ttsugu lia, ekikolô étô, ndè na bô ndi: "Letsué ngulu yémon." ³⁶ Ña bô atsiégui, tsa lémburu, a biri Jésus bila bô, ndè kiyiga ntsa mbungu. Ambugnu akima aki na sè. ³⁷ Ña kakuru kakanla kayi, epugu bâ andza ekuna agnunigui ntsa nbungu eluli m'andza. ³⁸ Ña Jésus ndè ankulu ki lé mbiza nbungu matoló yila kiti. Bô agnussi ndè ndi: "Nkumu, waka monon mini biza bè yiga leku ni?" ³⁹ Nâ, ndè kagnuzuga, ndè si piébi kanla nâ ndè n'okeri ndi: "Kapi! vuruga mbiza" na piébi lewui, kadussu kayi. ⁴⁰ Ña ndè dugui bô: "Bé obuogo kama ? Bé lékini odjimi kali ?" ⁴¹ Bô amoni obuogo nâ yiga ba duga omon na omon: "Ndè yuna? piébi bila okeri bagnima ndè."