¹ Mu témuényi badukitsi bàmarughe ombu Djésu, na bamamuwivule: " Anyi avu yivunde o bufumu budjulu ? ² Djésu àmanéngile muana mughéyi o yari yiandi, amamusuntse vaghari oghu, ³ novose: "Mungènse nyidutsinguli, ta dughakalughe na ube nane baane baghéyi dughokote né pésu o bufumu bu djulu. ⁴ Mù dionyi, uotsu ékésunse nane muane éghughu ughéyi, aghùne la yivunde o bufumu budjulu. ⁵ Na wotsu oyidili muane umosi va ghari bangébi bébabe mu diine diami, éndili. ⁶ Tumbe, mutu wotsu oyirumi muane mosi va ghari baane bébaba bepayili yitu muvaghe disumu, diwelmine mudjandi yiri bomutunge dimanyi dinéni va kingu, nomubuaghe yi ndonge yimubu. ⁷ Maghughe ombu bulongu mumbari tému tsirange! Divu diwélemine yiri mambu mémane morughe, tumbe maghughe ombu mutu aghu mambu mémane morule! ⁸ Ta dikake nesi dikulu diaghu digurombisi ubérughe, ditabuli na dibuayi vala naghu. Divioghulile ubuédji ombu ghagu ukote yibonfi o bufumu budjulu tsiri ube na makaka mabédji na makulu mabédji nonyienge o mudji mutubu na mutubu. ⁹ Ta disu diaghu digurombisi uberugha, didonduli na dibuayi vala naghu, Divioghulile ubuédji ombu aghu ukote na disu dimosi o bufumu budjulu tsiri ubuaghu o mudji umutubu namutubu na misu mabedji. ¹⁰ Lubughanu dukétsorise muane umosi va ghari baane bébabe bagheyi. Mumbari nyidutsinguli, o djulu bianse bioghu abibakélisi bigéngili tému tsiotsu ghusu tate ami adjivu o djulu. ¹¹ Mumbari muane mutu amarughe muyigobule ayimabe yitsiemughe. ¹² Tsiényi dwitasili? Pa mutu ane kame bidombu na yimosi imalalene aghésili maghumidufu na yifu yibidombu abine muyiérombe ayimalalene ? ¹³ Ta amayilàbe, dingètse nyidutsiguli, ésangili puèle mu yionyi uvioghulile maghumidufu na yifu abisamalalene. ¹⁴ Munongu umosi, tsiri durondu du tadjiénu adjivu o djulu yiri umosi va ghari bangébi bébabe obungene. ¹⁵ Ta muane tadji aghu udibàle atsiguvaghe dibi, mulasi mbèle andi vaghari ndédju na djandi pintsa. Ta atsi ghugululu, utsimudile. ¹⁶ Tumbe, ta agha ghugululu, bonge naghu muane tadji umosi vo babédji, yiri mubumbédji bubatu babédji vo bariéru ngentsa djikelabene. ¹⁷ Na ike ébusi ubaghululu, beghe diambu ombu bisi dibundu. Ta atsibuse ugululu dibundu wandi mug hengilianu nane muényi vo mubolitsi lépu. ¹⁸ Ngènse, nyidutsinguli : motsu amedutunge vavetsi motungu o djulu, na motsu amadunyangule vavetsi monyangulu o Djulu. ¹⁹ Nyimuédutsigule, ta babédji va ghariénu boghulusunu vavetsi mu diambu adibévondi, diubavéghu na tadji ami adjivu o djulu. ²⁰ Mumbari ava babédji vo bariéru bébéngunini mu dine diami nidji va gharioghu. ²¹ Mbanane Pière amarughe na amawivule Djésu, " Fumu kùmbu kuéni nyutandilangea muane tadji ami ? Ave djandi opayile dibi ? ²² Téna yisambuàli yikumbu ? Djésu àmutsingule : "ngadutsingule yisambuali yikumbu, tumbe téna magumi dusambuali na yisambuali yikumbu. ²³ Bufumu bu djulu bubaghunu na kaghe adjirondi ukélule bisalu na basalitsi bandi. ²⁴ Ave àmabandile, bamamubéyile musalitsi andi umosi umamunuanange digumi ditosini dimbongu. ²⁵ Tumbe alobe yiri aghane yime yiuvanine, fumu andi amaronde umusumbise na mugatsi andi na bàne bandi na biandi biostu mùvane dinuane. ²⁶ Musalitsi amakuteme na amaghudeme va ghusu andi na amamutsingule: " Fumu siyighe kabuaghu mu ménu nyuvane mughanu uotsu" ²⁷ Avàne fumu musalitsi ényi amabase nayigenbe amamudunde na amatsindule dinuane diotsu. ²⁸ Tumbe, masalitsi éni amapale na amabengune na musalitsi umosi umabe mbatsi andi bisalu adjimamunuanange kame dìsu. Amamubatighe yikutu, umugange va kingu na uvosa : " mpaninyi abi winduanyi." ²⁹ Tumbe mbatsi andi bisalu amagudeme va ghusu andi na amamulènde : " Siyighe murime mu ménu na nyuvane dinuane diaghu diotsu." ³⁰ Tumbe musalitsi uteghe amabuse, àmamubuaghe otsughu téna àmamàne uvane dinuane diotsu. ³¹ Ava bambatsi abane bamalabile adimavioghe bàmabe na manyonyi; bamawende oyiétsingulu motsu ombu fumu oghu. ³² Kaboghu fumu musalitsi éni, amamunengile no mutsingule : " Musalitsi mubi, nyìmaghutsindule dinuane diaghu diotsu, mumbari umandènde. ³³ Mbé ugharungule ube na yingebe mu muane tadji aghu nana nyimabile na yingebe yaghu? ³⁴ Fumu na kabu djineni, amamuwakisa ombu oyikilisi te na amamane uvane dinuane diotsu. ³⁵ Anane tate ami o djulu oduvayile ta mutu aghatande muane tadji andi na murima andi wotsu.