¹ Letsughe la pigha lelota, na nguèli yena, va makiaki ma buchi ma letsughe la tsone latsomi, Marie ma muchi magdala na Marie makima nibayènde ghu pechi. ² Avanekaniva toto ya tsoke mbulia mbuli. Tome a Nzèmbi akolene(ayade) ghu yibondele lemani, ndè natsaghele va yulu a lo. ³ Ndjime a ndè yayingeghenge ngana muvediavedi. Matsande ma ndè bade na luate mafuku vèyo mabade. Mise ubuèyi kèngese vè. ⁴ Baghodi babade vane nibapadena. Maniutu ma bo nimatèbenge ka lekamba. Bo nibakuade na lenzenza. ⁵ Tome a ghu yulu nalèle bakase nde niaghani bome mono. Mè yebi me Sese wubakomine mu mbate a kurusu wu bene lasagha. ⁶ Ndè asasèli vaneve vè, amasoghe. Abone ni bu ndè lèle bene. Yadani yimonani va ndè bedi alase. ⁷ Ghabeghani namanze bene leyilèle baate bèndi ti:" amasoghe ghu leku. Namatsuame ghu Ngalile. Aghone nighu bene likiyi mone. Mè ka bene mè lèle." ⁸ Bakase bamate ghu pechi nibayènde tine, bamonenge mangongo mu miteme, to bo babade na ngombe yiyibuè, bo leyilèle baate bèndi matsange. ⁹ Bo bakemeghe Sese mu ndjile ndile ka yitsudiatsundi na buane na bo nde:"pole yibade na bena. Bakase nibakukulu va pedi a ndè, nibakuate ndè mu matèmbi, nibakutunu va busu buèndi, nibaghobichi ndè. ¹⁰ Avane Sese nalèle bo nde: "Niaghani bome mono. Yèndani ghu lèle baane ba taate bayènde ghu Ngalile, aghone nighu bese a bo liki moneno." ¹¹ Lekèse li bakase bayèndenge,baghodi baba kèlenge pechi niba yènde ghu yule musènge,niba lèle bivonde biaba bondili baate nzèmbi mambe motchi mabo ba mono. ¹² Va bivonde biaba bondili ba baate nzèmbi ba buane na mikuti miena,bo niba ghade kundu,niba vède baghodi badole bakunu(mfua bovè). ¹³ Bo lèlani ti:"baate bèndi bayidi na butsghe mu yibe mfumbi va bese lebedi biolo." ¹⁴ Ti ngua bulonge ayogha,bese leka dibeghe pape,achiba tchise bene chighi vè. ¹⁵ Baghodi niba bonge badole,niba sade mambe motchi mabo ba lèle bo.Bande mu letsughe muènè nacha lolo,ba Juif basa niaghe musame muène uyole vè. ¹⁶ Baduki bèndi ba lekumi na mumochi nibayènde ghu Ngalile ghu yulu mukonge wu Sese alaghe bo. ¹⁷ Vakètiava bo bamone ndè nibakutunu va busu buèndi mu ghobichi ndè, to bakime nibasadenge pagha(pfudu). ¹⁸ Sese akukulu va pedi a bo nayambele nde: "Butome bavède mè bua sade mambe pèti mo, ghu yulu na mu tote munumu." ¹⁹ Tsameghani bulonge buotchi, laghani baate ba malonge motchi mambe muène babade baate bèmè, bene levède bo batème mu ndoghe a tèyi na ya muaana naya lenioni la buyimbe.