1 Buchi bukiada, bivonda bia bavédi ba malaghe na mikutu mia musènge niba-yèndèle Jésus kundu ya bome ndè. 2 Baghade ndè, bayènde na ndè, nibavaghele ndè ghuli Pilate, Kum'amusènge. 3 Va Judas wa kabe ndè, amone ndé Jésus ndunzi wa ubome ndè, amème lebi le ndè sade, na yènde ghu yighabese babitèli bia badole ghu mbogh'abivonde bia bavédi ba malaghe na mikutu mia musèngè. 4 Ndé na lèle bo ndé: "Mè chidi tchambe lelebi, mu ndjina mutu wa vè sade tchambe ni tchambe yi mè tsolichi". To bo niba-lèle ndè bo: "La-bése kana ? Tchambe muène ghu yulu a wè lelidi". 5 Ndè tète bitèli bia badole ghutso nzo Nzembi, atèmene, nayende ghu kuade mu lebungu. 6 Yivonde cha bavèdi ba malaghe atole bitèli bia badole nalèle ndé: "Buédi vè mutète badole baneba ghutso kobi, muti yo fut'andjin'amutu". 7 Avane kaniva bo basaghe tchambe la sade naba badolo muène. Babonge bo ni basombe nungi muvèngi bapotcho ghu bakundu bamfumbi ba-bandjinze. 8 Ayéna ni tsotse yibaloghe yitchighe muène bà:'' Nungi a ndjine. Ayene ni ndogha yibatède yitchighe muène nacha lolo. 9 Avane kaniva mambe motchi ma mubighi Jérémie a-lèle, ni masopegha. Bo nibabonge makumi matate ma badole ba bitèli. Alene ni lefunu le bichi Israel basombese Ndè. 10 Bo nibavèdè ndji muène mu futu nungi muvèngi bapotchi ngana bu malumbi alèle mu sade". 11 Bo babèghe Jésus va ghu mbogha yivonde cha musèngè, yivonda cha musènge nicha fulu ndé:" wè ni Kumu ba-Juifs ? "Jésus na kale ndè ndé :" Wè ma-mana lo-lèle ". 12 To va bivonde bia bavedi malaghe na mikutu bakutulenge ndè mambe ndè sayaghelenge vè. 13 Avane kaniva Pilate a-lèle ndè ndé:" Wè ka wè sayoghe mambe manema motchi ma ba lèle mu niutu a wè vè" ? 14 To ndè sakale bo lebighe ti lemochi vè. nimulo kumu a musèngè a-ghémba ghua lotela. 15 Kumu a Tsènge abadenge na yiku cha pose muchi tsughu mumochi wu baate basolenge va lekese la mukungi. 16 Va lekèse muène, mutu wu baate botchi bayabenge abade ghu tsughu. Ndogh'andè Barrabas. 17 Nimulo, va piti'abaate yakokena, Pilate nafule bo ndé: " Mutu wu béne latonde ti mè pose wuni ? Barrabas voki Jésus wuba bendele bo Christ ? " 18 Muti Pilate ayabenge ndé bo bakèbe ndè ndile mu bo babèlenge ndè. 19 Va Pilate abade ki atsaghele va yitichighe chibapasenge mipame mia mamba mia baate, mukèdi'andè na tchindegha ndè lebighe ndé : " Ya sade mutu muène tchambe. Ndè sachidi libi vè. Mè moni paghe yalotele mu ndoti yi mè loti mu mutu muène. 20 Bivonda bia bavedi ba malaghe na mikutu ni bachimbese baate mu lèle ti ba pose ndile Barrabas, alèle ndé ba-bome Jésus. 21 Yivonda cha musèngè na fule bo ndé: Vatso baate baboli banebe wu béne latonde ti mè pose wuni? " " Bo ni-bakale ndè bo : "ndile Barrabas 22 " Pilate na-fule bo ndé: " To kabuni mè kisade ghuili Jésus wu ba- bendele bo Christ ? " Bo botchi ni bakale ndè bo : "Ndila ukomini ndè mu mbat'akurusu ". 23 Ndè na fule bo ndé: " Tchambe lebakoni ndè mu kuruse na ? " Lebumi le ndè buichi lini? To bo nibabuameghe mbuliambuli bo : "Ukomini ndè ndile mu mbata kurusu". 24 Pilate amone ndé ndè chitoghe tchambe ni tchambe sade vè, to muyungidi a-bade ka bande a bande, abonge mamba, natsoke makake mèndi va buse bua piti'abaate, na-lèle ndé:" Mè-salidi ghutso tchambe la leku la mutu wa vè na tchambe ni tchambe wunuwu vè. Vanga ni lo béne muène. 25 Baate botchi ni bakale ndè bo:'' Ndjine a ndè yiyiteghe ghu yulu a bése na ghu yulu a baane ba bése''. 26 Avane kaniva ndè pose Barabase. Nalèle ndé baghobe Jesus mibèmbi, bamane navaghele bo ndè mu yikomine va kurusu. 27 Baghodi ba yivonde cha musènge babéteghe Jésus va yitchighe chibapasenge mipame mia mambe ma baate nibakokese baghodi botchi. 28 Bo bayole ndè mangoyi, niba luatese ndè yilénga chicha bèngè chotchi ririi. 29 Bavanga mupake na mvughu ya matsèndele nibasakeghe ndé ndè ghu yulu mutsué. Babonge mutungu nibasose ghutso lekake lèndi la ngulu a mbaghele. Va yulavane bo nibakutunu va busu buèndi nalèle mu sèbe ndè bo:'' wè masoghe, a Kumu ba Juifs." 30 Batutulu ndè matè, ni baghobe ndè ledubi ghu yulu mutusé. 31 Bamane ndè kiékede, byole ndè yibubu, nibaluatese ndè ka mangoyi méndi muène. Bamane nibabète ndè ghu komini mu mbate a kurusu. 32 Va bo bayendenge na ndè bo nibabakese mutu, ndogha amutu mène Simon wa muchi Cyrène. Niba-lèle ndè bo koo, wè ndile yada na bésa. Ni bapepese ndè kurus'aJésus. 33 Bayende nibatode va yitchighe chi batèdenge "Golgotha, chi basopela bo " Yitchighe cha yivanze". 34 Bo nibavède ndè malame ma ngèni. " Amégha na bise. 35 Bo bamane ndè komini mu kurusu, nibasade kènga solo mu kabene mangoyi mèndi. 36 Batsaghele, nibakengesenge ndè. 37 Va yulu mutsuè ndè nibakomini yitini cha timbi. Mu mbata cho, nibakome tchambe le bo bakutulu ndè bo: "A wunewu ni Kumu baJuifs ". 38 Ni bakomini bayibi boli mu mbat' kurusu letsughu li-bakomini ndè. Mumochimbaghele a ndè, a-wona ngulu a kasa. 39 Baate botchi bavioghenge vane ni batoghenge ndè na tsokese mitsuè mia bo, 40 Na-lèlenge bo " Wè ngè niwabédidingi na letase la nianze nzo Nzembi mu batonge yo mu tsungu tate, kipoteghe. Wè ti muaan'aNzèmbi, mate mu kurusu. 41 Namonia bivonda bia bavèdi ba malaghe na baate ba lebulu la ba Scribes na mikutu mia baate nibasèbenge na bo Jesus nalèlenge bo : 42 "Ndè apotili bambeghi, ndè ka achitoghe poteghe ndè muène vè? Ndè ti mumbuli alidi kumu a Israel, apoteghe mu mbata kurusu asotegha, tso bése lechilele ti ma ndè lèle". 43 Ndè na lebioghe mu Nzèmbi, ka Nzèmbi akipotele ndè ti ndè tonde, muti ndè lélingi ndé : "Mè Muaan'aNzèmbi". 44 Muyibi mumochi vatso bo baboli ba bakomini mu makuruu ndè na ndè natoghe ndè. 45 Bande va lekèse la- bisamene na cha lekèse lawa, buchi nibua vinde mu bulonge buotchi. 46 Va lekèse lawa ka bèle na tode, Jésus na buameghe na ngudi yotchi mbuliambuli ndé : "Eli, Eli, Lama abachthani ? a-ghone ni-lèle ghua ti : A Nzèmbi amè, aNzèmbi amè, "Mè wè mè kamuki wè tèmini" ? 47 Va baate bakè vatso baate vane bayoghe bona, bu ndè lèle bo " Ndè ka Eli atèdè". 48 Va kèti'avane, mutu mumochi vatso bo nayènde tine ghu bonge bunzonza, atubu ghutso malame ma ngèni, aghade mu yitini cha muti navèdè mu aniodo. 49 Baate Bakè ni-balèlenge bo : "Niagheni ndè, lepamonani ti lo Eli nayade ghu potele ndè". 50 Jésus na bachimene lechimene lekime na ndaghe yiyinèni amane na kuada. 51 Tsande ghu nzo Nzèmbi niyapasaghe mu bibèdi biole bande ghu yulu na ghu tchine. Tote yiyarèghene, mamani ni mapasegha. 52 Mangile nimabade ka buèchi, baate ba bakua kale bababade baténdeghe nibasoghe. ba bakundu kala niba sogha. 53 Bo bapola mutso mapéchi, va yulu va Jésus asoghe ghu leku, bo nibaningele ghutso musènge wa buyimba. Nibamonene na baate mvuabovè. 54 Va yivonda cha lebuli la baghodi botchi babada na ndè mu kèle Jésus bamone ghu toto yarèghenè mambe motchi mavioghe bamone bome ni balèle bo: " Mutu wunewu ka sé mumbuli abédi Muaan'a Nzèmbi. 55 Bakaase bakune ba badukunge Jésus bande ghu Galilée mu yamesenge ndè, nibabade vane na kèngesenge ndè ghu vala. 56 Marie ma muchi Magadala, na Marie ma ngua Jacques na Joseph tso na ngua baane ba Zébédée babaghela vane babade. 57 Na mungumbi, yichine cha mutu cha ghu Ariimathée, ndoghe Joseph, wa bade na ndè muduki a- Jésus, na yade. 58 Ayende ghu mbogha Pilate, na fule ndè nuit'aJésus. Avane kaniva Pilate achingese ndé bavède nuitu a Jesus. 59 Joseph abonge mfumbi, napote ghutso tsande a fuku yiyibuè. 60 Nayènde ghu kunde ndè ghutso péchi muène ya namanza yi ndè boka ghutso lemani. Abondesa lemania lilenéni mu dibeghe péchi, amana nayèndè. 61 ya muchi Magadala, na Marie yéna nivane babade batsaghele songa -songa na péchi. 62 Letsughu laduku aléna, yivonde cha bavèdi ba malaghe, na ba Pharisiens ni bakokene vabusu bua Pilate. 63 Ni balèle bo : "A yivonda, bésa labangele ti va mutu wa mèmè ndé mè ka ni mè wunewu abade moyi, alèlenge ndé : " Tsughu tate yavioghe, mè ni sogha". 64 " Kaki lèle bakèle péchi a ndè tsughe tate yikivioghe, mbé baduki bèndi bayade ghu yibe mfumbi, bamana baka-lèle ghuilidi baate bo ndè masogha ghu leku". '' Ukutu ghua uchikele mbèghi ghua lotele ghua tsomi bubi''. 65 Avane kaniva Pilate alèle bo ndé :" Béna ngè na bakéli; yèndani ghu kèle ndè. 66 Bo nibayènde ghu dibeghe péchi buébuédi. Bamana, nibasose baghodi mu kèle péchi.