¹ Nâ, Jésus obani kayisiga bô ma lempini. Ndé ndi : "Balaga lémon kigui makuna ngunu yébru yébassa mali aba, ndè djénigui lépangui nâ ndè tsumi bila maka piya mali. Ndè tsuyi olébè amana, ndè mpi ngunu n'adjandji. Amana ndè yéni opinga ² Ntini étò, ndè tumi odjandji omon mpila adjandji ankunu maka Mpa ndè mburu kè yébassa mali aba. ³ Okororo bô akuari ndè, aberi ndè nâ avutu ndè djiala ognana. ⁴ Ndè ovuri tumi bô odjandji okima bô a djuazi ndè m'otchu bo assi ndè okuru. ⁵ Ndè vuri tumi bô okima bô abumi ndè. Bô assi akima mâ ossubu dangulu wua, abéri bamon nâ abumi bamon. ⁶ Ndè ki na buru okima maka tuma, muana odia. Ndè ki buru yobisa o ndè yaka tumi bo. Ndè ndi: "Bô ña bagnima muana mi." ⁷ Nâ adjandji yiga bawobo mpanaga bô: "Lémonon buru wassila bila wanda. Léya, lébuma ndè na wanda léka léssabé." ⁸ Bô akwari ndè, abumi na atsuni ngula lépangui lengunu yébassa mali aba. ⁹ Ka ña yiga nga ngunu kassa bunu ? Ndè aya kabuma adjandji nâ kampa ngunu na bari akima. ¹⁰ Bè lekitanga mpiri yia ni? " Amassa kélè ma kelé lé tsuni atuï kélé letali. ¹¹ Ndja li léwa mpila Nkumu nâ novè kamisi assabè". ¹² Bô assagui makakwara Jésus okororo bô ki nâ obuogo ma léburu na bô ki aya ndi ndè dugui lémpini lia ma bô. Bô atsiègui nâ yiga badjè. ¹³ Nâ, bô atumi ndè adjandji andjô Ndziami akè bila Hérodiens maka yia ndè bila mbari. ¹⁴ Bô atô, bô na ndè ndi: "Nkumu, bisi léya mini waka yalaga ndjuï lé mburu ni ña waka tsala mpanaga bari ni. Wayisiga ndjila Ndziami ndjâdja. Yemigui sikali kayémigui ni makawura lépô na César? Ovè bisi lewuri sikali?" ¹⁵ Okorogo Jésus oyayi ekâ ébô ndè na bô ndi : "Bē lemiga makama? Leya ñami doro mi kèssè." ¹⁶ Bô ayi na Jésus omon. Ndé dugui bô : "Kadissi ki bila ampiri ma ana ? " Bô akali na ndè ndi: " A César." ¹⁷ Jésus ndi : "Lé mpa na César bibi éh César na Ndziami bibi éh Ndziami." Bô aki tsa akimi ma ndé. ¹⁸ Nâ, a saducéens béli ndi bagakwa avuri gnusigui ni, ayi mpila ndé. apizi ndè : ¹⁹ "Nkumu, Moïse otindi mabizi, " aka okulu obalaga mikwa onini okari, okorogo kinina bana ni, balaga lia ovè leyagui okari wu okuli bana bâ okulu ndè." ²⁰ Ndè eki na barigui ntsa mtsami; otsomi oyagui okari ka gnaga bana ni. ²¹ Na wodjuélè oyagui ndé nâ okwi, kinina sè muana omon ni. Nâ wotari sè sibua. ²² Wô tsami sè kinina si muana omon ni . Amana okazi sè okwi. ²³ Ntini yegnuzuga bari bamakwa, bô ayavuriga omuo, okari aka ona? Makama ndè ki okari oh bô asso." ²⁴ Jésus ndi : " Bè lekamonon ni ma bua bè lemitamana ni? Kabila kama, bè lekiya ampiri, sikali mpari éh Ndziami ni? ²⁵ Kabila kama, ntini yéya vuriga bô omuo, bô bakabala akari ni, baka mpa bô akari ni, okorogo bô baka mvâ abandi kayulu. ²⁶ Okorogo ma bari bâ bakwa amana agnuzigui, bè lekini katanga ntsa kassangumu ka Moïse, ntsa kayumba kadugui ossumbu oh Ndziami woka wobi bila ndē na ndè ndi: "Mi Ndziami wô Abraham, Ndziami wô Isaac bila Ndziami wô Jacob?" ²⁷ Ndè ka Ndziami wô ebima ni, ña wô bari amuo. Bè lémi tamana kuna." ²⁸ Nkumu wô anguiri omon oyi ndè oyugui otogo bô; ndè moni ndi Jésus ki yémini kakali bô. Ndè pizi ndè: " Nguiri yévuli abuga ovè mâ?" ²⁹ Jésus kali: "Yévuli ovè " yuga, Israël, Nkumu Ndziami oh bizi, Nkumu omon. ³⁰ Ovè odiyi Nkumu Ndziami owè m'otima wè osso, m'oduduma wè osso, m'etimigui éwè bila mpari éwè esso" ³¹ Monon guiri yojuélè: ovè odjiyi buga léwè lomuo mvâ wè ankulu. "Nguiri kima yévuli ma kali." ³² Nkumu anguiri ndi : "Yemigui, Nkumu! womi duga assissièlè ni Ndziami omon. Nâ okima mvâ ndè kali. ³³ Maka dia ndè m'otuma wè osso, mâ eyugui ewè esso bila na mpari ewè esso, na makadia buga lewè lomuo vâh wè ankuluevuli lempa lé étundu adoro." ³⁴ Jésus kamonon ndi ndè mikala mbari étsimi, ndè na ndè ndi: "wè kalala nâ mpuga Ndzima ni." Amana bua, mburu sè omon ovuri pisa Jésus odugu kali. ³⁵ Jésus kali ma ntini éh ndè yékakiyisiga tsa ndjô Ndziami, ndé ndi : " Kabila kama ankumu bâ anguiri ba duga ndi Christ muana David?" ³⁶ David ndè ankulu tsa oduduma suntu ndi: "Nkumu dugui na nkumu omi, ka matsi makuogo kakalumu kami tiyi kessami anga bèlé wè aka tsina ntami ewè." ³⁷ David ndè ankulu katsulo ndè " Nkumu", nâ Messi kavuraka muana David bunu? leburu lenini leyuga ndè bila kassè. ³⁸ Ntsa eyisigui éh ndè, Jésus ndi: "Lebisa kaluonon ankumu bâ anguiri bâ bayira bila éringa béla nabundi abigui bô mâ ebiri békuga ³⁹ nâ maka baga ebiri etsomi ntsa adjô ah Ndziami na ebiri evusu tsa a tsinda ⁴⁰ Bô badjala adjô makuli sè na bô kabuonon kèkè mabundi amonon bô. A balaga bâ bamonon opami w'onini." ⁴¹ Nâ, Jesus oki matsi mpana légulu lé abondja tsa djô dziami; ndè ki akèssè bari kaki léguè bô adoro abô otsa légulu. Anga lebuga kuna aki léguè adoro akunakuna. ⁴² Okuli wofuga omon oyi na olégui adoro bakiéguè buelè, malégui ndè ki avuli mabuga. ⁴³ Nâ Jésus otsuli aluoni a ndè na bô ndi: "Assissièlé m'éduga bè, adoro m' okuli w'ofuga wu makampi avuli a bari asso balégui tsa légulu. ⁴⁴ Na bo asso a mpi adoro. Okorogo okuli yu o mpi adoro a ndè asso ma ki kiélé ndé ndjo.